Выдаткі на камандзіроўкі не будуць абкладацца падаходным падаткам
21 ліпеня Прэзідэнт падпісаў Указ № 361 «Аб асобных пытаннях падаткаабкладання, бухгалтарскага ўліку, пераацэнкі маёмасці і спагнання арэнднай платы». Прэс-служба кіраўніка дзяржавы паведамляе, што дакумент падрыхтаваны ў мэтах рэалізацыі шэрагу законаў. Некаторыя нормы ўказа пракаментаваў «Звяздзе» старшыня прэзідыума Рэспубліканскай канфедэрацыі прадпрымальніцтва Уладзімір Карагін.
Давёў да ладу — не плаці
Указам прадугледжана, што дадаткова арэндная плата будзе спаганяцца з юрыдычных асоб і індывідуальных прадпрымальнікаў — плацельшчыкаў падаткаў па спрошчанай сістэме падаткаабкладання за зямельныя ўчасткі, якія выкарыстоўваюцца не па мэтавым прызначэнні, не выкарыстоўваюцца на працягу тэрмінаў, вызначаных заканадаўчымі актамі, і занятыя да афармлення правазасведчвальных дакументаў. Па словах Уладзіміра Карагіна, гэты захад правільны: «Цяпер проста не будзе магчымасцяў для хітруноў, якія зацягваюць тэрміны будаўніцтва, займаюць залішнія плошчы і г. д.».
У той жа час не будуць спаганяць арэндную плату за наступныя зямельныя ўчасткі: занятыя нерухомымі матэрыяльнымі гісторыка-культурнымі каштоўнасцямі, пры ўмове выканання іх уласнікамі абавязацельстваў, абу-
моўленых заканадаўствам аб ахове гісторыка-культурнай спадчыны; прадастаўленыя для будаўніцтва аб'ектаў, прадугледжаных інвестыцыйным дагаворам, заключаным паміж інвестарам і Рэспублікай Беларусь, а таксама для іх абслугоўвання, калі раней такія ўчасткі былі прадстаўлены для мэт названага будаўніцтва; прадастаўленыя камунальным унітарным прадпрыемствам па капітальным будаўніцтве абласных, Мінскага гарадскога выканаўчых камітэтаў, іншым дзяржаўным арганізацыям з доляй дзяржавы ў статутным фондзе больш за 50% для будаўніцтва і (або) абслугоўвання аднакватэрных, блакіраваных і шматкватэрных жылых дамоў па дзяржаўным заказе; прадастаўленыя Нацыянальнаму алімпійскаму камітэту; канфіскаваныя з земляў ляснога фонду для пашырэння на вышыню драўнінна-хмызняковай расліннасці прасек паветраных ліній электраперадачы. «У аднаўленчыя работы, калі прадпрымальнік бярэ нерухомасць, якая з'яўляецца гістарычнай каштоўнасцю, трэба ўкладваць вялікія грошы. Цяпер можна не спаганяць арэндную плату з зямельнага ўчастка, занятага важнымі гістарычнымі аб'ектамі. Гэта вельмі дапаможа прадпрымальнікам, якія добрасумленна ставяцца да сваіх абавязкаў і прыводзяць да ладу падобныя аб'екты», — лічыць кіраўнік РКП.
Каб не было «падатку на паветра»
Акрамя таго, нормамі ўказа прадугледжваецца: вызваліць ад падаходнага падатку пацверджаныя расходы па найме жылога памяшкання пры аплаце наймальнікам работніку выдаткаў па камандзіроўках, а таксама непацверджаныя выдаткі ў межах нормаў, вызначаных заканадаўствам; вызваліць суды, як і дзяржаўныя органы, ад падаткаў, збораў (пошлін) пры атрыманні сродкаў, у тым ліку ад здачы ў арэнду памяшканняў, пры ўмове пералічэння гэтых сродкаў у поўным аб'ёме ў бюджэт; абавязаць замежныя арганізацыі, якія ажыццяўляюць прадпрымальніцкую дзейнасць на тэрыторыі Рэспублікі Беларусь і стаяць на падатковым уліку без адкрыцця прадстаўніцтва, выкананне заканадаўства Рэспублікі Беларусь аб бухгалтарскім уліку і справаздачнасці; вызначыць у 2014 годзе адтэрміноўку на 90 дзён права на вылік увазнога ПДВ для арганізацый, якія імпартуюць і рэалізуюць тавары ў нязменным стане. Уладзімір Карагін адзначыў тут некалькі нормаў. Па-першае, наконт вызвалення ад падатку расходаў на найм жылога памяшкання: «Раней атрымлівалася, што чалавек, за якога заплаціла фірма, павінен быў выплаціць 12% падаходнага падатку. Аднак ён жа не атрымліваў ніякага даходу, а толькі кампенсацыю выдаткаў за найм жылога памяшкання. Прэзідэнт выслухаў меркаванне бізнесу і ліквідаваў гэтую недарэчнасць».
Вельмі слушным стаў дазвол не плаціць падаткаў пры здачы дзяржаўнай маёмасці. «Праведзена аптымізацыя дзяржаўных органаў — узніклі лішкі памяшканняў. І цяпер яны здаюцца ў арэнду. Аднак усе гэтыя грошы пойдуць у бюджэт. Ніхто на іх нажывацца не будзе», — рэзюмаваў кіраўнік РКП.
Дакумент таксама вызначае парадак: пераацэнкі маёмасці ў замежнай валюце індывідуальнымі прадпрымальнікамі; адлюстравання ў бухгалтарскім уліку курсавых розніц, якія ўзнікаюць у арганізацый пры пераліку ў выяўленай замежнай валюце кошту актываў на 31 снежня 2014 г.; вызначэння падатковай базы падатку на прыбытак арганізацыямі, якія перайшлі са спрошчанай сістэмы падаткаабкладання на адзіны падатак на патэнцыйны прыбытак.
«У цэлым гэты ўказ вельмі пазітыўны. Ён рэалізуе шэраг прапаноў дзелавой супольнасці і дазволіць весці дзелавыя аперацыі больш ясна, зразумела і прагназавана», — падкрэсліў Уладзімір Карагін.
Уладзіслаў КУЛЕЦКІ
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.