Толькі за паўгода канфіскавана больш за 50 кг наркотыкаў і псіхатропаў
Паводле інфармацыі ўпраўлення па наркакантролю і супрацьдзеянні гандлю людзьмі МУС Беларусі, за 6 месяцаў гэтага года ў нашай краіне зарэгістравана звыш трох з паловай тысяч нарказлачынстваў. Больш за 97 працэнтаў з іх непасрэдна звязаныя з незаконным абарачэннем наркотыкаў. З нелегальнага абароту канфіскавана звыш 22 кг наркатычных сродкаў і каля 30 кг псіхатропных рэчываў.
Асноўная маса наркотыкаў па-ранейшаму паступае ў нашу краіну з-за мяжы. Нелегальныя пастаўкі ажыццяўляюць міжнародныя арганізаваныя злачынныя групы, выкарыстоўваючы складаныя схемы, кур'ераў, транспарт са схованкамі. У гэтым годзе ўжо перакрыты 21 канал транзіту і паставак дурману. Праз тэрыторыю Беларусі ажыццяўлялася кантрабанда амфетаміну, марыхуаны і гашышу ў Расійскую Федэрацыю з краін Еўрасаюза. Асноўнай краінай-пастаўшчыком наркотыкаў і псіхатропаў у нашу краіну непасрэдна для ўнутранага збыту па-ранейшаму з'яўляецца Расія, з тэрыторыі якой увозяцца не толькі «традыцыйныя» для гэтага рэгіёна гераін і метадон, але таксама гашыш, амфетамін і іншыя псіхатропныя рэчывы новага пакалення, якія раней актыўна пастаўляліся з Прыбалтыкі і Польшчы.
Так, у адным з дамоў па вул. Кальцова ў Мінску барцы з нарказлачыннасцю з Першамайскага РУУС сумесна з супрацоўнікамі спецпадраздзялення па барацьбе з тэрарызмам «Алмаз» падчас правядзення аператыўна-вышуковых мерапрыемстваў па спыненні канала пастаўкі наркатычных сродкаў з Расіі ў Беларусь затрымалі 24-гадовага мінчаніна. У яго было знойдзена і канфіскавана 360 г гашышу. Цяпер маладому чалавеку пагражае да 13 гадоў пазбаўлення волі.
А ў канцы чэрвеня супрацоўнікі ўпраўлення па наркакантролі і супрацьдзеянні гандлю людзьмі УУС Віцебскага аблвыканкама ў ходзе правядзення аператыўна-
вышуковых мерапрыемстваў па перакрыцці канала пастаўкі наркатычных сродкаў з Пскова (Расійская Федэрацыя) затрымалі ў Віцебску грамадзяніна 1978 г.н. Пры асабістым вобыску ў яго выявілі 0,43 г амфетаміну. Яшчэ 800 г псіхаактыўных рэчываў мужчына захоўваў у сябе дома.
Усё часцей наркадзялкі спрабуюць арганізаваць нелегальную вытворчасць наркотыкаў і псіхатропаў непасрэдна ў Беларусі. Сёлета супрацоўнікамі органаў унутраных спраў спынена дзейнасць 11 падпольных наркалабараторый, выяўлена 7 памяшканняў, спецыяльна прыстасаваных для вырошчвання наркатычных раслін.
У пачатку сакавіка 2014 года за незаконнае абарачэнне наркотыкаў было заведзена адразу некалькі крымінальных спраў у дачыненні да жыхара Мінска. Супрацоўнікі наркакантролю Ленінскага РУУС сталіцы ва ўзаемадзеянні з калегамі з ГУУС і СПБТ «Алмаз» у арандаванай ім кватэры знайшлі 5 кг «спайсу», 100 г парашку, які змяшчае асабліва небяспечны псіхатроп «Альфа-PVP», 6500 так званых «марак». Літаральна на наступны дзень у гаражы, які арандаваў наркадзялок, ахоўнікі правапарадку выявілі яшчэ 3 кг курыльнай сумесі, 100 г парашку з «Альфа-PVP», 60 кг расліннага рэчыва, якое выкарыстоўваецца ў якасці асновы для вырабу «спайсу», а таксама лабараторнае абсталяванне.
З мэтай недапушчэння распаўсюджвання наркатычнай сыравіннай базы расліннага паходжання МУС штогод праводзіць спецыяльную праграму «Мак», падчас якой вядзецца праца па выяўленні і знішчэнні пасеваў раслін маку і канопляў.
У чэрвені гэтага года ў рамках рэалізацыі спецпраграмы «Мак» знішчана больш за 66 тон раслін, у састаў якіх уваходзяць наркотыкі, на плошчы каля 36 га.
За парушэнне патрабаванняў Дэкрэта «Аб некаторых пытаннях дзяржаўнага рэгулявання абарачэння насення маку» сёлета складзена 98 адміністрацыйных пратаколаў у дачыненні да 83 асоб. З незаконнага абарачэння канфіскавана звыш 39 тон гэтага прадукту, накладзена штрафаў на суму 745 мільёнаў беларускіх рублёў, канфіскавана 6 аўтамабіляў, на 12 аўто накладзены арышт.
У Міністэрстве ўнутраных спраў занепакоены ростам колькасці нарказлачынстваў, якія здзяйсняюцца з удзелам непаўналетніх. За 6 месяцаў гэтага года выяўлена 210 такіх злачынстваў, што ў пяць разоў больш за аналагічны перыяд мінулага года.
Цяпер каля 70 працэнтаў канфіскаваных рэчываў складаюць курыльныя сумесі. Амаль усе яны маюць у саставе псіхатропныя рэчывы, пераважная большасць з якіх забаронена да свабоднага абарачэння на тэрыторыі Беларусі.
У 2014 годзе пералік наркатычных сродкаў, псіхатропных рэчываў і іх прэкурсораў, якія падлягаюць дзяржаўнаму кантролю ў Беларусі, дапоўнены 68 новымі псіхатропнымі рэчывамі. Акрамя таго, у чэрвені гэтага года ў Міністэрства аховы здароўя накіравана прапанова аб уключэнні ў названы пералік яшчэ 8 новых псіхатропных рэчываў.
У МУС упэўнены, што такія захады дадуць магчымасць у перспектыве істотна аздаравіць наркасітуацыю ў Беларусі.
Вольга ЧАМКО
Канцэрт для дзяцей і моладзі, пластычны спектакль Ягора Дружыніна і «Рок-панарама».