Існуе меркаванне, што ўсе пуцёўкі ў беларускія санаторыі загадзя скупляюць расіяне, а беларусам трапіць летам у санаторый цяжка. Ці так гэта, а таксама як адпачыць і аздаравіцца, не выязджаючы з Беларусі, і аб кошце такога адпачынку нам расказаў дырэктар Рэспубліканскага цэнтра па аздараўленні і санаторна-курортным лячэнні насельніцтва Генадзь Балбатоўскі.
Наш суразмоўца не лічыць, што асноўную колькасць тых, хто адпачывае ў нашых санаторыях, складаюць расіяне. «За год у нашых санаторных установах аздараўляюцца больш за 1,3 млн грамадзян — і гэтая лічба стабільная ўжо на працягу трох апошніх гадоў, — кажа Генадзь Балбатоўскі. — Па выніках мінулага года з гэтых 1,3 млн чалавек колькасць іншаземцаў склала 234 тысячы. З іх каля 80% расіян — гэта дзесьці каля 188 тысяч. Калі браць свабодную рэалізацыю пуцёвак, то ўсяго за наяўны разлік фізічным і юрыдычным асобам было прададзена 567 тысяч пуцёвак. Так што нават у вольным продажы доля замежнікаў складае ўсяго 40%».
У цэлым, каб патрапіць у санаторый летам, трэба пачынаць думаць пра гэта яшчэ зімой, упэўнены наш суразмоўца. Сёння ўсе месцы ў нашых санаторыях запоўнены, на жнівень таксама ўжо забраніраваны, пуцёўкі можна набыць толькі на кастрычнік-лістапад.
Чым яны прыцягваюць?
Чытаем водгукі тых, хто адпачыў у нашых санаторыях. Вось тыповы:
«Нядрэнная лячэбная база, чыстая акуратная тэрыторыя, усё карпусы аб'яднаны пераходамі (не такі ўжо і лабірынт, на другі дзень разабраліся), вялікі басейн. Аб'ём працэдур дастатковы, каб два тыдні не сумаваць — увесь дзень па іх бегаеш, з 8 да 16 гадзін, а ў вольны час вельмі прыемна пасядзець на лавачцы з кніжкай (ёсць бібліятэка). З недахопаў: нумарны фонд мае патрэбу ў рамонце. Добра, што было добрае надвор'е і ў нумары толькі начавалі…»
Яшчэ адзін: «Ад'язджаць не хацелася! Нас было трое дарослых і двое дзяцей. Прыехалі з Масквы на машыне, абед ужо скончыўся, але для нас усё роўна накрылі стол…
Увесь персанал, і медыцынскі, і абслуговы, вельмі добразычлівы. Калі камусьці здалося адваротнае, мабыць, самі былі няветлівымі. З мінусаў — якасць нумароў і матрацаў. Мы нічога шыкоўнага не чакалі, але ўсё ж… Некаторым не падабалася харчаванне, але нас яно задавальняла цалкам! У фітабары нерэальна смачныя кіслародныя кактэйлі на шыпшынніку і выдатныя свежаадціснутыя сокі (платна). Але ўсё гэта павінен прызначыць доктар. Вельмі спадабалася вада ў басейне — яна не хлараваная! Спадабаліся заняткі ЛФК…
Для дзяцей няма зусім нічога, нават пясочніцы. Затое можна гуляць у лесе і капаць пясок на беразе вадаёма. Тэрыторыя цудоўная. У возеры плаваюць качкі, лебедзі, бабры. Кажуць, што нават норку бачылі…»
Такім чынам… Чыстыя азёры і паветра, празрыстыя сасновыя бары з вялікай колькасцю ягад і грыбоў. Не трэба праходзіць акліматызацыю і занадта далёка ехаць. Як правіла, ветлівы персанал, добрая лячэбная база. Гэта, вядома, вельмі прывабныя моманты на карысць таго, каб правесці адпачынак у нашым санаторыі.
