У Мінску ўшанавалі памяць герояў і ахвяр Першай сусветнай вайны
Стагоддзе таму свет упершыню скалануўся ад катастрофы сусветнага маштабу. У жніўні 1914 года практычна ўсе вядучыя дзяржавы аказаліся ўцягнутымі ў Першую сусветную вайну. Баявыя дзеянні працягваліся 1568 дзён і начэй. Полымя вайны закранула і Беларусь. Падчас мітынгу-рэквіему каля мемарыяла ў гонар герояў і ахвяр Першай сусветнай вайны мінчане ўшанавалі памяць тых, хто загінуў у гады ваеннага ліхалецця.
— З ваеннага пункту гледжання гэтая вайна, па сутнасці, стала першай, у якой для знішчэння і разбурэння актыўна выкарыстоўваліся найноўшыя дасягненні навукова-тэхнічнага прагрэсу таго часу — танкі і самалёты, падводныя лодкі і хімічная зброя, сродкі супрацьпаветранай абароны і радыёэлектроннай барацьбы, — зазначыў міністр абароны генерал-лейтэнант Юрый ЖАДОБІН. — З палітычнага пункту гледжання Першая сусветная вайна прывяла да распаду трох наймагутнейшых еўрапейскіх імперый: Германскай, Расійскай і Аўстра-Венгерскай, а таксама паслужыла пачаткам распаду Асманскай імперыі. Аднак сёння не нагода даваць гэтай вайне пэўныя палітычныя, гістарычныя і ваенныя адзнакі. Сёння — нагода напомніць сусветнай грамадскасці, наколькі кволым і нетрывалым бывае мір, як хутка квітнеючыя палі і сады могуць ператварыцца ў крывавае поле бітвы. Нагода ўспомніць тых, хто менш за ўсё задумваўся аб прычынах вайны, але самааддана ішоў на перадавую, каб абараніць ад ворага сваю Айчыну.
Сімвалічна, што мемарыял знаходзіцца на месцы Мінскіх брацкіх могілак, на якіх пахаваны вайскоўцы рускай арміі. Тут спачываюць 5 тысяч салдат — прадстаўнікоў 830 вайсковых фарміраванняў, якія памерлі ад раненняў у мінскіх лазарэтах, шпіталях і бальніцах. Імёны амаль паловы з іх сёння вядомыя. Яны ўвекавечаны на скульптурных кампазіцыях каля капліцы. Другая палова так і засталася безыменнай, але не забытай намі.
— Дрэнна, што з урокаў Першай сусветнай вайны не было зроблена высноў, і ў выніку палітычных амбіцый, сусветнай гонкі ўзбраенняў праз два дзесяцігоддзі пачалася Другая сусветная вайна, наступствы якой яшчэ больш жудасныя, — падкрэсліў пасол Расіі ў Беларусі Аляксандр СУРЫКАЎ. — І сёння ў свеце неспакойна. Гінуць людзі ў барацьбе за дэмакратыю і правы чалавека. Якую ж жорсткую цану трэба плаціць за гэтыя правы! І сённяшнім мерапрыемствам мы хочам яшчэ раз нагадаць, што гэта не разбор паміж пераможцамі і пераможанымі, а даніна памяці нашым прадзедам, якія быццам нагадваюць нам аб тым, што трэба спыніць палітычныя прэтэнзіі на тым узроўні, калі яшчэ можна дамовіцца, каб не давесці да такіх вынікаў.
А тым часам у гэтыя дні не толькі ў беларускай сталіцы, а і па ўсёй краіне праходзяць шматлікія памятныя мерапрыемствы, прысвечаныя 100‑годдзю пачатку Першай сусветнай вайны. У храмах право-
дзяцца памінальныя богаслужэнні, ля мемарыялаў і помнікаў ускладаюцца вянкі і кветкі, ва ўстановах культуры і адукацыі, у дзіцячых і аздараўленчых летніках адбываюцца тэматычныя гадзіны, арганізуюцца выставы і экспазіцыі, прысвечаныя подзвігу салдат той вайны. Гэта сведчыць толькі аб тым, што беларусы заўсёды памятаюць трагічныя старонкі нашай гісторыі, яе герояў, якія навек засталіся ў беларускай зямлі.
Вераніка КАНЮТА.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.