«Не пайду сягоння на пляж…», — прамаўляла ў адным з маналогаў гумарыстка Клара Новікава.
Я, на вялізазны жаль, таксама не пайду, таму што водпуск скончыўся, а з ім…
«Хелло!», «Гутэн таг!», «Добрый день!» — афіцыянты шматлікіх бараў, кавярняў ды рэстаранаў, прадаўцы пякарняў толькі што не хапалі за «фалды»: ці не кожнаму стрэчнаму — і яшчэ здалёк — яны ўсміхаліся, ці не з кожным віталіся (і вызначалі ж нейкім чынам патрэбную мову!), запрашалі зайсці — паснедаць, папалуднаваць, павячэраць, перакусіць, пакаштаваць; на ўсе галасы абяцалі, што гэта будзе нядорага (меню, дарэчы, з усімі цэнамі і на некалькіх мовах размешчаны яшчэ на вуліцы), што гэта хутка і — новае слоўца, перанятае ад процьмы рускамоўных — укусна.
Ад падобнага трыадзінства адмовіцца, згадзіцеся, цяжка, бо яно ж і сапраўды — чалавек галодны ні на што не годны… Да таго ж адпачынак яму, таму чалавеку, даецца толькі раз на год (не нагрэешся летам — намерзнешся зімой) і іменна на тое, каб ён адпачыў — яшчэ і ад кухні.
Так што — была ні была, трэба ж пачынаць — мы збочваем у адну з кавярняў, займаем столік.
Азірнуцца не паспяваем: на ім ужо з'явілася прыгожае блюда з духмяным хлебам, лыжкі і відэльцы, меню… У нас (на сумесі рускай з англійскай) ужо спыталі, ці не прынесці нешта з напіткаў (гэта некалі тое ж піва, каву ды гарбату пілі пасля таго, як паелі, цяпер можна і перад…), прынялі заказ. Праз лічаныя хвіліны (без перабольшвання) перад намі з'віліся… пустыя талеркі, а следам у ладнай супніцы (як у лепшых дамах!..) нам прынеслі чорбу. (Міжвольны ўспамін: «Не сёрбай, сынок, — просіць аўцючка ў малога, — а то свінкі збягуцца…)
Вы не вялікі аматар сёрбаць і першае хацелі хіба паспытаць? Не пытанне, як той казаў: згаданую чорбу (духмяны, наварысты суп без звыклых крышаноў гародніны) афіцыянт налівае вельмі асцярожна, паволі — а таму ў любое імгненне вы можаце спыніць яго, калі не словам, то жэстам: «До».
Альбо прамаўчаць…
Ну сапраўды: вы ж маглі нахадзіцца падчас экскурсіі альбо, дарваўшыся да мора, да цяплюткай вады, наплавацца так, што зараз з'елі б вала? У гэтым выпадку талерку нальюць вам, што называецца, з коптурам…
(Дарэчы, наш сусед па століку да вось такой, паўнюткай, якраз прылажыўся… Са смакам падмёў — і яе, і цэлае блюда хлеба. А пасля гэтага задаволена выцер вусны, пачухаў пад майкай аблуплены ад загару жывот і сказаў афіцыянту, што ўсё, яму хапіла — есці больш нічога не будзе, хоць і заказаў…
Думаеце, афіцыянт абурыўся? Не, ніколечкі: з той самай добразычлівай усмешкай ён паўтарыў сваё запытальнае, ці «ўкусна» ж з'елася, ды запрасіў заходзіць яшчэ, бо нават такі ядок (прыбытку з яго — як каток наплакаў) для прыватнай страўні лепш, чым ніякі. Апроч таго — гэта сёння днём ён «ніякі» — абмежаваўся той чорбай з хлебам, а ўжо вечарам — цалкам магчыма, бо дарогу ведае — прыйдзе яшчэ, нават не адзін. І закажуць яны…).
