Пакуль што стаўка рэфінансавання працягвае зніжацца
Да канца года сярэдняя стаўка па крэдытах у Беларусі можа скласці 29% гадавых. Пра гэта стала вядома па выніках выязнога пасяджэння праўлення Нацыянальнага банка, якое прайшло ў Віцебскай вобласці.
Сёлета Нацыянальны банк у мэтах павышэння даступнасці крэдытных рэсурсаў для суб'ектаў гаспадарання працягне палітыку паступовага зніжэння працэнтных ставак у эканоміцы, не пагаршаючы сітуацыю на дэпазітным і валютным рынках, адзначылі ва ўпраўленні інфармацыі і грамадскіх сувязяў Нацбанка.
Удзельнікамі пасяджэння было падкрэслена, што ва ўмовах жорсткай манетарнай палітыкі фінансаванне дзяржаўных праграм і мерапрыемстваў павінна ажыццяўляцца ў межах наяўных крыніц. «Банкам неабходна стымуляваць рэалізацыю высокаэфектыўных праектаў, не дапускаць росту пратэрмінаванай запазычанасці па крэдытах, нарошчваць рэсурсную базу, стала працаваць з прадпрыемствамі па зніжэнні знешняй дэбіторскай запазычанасці. Пры гэтым канкурэнтаздольнасць эканомікі ў цэлым павінна забяспечвацца за кошт павышэння канкурэнтных пераваг саміх вытворцаў тавараў і паслуг, а не за кошт курсавой палітыкі», — лічаць у Нацбанку. Зыходзячы з гэтага, сёлета абрана тактыка паступовага паслаблення курсу беларускага рубля. «Гэта дазваляе, з аднаго боку, не перашкаджаць тэндэнцыям рынку і не дапускаць значнага расходавання золатавалютных рэзерваў, з іншага боку, — забяспечваць падтрыманне цанавой канкурэнтаздольнасці экспарту, захоўваць стабільнасць на валютным і дэпазітным рынках, у значнай ступені стрымліваць развіццё інфляцыйных працэсаў».
Мяркуецца, што на канец 2014 года абменны курс беларускага рубля да долара ЗША складзе 10 700 — 10 800 рублёў за 1 долар. «Пры гэтым далейшая дынаміка абменнага курсу будзе шмат у чым вызначацца эфектыўнасцю працы ўсёй эканомікі, сітуацыяй у знешнім гандлі, узважанасцю рашэнняў, што прымаюцца ў галіне макраэканамічнай, бюджэтна-падатковай і грашова-крэдытнай палітыкі», — падкрэслілі ў Нацбанку. Акрамя таго, стаўка рэфінансавання да канца года можа знізіцца да 20% гадавых.
Нагадаем, што з учарашняга дня асноўная стаўка зніжана на 1 працэнтны пункт — да 20,5% гадавых. Лічыцца, што гэты захад будзе спрыяць павышэнню даступнасці крэдытных рэсурсаў і памяншэнню пазыковай нагрузкі на прадпрыемствы рэальнага сектара эканомікі. Пры гэтым уклады ў беларускіх рублях па-ранейшаму будуць больш выгаднымі ў параўнанні з валютнымі. Дарэчы, з пачатку года гэта ўжо трэцяе па ліку зніжэнне стаўкі рэфінансавання: папярэднія былі ў красавіку і маі. Абодва разы стаўка зніжалася на 1 працэнтны пункт.
Уладзіслаў КУЛЕЦКІ.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».