Беларускі ўрад вырашыў зняць абмежаванні па пастаўках украінскіх кандытарскіх вырабаў і піва на айчыннырынак. Чым адкажа Украіна?
«24 ліпеня прэм'ер-міністрам Рэспублікі Беларусь падпісана пастанова (№ 719), якая здымае ў нашых партнёраў па СНД асцярогі адносна доступу іх тавараў на беларускі рынак», — паведаміў начальнік упраўлення інфармацыі — прэс-сакратар МЗС Дзмітрый Мірончык.
Нагадаем, што ў красавіку-маі было ўведзена ліцэнзаванне паставак у нашу краіну цэменту, шкла, піва, некаторых відаў макаронных і кандытарскіх вырабаў. Гэтыя рашэнні былі ўведзены часова, тэрмінам на шэсць месяцаў, і тычыліся тавараў з усіх дзяржаў, акрамя членаў Мытнага саюза. На гэтыя падзеі асабліва негатыўна адрэагавала Украіна, пра што «Звязда» пісала ў мінулую суботу.
Тады мы расказвалі, што наша суседка вырашыла ўвесці спецыяльныя пошліны на шэраг беларускіх тавараў (шыны, халадзільнікі, малочныя вырабы, угнаенні і іншае). Для ўступлення ў сілу гэтага рашэння далі адтэрміноўку 10 дзён. У выніку Беларусь зрабіла крок насустрач першай. «На працягу красавіка—ліпеня ў пастаянным рэжыме ажыццяўляўся маніторынг сітуацыі з доступам ліцэнзійных тавараў, асабліва з краін СНД, з якімі ў нас падпісаны пагадненні аб свабодным гандлі. Яго вынікі сведчаць аб выпраўленні негатыўных тэндэнцый, якія мелі месца на ўнутраным рынку на момант прыняцця пастаноў. Такім чынам, адпала неабходнасць у ліцэнзаванні тавараў, якія паступаюць да нас з краін, што падпісалі Дагавор аб зоне свабоднага гандлю ад 18 кастрычніка 2011 года», — заявіў Дзмітрый Мірончык. Міністэрства замежных спраў чакае, што «Украіна забяспечыць доступ беларускіх тавараў на свой рынак у рэжыме, які вызначаны Дагаворам аб зоне свабоднага гандлю, аператыўна адмяніўшы адпаведныя рашэнні Міжведамаснай камісіі».
Калі ўкраінскія рашэнні ўступяць у сілу, то, па словах Дзмітрыя Мірончыка, будуць прымацца захады адэкватнага рэагавання: «Хаця спадзяёмся, што па негатыўным сцэнары падзеі развівацца не будуць, бо гэта не адпавядае духу і ўзроўню ўзаемадзеяння паміж нашымі брацкімі краінамі».
Уладзіслаў КУЛЕЦКІ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».