Як праз 17 гадоў маладая беларуска знайшла страчаную радзіму
«Цыганка прынесла мяне да маёй бабулі, у якой не было дзяўчынкі, а быў толькі сын, і яна купіла мяне», — расказвае неверагодна прыгожая дзяўчына з ільнянымі валасамі і зялёнымі прамяністымі і сумнымі вачыма. Аблічча — самае што ні на ёсць беларускае, а эмацыйнасць, яркая міміка і інтанацыя — цыганскія. Гісторыя 21-гадовай ураджэнкі Беларусі, якая знікла без звестак 17 гадоў таму і раптоўна знайшлася, нагадвае спалучэнне бразільскага серыяла, дэтэктыўнай гісторыі і сентыментальнай п'есы. У тое, што такое магчыма, складана паверыць. Аднак жыццё часам нагадвае, што і ў суровай будзённасці можна знайсці месца для цуду.
Дзяўчынка расла ў цыганскай сям'і як усе дзеці, толькі ніяк не магла прывыкнуць да новага імені Марыя, бо памятала, што яе завуць Воля. А яшчэ ўвесь час адчувала сябе «белай варонай», хоць, паводле яе слоў, ставіліся да яе як да роднай. І цяпер яна, яшчэ такая маладая, але такая не па-юнацку сур'ёзная, расказвае пра свой лёс, ледзьве стрымліваючы слёзы. «Мне вельмі шмат давялося перажыць. Мяне любілі, выхавалі, як змаглі, нават больш — нада мной дрыжалі. Але гэтае пачуццё — разумееш — не тваё. У мяне заўсёды былі пытанні: хто я такая, адкуль я родам? Якая ні была б праўда — нават калі мае бацькі мяне прадалі — я хацела б яе ведаць».
У Малдове Воля вывучыла цыганскую і малдаўскую мовы, скончыла 9 класаў рускай школы (рускую яна ведала з дзяцінства), адвучылася ў каледжы спачатку на повара, пасля на цырульніка, асвоіла майстэрства манікюру, нават перамагла ў мясцовым конкурсе прыгажосці... і не ведала, што ўвесь гэты час на радзіме яе шукаюць.
— Яшчэ ў 1997 годзе інспекцыя па справах непаўналетніх і крымінальны вышук горада Мінска ініцыявалі пошукі дзяўчынкі, — паведаміў «Звяздзе» супрацоўнік прэс-службы ГУУС Мінгарвыканкама Андрэй САСОНКА. — Быў абвешчаны рэспубліканскі, міжнародны і міждзяржаўны вышук, шукалі па ўсім свеце. У беларускай міліцыі была інфармацыя, што дзяўчына знаходзіцца ў Малдове. Дасылалі запыт і туды, дзе яна жыла, у горад Сарокі. Але вынікаў ён не даў, бо на той момант Вользе выдалі дакументы на новае імя і нават пазначылі ў іх іншую дату нараджэння.
Як ні спрабавала дзяўчына распытваць у бабулі пра сваю сапраўдную сям'ю, тая прасіла не кранаць гэтай тэмы. Гаварыла: маўляў, гэта можа прынесці ім шкоду. Што не дзіўна, бо Вольгу ў мамы ўкралі, а пасля прадалі. Але сёлета бабуля памерла, і Вольга, вырашыўшы, што ўжо не можа ёй нашкодзіць, сама распачала актыўныя пошукі сваіх каранёў. Спачатку звярнулася ў праграму «Чакай мяне», але там ёй адказалі, што звестак недастаткова і дапамагчы ў гэтай сітуацыі не змогуць. У роспачы, амаль страціўшы надзею, пайшла са сваёй праблемай да псіхолага, і разам з ім яны прынялі рашэнне звярнуцца ў малдаўскую міліцыю. Пачалася праверка па базах вышуку, і ўсе прыкметы дзяўчыны, а таксама абставіны яе знікнення супалі. Беларускаму і малдаўскаму міністэрствам унутраных спраў сумесна з інтэрпалам удалося атрымаць фота зніклай дзяўчыны, па якім яе прызналі беларускія сваякі. Апошнія сумневы развеялі вынікі генатыпаскапічнай экспертызы, якую правялі ў Мінску: паводле іх, зніклая 17 гадоў таму беларуска і 21-гадовая Марыя — адна і тая ж асоба.
Пасля доўгага расстання Вольга паспела пабываць у Беларусі: у Мінску дзяўчыну прытуліла цётка. Горад маладой беларусцы вельмі спадабаўся, хоць многае тут для яе яшчэ нязвыклае. Але пакуль што такое чаканае вяртанне на радзіму было нядоўгім: дзяўчыне зноў спатрэбілася выехаць у Малдову, каб заняцца афармленнем дакументаў, неабходных для канчатковага пераезду ў Беларусь. Тут яна спадзяецца знайсці працу і жыллё. Хочацца верыць, што пасля столькіх перыпетый гэтая шчымлівая гісторыя знойдзе свой лагічны шчаслівы працяг і яе гераіня, нарэшце, стане сваёй сярод сваіх.
Дзіяна СЕРАДЗЮК.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.