У 80‑гадовы юбілей Генадзь Гарбук збіраецца праспяваць пра жыццё
Сёння народны артыст Нацыянальнага акадэмічнага драматычнага тэатра імя Янкі Купалы Генадзь Гарбук адзначае дзень народзінаў. Лета, тэатральнае зацішша… Не, сваё свята артыст збіраецца падзяліць з прыхільнікамі: у верасні, ужо на пачатку новага сезона, Генадзь Міхайлавіч запросіць на творчую вечарыну «Песні майго жыцця», дзе паўстане… спеваком. Запросіць у тэатр, у якім ён працуе ўжо больш за 50 гадоў.
Тэатр — гэта яго лёс. І яго лёс — менавіта гэты тэатр: беларускі нацыянальны (Коласаўскі ў Віцебску, дзе пачынаў, і Купалаўскі). Інакш не скажаш, калі паглядзеў безліч спектакляў з яго ўдзелам, дзе кожны раз была нагода разважаць пра тое, што ёсць наш чалавек, на нашай зямлі, якой на долю выпала наша гісторыя. І кожным разам у гэтых спектаклях Генадзь Гарбук быў такім сваім і пазнавальным, што за ролямі — праз персанажаў — так ці інакш паўставала Беларусь. Простая (як здаецца). Задуменная (мо якраз таму, што ўнутры — вір думак). Стрыманая (ці гэта насамрэч ідзе ад спакойнай прыроды?). Павольная (але ж нездарма ў гэтым слове ёсць частка «волі»!). Разважлівая (праз сукупную мудрасць папярэдніх пакаленняў). Чуллівая (як жа мы — ды без дабрыні і асаблівай сардэчнасці?). Купалаўскі тэатр і акцёр Гарбук проста вельмі супалі — у часе і па сэнсе. Для яго заўсёды важны сэнс ролі. Для яго важна, каб гэты сэнс трапляў у цэль — у чалавека, узнімаючы яго ад дробнага і часовага да высокага і вечнага. Ён гэта рабіў у сваіх ролях нават тады, калі героі, здавалася б, усё рабілі наадварот. Але героі такія, якія мы, людзі адсюль. І Генадзь Гарбук гэта ілюстраваў. Пра тое, чаму такі Васіль Дзятлік з «Людзей на балоце», усе разважалі яшчэ ў школе. Але адна справа — пагаварыць. Іншая — калі са сцэны табе праілюструюць. Прычым так, як быццам гэта жыццё і ёсць, а не гульня акцёра. Вось хоць бы ўзгадаць адну з нядаўніх роляў у кіно — дзеда Талаша, паводле коласаўскай «Дрыгвы». Гэта ж абсалютна наш дзед — дагэтуль у вёсках падобных дзядуляў пабачыць можна. І нездарма для Генадзя Гарбука гэтая роля была надзвычай важнай, ён вельмі хацеў яе сыграць: герой, якога ён ведае, разумее, адчувае і любіць.
Можа, у тым і сакрэт таго, што ў асобе Генадзя Міхайлавіча глядач бачыць беларуса, дзе б ён ні жыў — у горадзе ці ў вёсцы, якім бы ён ні быў — селянінам ці шляхціцам, альбо сучасным гараджанінам. Прыродная арганічнасць у спалучэнні з добрай тэатральнай адукацыяй нарадзілі талент адчування сутнасці. І ўменне яе данесці. А вучыцца гэтаму ён пачаў рана — яшчэ са школьнай самадзейнасці на роднай Вушаччыне. Потым у Беларускім дзяржаўным тэатральна-мастацкім інстытуце, дзе яго настаўнікам быў Дзмітрый Арлоў. Але яго настаўнікам быў і тэатр, само мастацтва, якое не прымае падману і ўвесь час патрабуе самаўдасканалення. Генадзь Міхайлавіч прыняў і гэтую ўмову творчага доўгажыхарства: не цураўся спектакляў сучасных, эксперыментальных. І ўвесь час шукаў для сябе крыніцы энергіі: ці то ў самой актыўнай працы, ці ў сабе самім (нездарма ж узнікла захапленне ёгай).
Яго ролі не пералічыць. У тэатры імя Янкі Купалы ён паспяхова працаваў з рознымі рэжысёрамі — вельмі запатрабаваны акцёр, калі паглядзець па спектаклях, якія ідуць цяпер. Па працах у кіно наогул вядомы на ўвесь былы Саюз — варта ўзгадаць ролю Андрэя Ходаса ў камедыі «Белыя росы» ці ваенную драму «Знак бяды» (за выкананне ролі Петрака партрэт Генадзя Гарбука з'явіўся ў Лонданскім музеі кінамастацтва). Узнагарод і адзнак багата: Дзяржаўная прэмія СССР (за працу ў фільме «Людзі на балоце»), медаль Францыска Скарыны, прэмія «За духоўнае адраджэнне», прэмія Беларускага саюза тэатральных дзеячаў «Хрустальная Паўлінка» і іншыя. Але галоўнае званне Генадзя Гарбука — народны артыст Беларусі. Па сутнасці — наш!
У дзень юбілею любімаму артысту супрацоўнікі газеты і чытачы зычаць новай цікавай працы, у якой хацелася б з намі размаўляць.
Прэзідэнт Рэспублікі Беларусь Аляксандр Лукашэнка павіншаваў народнага артыста Беларусі Генадзя Гарбука з 80-годдзем.
«Унікальны мастацкі талент і высокі прафесіяналізм зрабілі Вас адным з выдатных майстроў беларускай сцэны, чые ролі кранаюць сэрцы гледачоў жыццёвай праўдай, увасабленнем лепшых рыс народнага характару і псіхалагічнай глыбінёй, з'яўляюцца ўзорам для маладых тэатральных дзеячаў», — гаворыцца ў віншаванні.
Як адзначыў кіраўнік дзяржавы, вобразы, створаныя Генадзем Гарбукам у спектаклях паводле твораў розных аўтараў, сталі неацэнным укладам у скарбніцу нацыянальных культурных каштоўнасцяў, духоўна выхавалі не адно пакаленне грамадзян краіны.
Прэс-служба Прэзідэнта Рэспублікі Беларусь.
Мерапрыемства праводзіцца на добраахвотнай аснове.
Не выявіць ні секунды абыякавасці.