Як падмурак для ўмацавання супрацоўніцтва нашай краіны з рэгіёнамі Расіі
Беларусь і Тамбоўская вобласць дамовіліся ўзмацніць усебаковае ўзаемадзеянне. Пра гэта было заяўлена ўчора на сустрэчы Прэзідэнта Беларусі Аляксандра Лукашэнкі з кіраўніком Адміністрацыі Тамбоўскай вобласці Расійскай Федэрацыі Алегам Беціным, паведамілі ў прэс-службе беларускага лідара.
1
Аляксандр Лукашэнка падкрэсліў, што Тамбоўская вобласць з'яўляецца надзейным партнёрам Беларусі. За мінулыя пяць гадоў узаемны таваразварот вырас больш як у два разы. У гэтым расійскім рэгіёне ўжо арганізаваны дылерскія і сэрвісныя цэнтры «Гомсельмаша», «Амкадора», МТЗ і іншых буйных беларускіх вытворцаў, паспяхова функцыянуюць фірменныя гандлёвыя дамы вядомых гандлёвых марак.
Кіраўнік дзяржавы адзначыў, што Беларусь гатова пашырыць супрацоўніцтва з гэтым расійскім рэгіёнам, напрыклад, удзельнічаць у мадэрнізацыі аграпрамысловага комплексу Тамбоўскай вобласці. «Адна з ключавых тэм нашай сённяшняй сустрэчы — супрацоўніцтва ў аграпрамысловым комплексе. Агульны інтарэс выклікаюць абмен перадавымі тэхналогіямі, развіццё ўзаемадзеяння паміж вучонымі і аграрыямі», — сказаў беларускі лідар.
Прэзідэнт падкрэсліў, што ў Беларусі ёсць фундаментальная даследчая база, і прапанаваў вучоным сумесна папрацаваць у галіне селекцыі, генетыкі, аховы раслін, стварэння высокапрадукцыйных сартоў сельгаскультур, парод жывёл, а таксама рэсурсазберагальных тэхналогій. «Мы гатовы прыняць удзел у мадэрнізацыі вашых жывёлагадоўчых комплексаў і, калі трэба, будаўніцтве аграгарадкоў, гатовы забяспечыць самай перадавой сельскагаспадарчай тэхнікай», — сказаў Аляксандр Лукашэнка.
Беларусь гатова супрацоўнічаць з Тамбоўскай вобласцю ў пытанні паставак аўтобусаў і тралейбусаў, прадастаўленні будаўнічых паслуг, забеспячэнні патрэбнасцяў рэгіёна ў грузавой, кар'ернай, дарожна-будаўнічай, спецыяльнай і камунальнай тэхніцы, ліфтавым абсталяванні.
«У апошнія гады наша рэспубліка вядзе актыўную работу па павышэнні інвестыцыйнай прывабнасці, па стварэнні інавацыйных прадуктаў, арыентаваных на экспарт. І ў гэтым напрамку мы таксама гатовы ўмацоўваць супрацоўніцтва з вамі. Нам ёсць што прапанаваць у сферы адукацыі, медыцыны, культуры, спорту, турызму», — заявіў кіраўнік дзяржавы.
Напярэдадні першага пасяджэння рабочай групы па супрацоўніцтве Беларусі і Тамбоўскай вобласці Аляксандр Лукашэнка прапанаваў абмеркаваць і па магчымасці вырашыць праблемныя пытанні, якія перашкаджаюць больш актыўнаму развіццю двухбаковага ўзаемадзеяння. «Вы павінны быць упэўнены, што калі нашы дамоўленасці адбудуцца, мы будзем надзейным партнёрам, як і для іншых рэгіёнаў Расіі. Мы абавязкова будзем выконваць нашы дамоўленасці», — дадаў Прэзідэнт.
У сваю чаргу Алег Бецін паведаміў, што Тамбоўская вобласць прапануе Беларусі стварыць сумеснае прадпрыемства ў хімічнай прамысловасці. «У нас ёсць хімічнае прадпрыемства ААТ «Пігмент», якое пастаўляе ў Беларусь больш як 10 тыс. тон хімікатаў у год для прадпрыемстваў, і можна было б стварыць сумесную вытворчасць», — прапанаваў кіраўнік Адміністрацыі Тамбоўскай вобласці. Алег Бецін адзначыў, што некаторыя прадукты вырабляюцца толькі для Беларусі. «Мы гатовы гэтыя плошчы, цэхі прадаставіць пад сумеснае прадпрыемства, каб не праводзіць таргі, каб загадзя была відаць перспектыва. Колькі трэба пад патрэбнасць, столькі і будзем рабіць», — сказаў ён.
Тамбоўская вобласць таксама зацікаўлена ў супрацоўніцтве з Беларуссю і па іншых напрамках. У прыватнасці, Алег Бецін прапанаваў прапрацаваць пытанне аб стварэнні сумеснага прадпрыемства па вытворчасці будаўнічых кранаў. Яшчэ адна магчымасць, паводле яго слоў, для развіцця ўзаемавыгаднай кааперацыі — вытворчасць абутку. «У нас ёсць прадпрыемства, якое робіць спецабутак для ваенных і іншых структур, а канструктыўныя элементы вырабляюцца ў Беларусі», — адзначыў кіраўнік Адміністрацыі Тамбоўскай вобласці.
Аляксандр Лукашэнка адзначыў, што Беларусь вельмі цэніць супрацоўніцтва з Тамбоўскай вобласцю. «І нам вельмі важна з тэрыторыі вашай вобласці працаваць з іншымі расійскімі рэгіёнамі, што, напэўна, і адбываецца, асабліва пры наяўнасці ўжо існуючых дылерскіх цэнтраў», — падкрэсліў Прэзідэнт.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».