Матчы кубка краіны па футболе, паражэнне хакейнага «Дынама» і сярэбраная ўзнагарода беларуса на кантынентальным чэмпіянаце па стральбе з лука. «Звязда» падводзіць вынікі спартыўных падзей, якія адбыліся на гэтых выхадных.
1. Хакейнае «Дынама», якое рыхтуецца да чарговага сезона ў кантынентальнай хакейнай лізе, саступіла ў першым спарынгу ў падрыхтоўцы да чэмпіянату. На «Мінск-Арэне» сталічная лядовая дружына саступіла піцерскаму СКА 0:3. Вынік, безумоўна, не самы лепшы, але гэта толькі першы матч у міжсезонні. «Я не магу паскардзіцца на адсутнасць настрою ў нашых хлопцаў, — рэзюмаваў паядынак Любамір Покавіч, галоўны трэнер «Дынама». — Хіба што крыху «падселі» пасля другой шайбы. Так, свісток суддзі прагучаў, але мы вучым гульцоў, каб яны абвастралі абстаноўку да апошняга. Але гэта, безумоўна, не апраўданне. Сапернікі выкарысталі свае шанцы, а мы — не». Нагадаем, што «зубры» выйшлі з адпачынку 11 ліпеня, а ў нядзелю адправіліся на двухтыднёвыя зборы ў чэшскае мястэчка Краварж. За гэты час мінчане мусяць правесці тры трэніровачныя матчы: з браціслаўскім «Слованам», тршынецкім «Оцэларжы» і «Аламоўцам».
2. Пераходзім ад хакея да айчыннага футбола. На выхадных адбыліся паядынкі 1/16 кубка краіны. Не абышлося і без сенсацый. Першалігавая «Гарадзея» па пенальці (5:4) перамагла жодзінскі «Тарпеда-БелАЗ», а «Зорка-БДУ» была мацнейшай за «Мінск» (1:0). Астатнія матчы прынеслі наступныя вынікі: «Ліда» — «Слуцк» — 0:1, «Хімік» (Светлагорск) — «Гомель» — 1:2, «Баранавічы» — «Дынама» (Брэст) — 1:2, «Хваля» (Пінск) — «Іслач (Мінскі раён) — 2:4, «Ждановічы» (Мінскі раён) — «Нафтан» (Наваполацк) — 0:4, «Гомельчыгунтранс» — «Славія» (Мазыр) — 2:1, «Смаргонь» — «Дняпро» (Магілёў) — 0:2, ФСК «Гродзенскі» — «Белшына» (Бабруйск) — 1:4, «Граніт» (Мікашэвічы) — «Рэчыца-2014» — 1:0, «Партызан-2002» (Мінск) — «Віцебск» — 1:3.
3. Беларускі лучнік Антон Прылепаў заваяваў сярэбраныя ўзнагароды на чэмпіянаце Еўропы, які прайшоў у армянскім Эчміядзіне. У фінальным паядынку беларус саступіў нямецкаму спартсмену Фларыяну Кахлунду. Акрамя таго, Антон паклаў у сваю скарбонку яшчэ і бронзавую ўзнагароду. Трэцяе месца ў змешаных спаборніцтвах ён заняў разам з Аленай Толкач.
4. Хутчэй за ўсё, у новым сезоне за жаночую зборную Беларусі па біятлоне будзе выступаць расіянка Ульяна Дзянісава. Яна ўжо паспела прайсці збор з нашай камандай і трэнерамі цяпер засталося прыняць канчатковае рашэнне.
5. Вікторыя Азаранка па-ранейшаму займае 10-ы радок у Жаночай тэніснай асацыяцыі. У абноўленым спісе лідзіруе Серэна Уільямс, на другім месцы знаходзіцца кітаянка Лі На, а на трэцім радку — румынка Сімона Халеп.
Тарас ШЧЫРЫ
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.