На Магілёўшчыне спраўлялі зажынкі і віншавалі першых у краіне «тысячнікаў» па рапсе
Рэкордных вынікаў дабіўся знакаміты па мінулых уборачных сямейны экіпаж камбайнераў агракамбіната «Зара» — бацька і сын Уладзіміры Корсакі. Яны намалацілі першыя 1076 тон рапсу. Але перад тым, як наведацца ў гэтую гаспадарку, губернатар вобласці Пётр Руднік разам з прадстаўнікамі мясцовай улады і кіраўніцтвам прафсаюза АПК завітаў у Шклоўскі раён, каб прыняць удзел у зажынках і павіншаваць яшчэ адных перадавікоў жніва — з ААТ «Александрыйскае». Ударнікі атрымалі падарункі, а іх тэхніку ўпрыгожылі сцяжкі і зорачкі лідараў, каб іншыя бачылі, на каго раўняцца.
Кожная хвіліна на ўліку
У былыя часы лічылася: як правядзеш зажынкі, такі збярэш і ўраджай. Свята не абыходзілася без песняў і народных гульняў, а вось жніво пачыналася на наступны дзень. На Магілёўшчыне зрабілі адступленне ад сцэнарыя. Цяпер кожная хвіліна на ўліку, і зажынкі ў Шклоўскім раёне адзначалі проста ў полі. Дзякуй начальніку аддзела ідэалагічнай работы, культуры і па справах моладзі Шклоўскага райвыканкама Сяргею Артамонаву, які дапамог карэспандэнту «Звязды» дабрацца да месца. Ад паху духмяных караваяў, якія ляжалі на заднім сядзенні яго машыны, кружылася галава. Па традыцыі іх пякуць яшчэ з леташняга ўраджаю, каб новы быў не горшым.
Яшчэ на пад'ездзе да вёскі Калінаўка было відаць, як кіпіць праца на калгасных палетках. Падтрымаць баявы дух салдат жніва прыехалі артысты шклоўскага ансамбля народнай песні і танца «Бліскавіца». Гукарэжысёр, які настройваў апаратуру ў палявых умовах, імкнуўся перакрычаць тарахценне камбайнаў.
Дзяўчаты ў традыцыйных строях з вяночкамі на галаве раскладвалі прывезеныя караваі на ручніках. На свята, акрамя тысячнікаў, былі запрошаны кіраўнікі ўсіх сельгасгаспадарак раёна.
Шклоўскі раён у вобласці адзін з валаўтваральных па зборы збожжа, а ААТ «Александрыйскае» — адно з перадавых. Героямі дня сталі яго першыя тысячнікі — камбайнеры Вячаслаў Карповіч і Мікалай Рабцаў, а таксама кіроўца Яўген Васільеў.
— Па праваслаўнай традыцыі любая добрая справа пачынаецца з благаславення, — пачаў з малітвы айцец Андрэй. Ён пажадаў сабраць годны ўраджай і акрапіў усіх святой вадой.
Тысячнікам спявалі прыгожыя песні, казалі словы ўдзячнасці і ўручалі падарункі. «Спадзяюся, што і далей ваша праца будзе такой жа плённай, — адзначыў Пётр Руднік падчас віншавання. — Але спаборніцтвы ўжо на старце паказваюць, што атрымаць жоўтую майку лідара будзе не так проста».
— За 5 гадоў сваёй працы ў гаспадарцы я ўпершыню трапіў у лідары, — дзяліўся з журналістамі пасля афіцыйнай часткі вадзіцель гаспадаркі Яўген Васільеў. — Каб дабіцца поспеху, трэба не ленавацца і працаваць больш, чым астатнія. Асабіста я на полі з 6 раніцы і да ночы.
Першыя па рапсе
Тое, што хлебаробы магілёўскага агракамбіната «Зара» першымі ў краіне пераадолелі тысячны рубеж па намалоце насення рапсу, — таксама паказальны вынік. Прычым услед за першым экіпажам двух Уладзіміраў Корсакаў тысячны рубеж узяў яшчэ адзіны сямейны экіпаж у складзе Уладзіміра і Дзмітрыя Мельнікавых.
