Гэтай ноччу завяршыўся 23-ці па ліку міжнародны фестываль мастацтваў «Славянскі базар у Віцебску». Сёлетні фестываль, як заўважылі старажылы горада, многія яго ўдзельнікі, запомніцца надоўга. І гэта — дзякуючы новым праектам, новаму падыходу да правядзення конкурсу маладых выканаўцаў. А сцэна амфітэатра ўразіла ўсіх, хто знаходзіўся ў зале ці глядзеў трансляцыі па тэлебачанні. А яшчэ прыемна здзівіла тое, што падчас «базару» не было ліўняў, якія «наведвалі» фестывальны горад штогод. Прадстаўнікі каля 30 краін свету бралі ўдзел у гэтым фэсце. Гасцінны Віцебск практычна кругласутачна фестываліў. Некаторыя канцэрты ў летнім амфітэатры — на галоўнай сцэне «базару» — завяршаліся пад раніцу. У цэнтры горада кірмашы, вулічныя кавярні працавалі і ноччу. Як падлічылі ў аблвыканкаме, штодня падчас «базару» таваразварот павялічваецца мінімум у 10 разоў. Зладжана папрацавала каманда арганізатараў фестывалю. У дырэкцыі зрабілі ўсё магчымае, каб самыя капрызныя «зоркі» засталіся задаволенымі знаходжаннем на адным з самых вядомых у свеце культурных праектаў. І гараджанам, і не «зорным» гасцям горада было камфортна. Па добрай традыцыі, праца над падрыхтоўкай да чарговага «базару» пачынаецца адразу пасля заканчэння мінулага. І цяжка ўявіць, што калісьці ў Віцебску не было такога маштабнага мерапрыемства. Такое ўражанне, што фестываль заўсёды быў, ёсць і, безумоўна, будзе! Фэст афіцыйна закрыўся, але і сёння, і заўтра праходзяць канцэрты, прэзентуюцца забаўляльныя праграмы. Такім чынам, «базар» па-ранейшаму правіць баль.
Аляксандр ПУКШАНСКІ.
Мерапрыемства праводзіцца на добраахвотнай аснове.
Не выявіць ні секунды абыякавасці.