Чаму сыходзяць у нябыт гісторыка-культурныя каштоўнасці?
Ад слаўнай мінуўшчыны нашай краіне дасталіся сотні старадаўніх шляхецкіх сядзіб — былога ўвасаблення заможнасці і раскошы, а сёння — помнікаў архітэктуры розных эпох. Праўда, у многіх з іх ад колішняй велічы засталіся непрыкметныя руіны: былыя маёнткі дзесяцігоддзямі пустуюць і не выкарыстоўваюцца, таму працэс разбурэння няўмольна накладае на іх свой адбітак. Цяпер у Дзяржаўны спіс гісторыка-культурных каштоўнасцяў Беларусі занесены 173 шляхецкія сядзібы. Безумоўна, захавалася іх нашмат больш, але не ўсе яны маюць статус гісторыка-культурнай каштоўнасці і не на ўсе распаўсюджваецца закон аб захаванні гісторыка-культурнай спадчыны. У адпаведнасці з заканадаўствам, любая фізічная ці юрыдычная асоба можа прапанаваць на разгляд Рэспубліканскай навукова-метадычнага савета пытанне аб наданні статусу каштоўнасці аб'екту, у тым ліку і сядзібе, так што тэарэтычна захаванне нашага архітэктурнага багацця залежыць у тым ліку і ад нас, грамадзян.
«Вы паглядзіце, як яна выглядае!»
Але на практыцы ўсё значна складаней. Па словах начальніка аддзела па ахове гісторыка-культурнай спадчыны ўпраўлення па ахове гісторыка-культурнай спадчыны і рэстаўрацыі Міністэрства культуры Наталлі ХВІР, у краіне ёсць як станоўчыя, так і адмоўныя прыклады аднаўлення гістарычных сядзіб.
— У якасці негатыўнага прыкладу можна прывесці сядзібу ў вёсцы Грымяча Камянецкага раёна, якую перадалі ў прыватную ўласнасць. Уладальнікі арганізацыі, якая набыла яе, думалі, што змогуць укласці ў яе мінімальныя сродкі і пасля перапрадаць аднаму італьянцу. Аднак яны не ўлічылі, што на сядзібу распаўсюджваецца заканадаўства ў сферы аховы гісторыка-культурнай спадчыны, а значыць, проста касметычны рамонт там зрабіць нельга. Таму праз пэўны час сядзібу вярнулі на баланс аддзела культуры.
Асноўнымі прычынамі, па якіх сядзібы стаяць безгаспадарныя, з'яўляюцца недахоп фінансавых сродкаў для іх аднаўлення, а таксама распрацоўка адпаведнай дакументацыі, якая патрабуе немалых намаганняў. Акрамя таго, калі аб'ект гісторыка-культурнай спадчыны перадаецца ўласніку, той падпісвае ахоўныя абавязацельствы і бярэ на сябе адказнасць за яго. Вось і атрымліваецца, што з 46 сядзібна-паркавых комплексаў, зацверджаных для перадачы ўласнікам, перададзена толькі 9. Усе цікаўныя могуць азнаёміцца са спісам сядзіб на сайтах абласных і райвыканкамаў.
— Гэта сведчыць пра недастатковы ўзровень працы ў гэтым кірунку мясцовых выканаўчых і распарадчых органаў, — лічыць Наталля Хвір.
Зрэшты, часам для таго, каб прадухіліць разбурэнне будынка, неабходна проста абараніць яго ад дзеяння ападкаў, закансерваваць. Гэта не заўсёды патрабуе вялікіх фінансавых укладанняў — дастаткова можа быць нават кавалка руберойду.
Некаторыя спецыялісты прапануюць пайсці еўрапейскім шляхам ратавання беларускіх сядзіб. Напрыклад, перадаць іх грамадскім структурам — фондам, як у Германіі, стварыць камбінаваную падтрымку дзяржавы і прыватнікаў, як у Вялікабрытаніі, плаціць чалавеку-наглядчыку грошы за падтрыманне сядзібы, як у Каталоніі... Але, на думку Наталлі Хвір, выкарыстоўваць у Беларусі замежны вопыт захавання старадаўніх сядзіб не зусім карэктна, бо там «не было 80 гадоў СССР». Па словах начальніка аддзела, часта на балансе нябедных арганізацый знаходзяцца сядзібы ў непрывабным стане, на аднаўленне якіх не выдзяляецца ні капейкі.
— Толькі дзякуючы таму, што мы пачалі прымаць меры адміністрацыйнага характару, на адной з сядзіб перакрылі дах, аднак, у парушэнне патрабаванняў закона, выкарысталі матэрыял, якім, па сутнасці, кароўнікі накрываюць. Калі мы сустракаліся ў судзе, прадстаўнікі арганізацыі тлумачылі: «Якая гэта гісторыка-культурная каштоўнасць? Вы паглядзіце, як яна выглядае! Людзі нават не ўсведамляюць, што гэта — наша спадчына і мы павінны ёй ганарыцца.
