Пісьменнікі, што збіраюць камяні ды ракавінкі, музыкі, якія любяць корпацца ў агародзе... У тых, пра каго піша «Маладосць», таксама лета! А таму жнівеньскі нумар атрымаўся асабліва сонечным і настраёвым. У якасці пацвярджэння яго сонечнасці прывядзём радкі Ірыны Чарняўскай, аднаго з аўтараў:
Лету не спіцца:
Лета знарок
Грэецца, нібы прас.
Шчокі суніцам
Чэрвень апёк —
Папрыгажэлі ўраз!
Кожны год адбываецца падзея, якую «Маладосць» ніяк не можа абмінуць. Паўтысячагоддзя таму ў жніўні геніяльны Францішак Скарына, гонар беларускай нацыі, выдаў сваю першую кнігу. Беларусы штогод ушаноўваюць гэтую падзею, святкуючы Дзень беларускага пісьменства. Восьмы нумар «Маладосці» пачынаецца з матэрыялаў, прысвечаных святу. Тут вы знойдзеце пераклады паэзіі замежных гасцей Дня беларускага пісьменства з розных краін.
У рубрыцы «Упершыню ў «Маладосці» публікуюцца пакуль яшчэ сціплыя, але, безумоўна, таленавітыя празаікі Даша Марозава і Мікіта Волкаў, а таксама і паэт Цімур Буйко. Знаёмцеся з імі і не судзіце надта строга! А вось з каго ў восьмым нумары складаецца сузор'е ўжо даўно заўважаных і адзначаных на літаратурнай ніве: паэты Віктар Шніп, Аліса Мініна, Ірына Чарняўская і празаікі Уладзімір Мажылоўскі ды Алёна Беланожка. Нешта асаблівае чакае вас на «Старонцы аднаго верша»: «Віленскі лямант» айца Яўстафія Халіманкова — шчымлівы лірычны твор пра незваротнасць таго, што ўкраў бязлітасны час...
У рубрыцы «Эпісталярый» змешчаны лісты Лявона Гмырака ў рэдакцыю «Нашай нівы», якія нідзе дагэтуль не друкаваліся, — каштоўны помнік тагачаснай думкі і мовы.
Сярод публіцыстычных матэрылаў хочацца адзначыць інтэрв'ю з паэткай Людмілай Рублеўскай у рубрыцы «Кухня Машы Дуброўскай», артыкул Ягора Конева пра вядомага беларускага тэатральнага рэжысёра Валерыя Анісенку, а таксама нясумную гутарку з маладым спеваком Уладзіславам Чыжыкавым, які ўдала спалучае эстрадную дзейнасць з вучобай на філфаку.
У рубрыцы «ГістфакТ» працягваецца публікацыя ўспамінаў філамата Эдварда Масальскага, сведкі бурных гістарычных падзей ХІХ стагоддзя. Спадзяюся, вы пазнаёміліся з імі ў папярэдніх нумарах «Маладосці» і паспелі імі захапіцца.
Чытайце «Маладосць» і ўсміхайцеся сонцу!
Тамара Сарачынская.
Мерапрыемства праводзіцца на добраахвотнай аснове.
Не выявіць ні секунды абыякавасці.