На тэрыторыі самага прывабнага турыстычнага аб'екта Магілёўшчыны плануюць пабудаваць музей рыб, канатную дарогу і ўнікальную аграсядзібу
Сёння Буйніцкі заасад — адзін з папулярных комплексаў не толькі Магілёўшчыны, але і Беларусі. Жывёлы знаходзяцца тут у набліжаных да прыродных умовах. Аб тым, што яны адчуваюць сябе як дома, сведчыць вялікая нараджальнасць. За апошнія 10 гадоў тут з'явіліся на свет 128 новых насельнікаў. Частка з іх папоўніла заасады Беларусі і Расіі.
Турыстаў прываблівае не толькі разнастайны жывёльны мір, але і шмат забаўляльных аб'ектаў. Тая ж чыгунка, па якой можна здзейсніць займальнае падарожжа па лесе і паназіраць, як паводзяць сябе жывёлы ў прыродзе. Аматары конных прагулак могуць праехацца на старадаўняй карэце. Палюбавацца маляўнічай прыродай можна і з боку Дняпра, скарыстаўшыся адным з наяўных тут катараў. Для аматараў экзотыкі ёсць сцежка здароўя з элементамі экстрыму.
Тое, што цікавасць да Буйніцкага заасада павялічваецца, сведчыць рост даходаў ад турыстычнай дзейнасці. За кошт аказання паслуг і пазабюджэтнай дзейнасці за апошнія 4 гады зароблена каля 12 мільярдаў рублёў (на 2 мільярды больш, чым было ўкладзена ў развіццё). Па словах ініцыятара і непасрэднага куратара заасада, дырэктара Магілёўскага агралесатэхнічнага каледжа імя К.П. Арлоўскага Георгія Маліноўскага, вядзецца супрацоўніцтва з 43 турыстычнымі арганізацыямі. Цяпер гаворка ідзе аб тым, каб пабудаваць на тэрыторыі заасада вялікі музей рыб і канатную дарогу. Але без спонсарскіх сродкаў ажыццявіць амбіцыйныя планы будзе цяжка. Адна толькі канатная дарога, па падліках праекціроўшчыкаў, абыдзецца прыкладна ў 5 мільярдаў рублёў. Старшыня Магілёўскага аблвыканкама Пётр Руднік таксама зацікаўлены ў тым, каб і музей, і дарога з'явіліся. Ён параіў кіраўніцтву каледжа больш актыўна развіваць сферу паслуг і запрашаць усіх ахвотных на платнае навучанне.
Сёння назіраецца вялікая цікавасць да аграэкатурызму, але спецыялістаў, якія могуць прасоўваць гэтыя паслугі, у Беларусі няма. І Георгій Маліноўскі звярнуўся з прапановай, каб кіраўніцтва краіны разгледзела магчымасць увядзення новай спецыяльнасці ў тарыфна-кваліфікацыйны даведнік работ і прафесій рабочых. На яго думку, каледж змог бы стаць падыходзячым месцам для падрыхтоўкі гэтых кадраў. Ёсць праект, па якім да 2015 года плануецца пабудаваць на тэрыторыі заасада аграсядзібу — яна стане добрай пляцоўкай для заняткаў будучых спецыялістаў па аграэкатурызме.
У няўрымслівага Георгія Маліноўскага ёсць яшчэ адна цікавая задумка. Ён марыць аб усталяванні на тэрыторыі заасада відэакамер, з дапамогай якіх можна было б назіраць за паводзінамі буйніцкіх жывёл на YouTube. Цяпер вядуцца пошукі спонсараў для ажыццяўлення гэтай ідэі.
Нэлі ЗІГУЛЯ.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».