— Гэта сведчыць, што тэмпы ўборкі пайшлі ўгору, — радуецца губернатар. — Да канца ўборачнай павінен быць больш важкі вынік, добра калі да першай тысячы нашы пераможцы дададуць яшчэ па 4–5 тысяч.
Дарэчы, калі ў вобласці самая высокая ўраджайнасць па збожжавых менавіта ў ААТ «Александрыйскае» (54,1 ц/га), то па рапсе адзін з лідараў — магілёўскі агракамбінат «Зара» (43 ц/га).
— Ураджай вельмі добры, — усміхаецца Уладзімір Корсак-старэйшы. — Яшчэ дзень-два — і можна будзе пераключацца на збожжавыя. Цяжка, але настрой баявы. А 5‑й раніцы ўжо на полі. Жонка таксама падтрымлівае, смачныя абеды гатуе. Праблем з харчаваннем на полі няма, кормяць па поўнай праграме. Але ж ежа з дому, прыгатаваная з любоўю, — зусім іншая справа.
Не той хлеб, што на полі, а той, што ў гумне
«Толькі за кошт сучасных тэхналогій, новых падыходаў, правільнай арганізацыі працы, за кошт дысцыпліны і парадку можна дамагчыся добрага ўраджаю, — казаў губернатар журналістам. — Перад хлебаробамі стаіць задача ўбраць увесь хлеб, які сёння ў полі, да зярнятка. Без гэтага не будзе ні малака, ні мяса».
Вялікія спадзяванні кіраўнік вобласці ўскладае на сістэму «кропкавага» земляробства. Сёлета 5 гаспадарак Магілёўшчыны ўкараняюць гэты пакуль яшчэ новы метад. «Ён дазваляе эканоміць мільярды рублёў на адных толькі мінеральных угнаеннях і работах па доглядзе, — падкрэсліў губернатар. — Мінус толькі ў тым, што тэхніка, якая для гэтага патрэбна, каштуе вельмі дорага. Але цяпер вядуцца перамовы аб тым, каб яе вырабляць у нас».
На пытанне, якія вынікі ўборачнай можна чакаць, кіраўнік вобласці пакуль адказвае: не той хлеб, што на полі, а той, што ў гумне. Але тое, што мільённая мяжа будзе пераадолена — гэта адназначна.
Пётр Руднік паставіў перад аграрыямі Магілёўшчыны задачу сабраць хлеб да 15 жніўня. Кожны наступны дзень будзе прыносіць толькі страты, папярэдзіў ён.
Журналісты папрасілі губернатара пракаментаваць тыя сігналы, якія датычацца дэфіцыту гаруча-змазачных матэрыялаў у некаторых гаспадарках. «Усе пытанні па пастаўцы паліва былі вырашаны яшчэ да пачатку ўборачнай, — адказаў ён. — Праблема гаруча-змазачных матэрыялаў узнікае тады, калі на месцах няма добрай арганізацыі працы. На той выпадак, калі не хапае сродкаў, існуе дамоўленасць з прадпрыемствамі аблнафтапрадукта, якія пад гарантыі райвыканкамаў адпускаць паліва. Кожнай вобласці ў пачатку ўборачнай было выдзелена па 50 мільярдаў рублёў. Акрамя гэтага, абласны бюджэт штодня пералічвае на паліва ад 2 да 4 мільярдаў. Трэба не чакаць маны нябеснай, а самім вучыцца зарабляць грошы. Кіраўнік дзяржавы не раз казаў пра тое, што ў сяло ўкладзена шмат грошай. Павінна быць нейкая аддача. Вось у «Зары» ўраджайнасць рапсу 43 ц/га, а па вобласці толькі трохі больш за 20. Гэта сведчыць аб тым, што ў агракамбінаце ўмеюць працаваць з гэтай культурай. І — у прыбытку».
Нэлі ЗІГУЛЯ.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.