Зрэшты, пра суседа па століку гэта так, да слова. Галоўнае ж, што кухары тут (канкурэнцыя!) кіруюцца бабуліным правілам: «Гатаваць трэба смачна, а не ўмееш — не псуй прадукты», што абслугоўваючы персанал працуе добра, бо той жа афіцыянт, праходзячы міма (і як быццам па іншых справах?), вас пастаянна бачыць, бо ён (і тут жа!) неўпрыкмет прымае са стала пустыя талеркі, клапатліва, як і належыць сапраўднаму гаспадару, пытае ў гасцей, ці смачна ж прыгатавана, ці не трэба прынесці нешта яшчэ — чарыцу мясцовай гарэлкі, нейкіх слодычаў, садавіны, марозіва?
Да таго ж потым, скончыўшы трапезу, вы не будзеце чакаць яго, прасіць, каб прынёс рахунак. Афіцыянт (сярод іх пераважна мужчыны) падыдзе сам — падасць разлік, хутка прынясе рэшту. Чаявыя, ну вядома ж, вітаюцца…
Аднак незалежна ад таго, пакінулі вы іх ці не і ў якім памеры, вам абавязкова падзякуюць, што прыйшлі, што падсілкаваліся іменна тут, за вамі абавязкова прасочаць, каб вы нічога не забыліся. А што самае дзіўнае — вас запомняць у твар, каб у наступны раз вітаць ужо трохі па-іншаму, як добрых знаёмцаў — з усімі адсюль наступствамі.
…У нашы, сталічныя пункты грамадскага харчавання (назавем іх так) не запрашае пакуль ніхто: адкрыты, працуюць — і дзякуй Богу: хочаш есці — заходзь, месцаў вольных багата.
Прагрэс: вельмі шмат дзе кліентаў сустракаюць усмешкай, вельмі шмат дзе адказваюць на іх «Добры дзень!» і зноў жа шмат дзе (вядома ж, калі кліентаў бракуе) досыць хутка прыносяць меню.
Са стравамі, на жаль, давядзецца пачакаць.
Ды і потым, калі іх прынясуць, безумоўна ж, уразіцца, бо порцыі ў нас істотна меншыя, а вось цэны на іх — не…
Але самае крыўднае можа здарыцца пасля, напрыканцы, калі вы (як мы, напрыклад) закажаце гарбату без цукру, а замест яго (гуляць дык гуляць) прапануеце сяброўкам гасцінец — спецыяльна для гэтай сустрэчы прывезены здалёк шакалад…
Нібы з‑пад зямлі тады вынырне афіцыянтка, якая дагэтуль вас увагай не песціла, і, не падбіраючы слоў, залапоча: «Что вы делаете?! Немедленно уберите!.. Это запрещено! Категорически!»
І не дапаможа вам ваша разгубленае: «Чаму?» (гэта ж не звыклае «прыносіць і распіваць спіртныя напіткі…»), не дапамогуць ніякія іншыя словы і нават жарты, бо на шум, на дапамогу афіцыянтцы (у нас яны пераважна жанчыны) прыйдзе адміністратар. І паўторыць амаль слова ў слова: схавайце, нельга, забаронена… Згодна з палажэннем — магу вам яго прынесці…
А потым ужо патлумачыць, што ў кавярні — відэаназіранне цяпер (Божухна, ужо і тут?!)… А значыць, нехта з тых, хто яго праглядае, можа падумаць (не паверыць вачам?), што «абслуга» спекулюе, гандлюе — напрыклад, «левым» шакаладам…
У той кавярні мы бывалі часцей, чым у нейкіх іншых: прынамсі, не раз адзначалі дні народзінаў, сустракаліся з сябрамі… Мы, можна сказаць, любілі яе і, здаецца, нездарма: там заўсёды было ўтульна, там досыць добрая кухня і параўнальна боскія цэны, зручны пад'езд…
Цяпер трэба шукаць штось іншае ці з гасцямі сустракацца дома. Дзе — ну напэўна ж — не заўсёды атрымаецца «укусна», але дзе, дакладна, за намі не будуць назіраць. А галоўнае — нам, за нашы ж грошы, аніхто, дасць Бог, не будзе псаваць настрою.
Валянціна Доўнар
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.