Парушальнікаў аштрафавалі на тры мільёны рублёў. Але што значыць гэтая сума для буйнога прадпрыемства? Сітуацыя ўскладняецца яшчэ і тым, што дзяржаўнай праграмы па падтрымцы сядзіб няма, таму іх лёс цалкам знаходзіцца ў руках уласнікаў.
Хто ў маёнтку гаспадар?
— У першую чаргу неабходна знайсці ўласнікаў для ўсіх аб'ектаў, — перакананы дырэктар фонду «Краіна замкаў» Аляксандр ВАРЫКІШ. — Прычым неабавязкова пад патрэбы аграэкатурызму — пад любыя патрэбы, абы толькі людзі забіралі і даглядалі іх. Таму што ёсць прыклады проста жудасныя. Напрыклад, у Жамыслаўлі Іўеўскага раёна калгас прадаў будынак уласніку, пасля дзяржкантроль выявіў парушэнні і набытак забралі. Так будынак стаяў, пакуль не здарыўся пажар, і цяпер ён без даху разбураецца.
Аляксандр Варыкіш адзначыў, што ў куплі-продажы сядзіб, нават не прызнаных гісторыка-культурнай спадчынай, ёсць складанасці. Калі ў 2007 годзе можна было купіць сядзібу на аўкцыёне на раённым узроўні, то цяпер гэтая працэдура адбываецца на ўзроўні вобласці. Дырэктар фонда таксама дадаў, што цэны на пакупку сядзіб праз аўкцыёны даходзяць і да 80—100 тысяч долараў. Сапраўды, можа атрымацца проста касмічная сума з улікам таго, што купленую сядзібу трэба яшчэ давесці да ладу.
Наталля Хвір не згодна з тым, што сядзібы можна прыстасоўваць пад любыя патрэбы.
— Уласнік падпісвае ахоўныя абавязацельствы, у адпаведнасці з якімі ён нясе адказнасць за атрыманы ім будынак. Да таго ж ён у абавязковым парадку павінен узгадніць з Міністэрствам культуры змену прызначэння аб'екта.
Таксама спецыяліст звярнула ўвагу на тое, што ўласнік абавязаны прадастаўляць турыстам доступ да набытага ім аб'екта, але ён можа вызначаць, калі прадастаўляць гэты доступ.
Валанцёр Зміцер Юркевіч, член арт-суполкі імя Тадэвуша Рэйтана, якая займаецца аднаўленнем яго сядзібы ў вёсцы Грушаўка, перакананы, што падобныя аб'екты павінны заставацца на папячэнні дзяржавы. На яго думку, аднаўленне сядзібы Рэйтана і стварэнне там музейных экспазіцый шырокага профілю «за вушы выцягне Ляхавіцкі раён».
— Мы не абмяжоўваліся толькі суботнікамі і латаннем дахаў, а пісалі артыкулы і ініцыявалі стварэнне каналам АНТ стужкі «Тадэвуш Рэйтан — беларускі Дон Кіхот» цыкла «Зваротны адлік». Фактычна цяпер ідзе вяртанне імені, і дзякуючы гэтаму з'явіцца цікаўнасць да роду і да сядзібы.
Аб тым, наколькі ахвотна беларусы бяруць на сябе цяжар гісторыка-культурнай спадчыны, сведчыць няўмольная статыстыка: у прыватнай уласнасці знаходзіцца каля 10% сядзіб. Па словах начальніка ўпраўлення карпаратыўнага бізнесу Белаграпрамбанк Святланы КОНЧЫЦ, яшчэ не было ніводнага выпадку, каб людзі звярталіся ў банк па крэдыт на пакупку гістарычных сядзіб.
Не актыўна купляюць нашы сядзібы і замежнікі. І хоць на аўкцыёнах цэны могуць зніжацца, гэта ўсё адно не вырашае праблемы: на ўласніка кладуцца надта вялікія патрабаванні. Наталля Хвір падтрымлівае спрашчэнне сістэмы перадачы сядзіб уласнікам, але адзначае, што ў гэтай справе не ўсё залежыць ад Мінкульта — ёсць яшчэ іншыя ведамствы і мясцовыя органы ўлады. Падаецца, у паўнамоцтвах гэтых устаноў распрацоўваць канкрэтныя шляхі аховы нацыянальнай культурнай спадчыны, якую даверыў ім народ, бо гэта іх прамы абавязак. А яны не могуць прыйсці да згоды паміж сабой, тым часам як старадаўнія сядзібы не могуць чакаць вечна. Яны з усёй сілы стогнуць разбітымі сценамі, заклікаюць пустымі ваканіцамі, лямантуюць дзіравымі дахамі і ў рэшце рэшт, выпусціўшы свой апошні працяглы ўздых, разбураюцца. Дык хто возьме на сябе адказнасць за перакананасць многіх беларусаў у тым, што ў нашай краіне няма на што паглядзець?..
Дзіяна СЕРАДЗЮК.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.