Трэці год на тэлеканале АНТ існуе рубрыка «У вас будзе дзіця». Кожны тыдзень беларускім гледачам расійскай праграмы «Пакуль усе дома» паказваюць сюжэты пра дзяцей, якія чакаюць усынаўлення. Дзякуючы праграме свае новыя сем'і знайшлі амаль 50 дзяцей. Да праекта далучылася і наша газета.
Саша і Уладзік
Дзесяцігадовы Саша і чатырохгадовы Уладзік з Гродзенскага дзіцячага дома — браты. Саша пастаянна няньчыцца з Уладам, нічога для яго не шкадуе.
Уладзік — адкрыты, вясёлы хлопчык — любіць сервіраваць стол, у яго заўсёды добры апетыт. Слодыч без шкадавання прамяняе на бульбяное пюрэ і катлеты. Хлопчык даволі рухавы, задае шмат пытанняў і ўважліва слухае адказы. Любіць гуляць з машынкамі, канструяваць, складваць пазлы. Даволі лёгка адаптуецца да новых абставін, умее спадабацца. Любіць пахвалу, імкнецца яе заслужыць, прывязаны да выхавацеляў групы.
Саша вельмі ашчадна ставіцца да сваіх рэчаў, з задавальненнем наводзіць парадак у пакоі, добра выконвае працоўныя даручэнні. Любіць спорт.
Коля і Аня
Гадавалы Колечка і крыху старэйшая Ганначка з Віцебскага дома дзіцяці — брацік і сястра.
У Ганулі вельмі прыгожая, адкрытая ўсмешка. Яна кантактная, спакойная і даверлівая. Любіць прыбірацца і разглядаць сябе ў люстэрка. У групе актыўна гуляе з усімі дзецьмі, добразычліва ставіцца да іх. З радасцю выконвае даручэнні дарослых. Любіць гуляць з лялькамі.
Коля цікаўны, добразычлівы. Калі заўважае, што на яго звярнулі ўвагу, адразу ўсміхаецца. І немагчыма не ўсміхнуцца яму ў адказ. Варта ўзяць малога на рукі і загаварыць з ім, ён абавязкова пераключыць увагу на таго, хто з ім размаўляе. Хлопчык вельмі ласкавы. Любіць гуляць і з лялькамі, і з машынкамі, слухаць музыку і падтанцоўваць пад яе.
Усе пытанні, звязаныя з усынаўленнем ці прыёмам пад апеку дзяцей, дапамогуць вырашыць псіхолагі і юрысты Нацыянальнага цэнтра ўсынаўлення па тэл. 8 (017) 284-71-51.
Святлана БАРЫСЕНКА.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
Ідэнтычнасць праз спадчыну.