Але ёсць і нюансы. Так, на расійскіх сайтах можна ўбачыць папярэджанні накшталт такога: «Але калі, апроч прыгожых пейзажаў і прыязнага персаналу, для вас важны стан нумарнога фонду, развітасць інфраструктуры, наяўнасць дадатковых паслуг для баўлення вячэрняга вольнага часу і адпачынку з дзецьмі, то перш чым выбраць той ці іншы санаторый у Беларусі, чытайце водгукі іншых кліентаў. У любым выпадку, не трэба за нізкі кошт чакаць сучаснага ўзроўню сэрвісу. А вось калі для вас гэта не так важна і вы едзеце не весяліцца, а менавіта адпачыць і падлячыцца і хацелі б адпачыць «бюджэтна» — беларускія санаторыі могуць стаць цалкам прымальным варыянтам».
Што кажуць спецыялісты?
—Нашай асноўнай перавагай з'яўляецца медыцынскі складнік, — упэўнены дырэктар Рэспубліканскага цэнтра па аздараўленні і санаторна-курортным лячэнні насельніцтва. — Трэба абмяжоўваць паняцці «аздараўленне» і «санаторна-курортнае лячэнне». Апошняе — гэта ўжо від медыцынскай дапамогі, пераважна прыроднымі лячэбнымі фактарамі. І, па сутнасці, санаторый, які не валодае такімі фактарамі, не мае права ім называцца.
Сёння на тэрыторыі практычна ўсіх нашых санаторыяў ёсць свідравіны з мінеральнай вадой. Мы багатыя на прыродныя рэсурсы, якія дазваляюць лячыцца і ўмацоўваць здароўе. У санаторыях рэспублікі выкарыстоўваюцца лячэбныя гразі з пяці радовішчаў.
Безумоўна, у нас развіваецца і матэрыяльна-тэхнічная база. Для высокатэхналагічнага лячэння набываецца шмат новай апаратуры — у гэта ўкладваюцца значныя сродкі. Па выніках 2013 года, у нас на развіццё матэрыяльна-тэхнічнай базы было выдаткавана больш за 78 тысяч долараў у эквіваленце — гэта траціна ад абароту сродкаў уласнікаў санаторыяў у цэлым. Гэта значыць, грошы не праядаюцца, а ўкладваюцца ў развіццё. Адпаведна, развіваецца і сфера паслуг. Сёння практычна не знайсці санаторыя, які б не прапаноўваў больш за 200 відаў толькі медыцынскіх паслуг.
Ці запоўнім на ўсе 100?
Сёлета мы чакаем прыкладна такую ж колькасць адпачывальнікаў, як і ў мінулыя гады, — прагназуе Генадзь Балбатоўскі. — Такія лічбы дазваляюць забяспечваць сярэднегадавую загрузку санаторыяў на 90%. А ўлетку нашы санаторыі запоўнены на 100%.
Ён нагадвае, што ўсе нашы санаторыі на сёння з'яўляюцца самастойнымі суб'ектамі гаспадарання і працуюць у рынкавых умовах — гэта значыць не маюць дзяржпадтрымкі з бюджэтных сродкаў, акрамя санаторыяў Мінпрацы і сацабароны. Яны ўдзельнічаюць у адкрытым конкурсе па закупцы паслуг, які штогод праводзіць Рэспубліканскі цэнтр па аздараўленні і санаторна-курортным лячэнні насельніцтва за кошт сродкаў рэспубліканскага бюджэту і Фонду дзяржаўнага сацыяльнага страхавання. «Дзяржава выдзяляе дастаткова сродкаў на гэтыя мэты, — кажа Генадзь Балбатоўскі. — Так, у гэтым годзе было выдзелена больш за 1 трлн рублёў для аздараўлення нашых грамадзян, якія маюць ільготы».
Колькі гэта каштуе?
Апошнім часам людзі кажуць, што цэны ў нашы санаторыі не такія ўжо і маленькія. Нават прадстаўнікі расійскага турбізнесу адзначаюць, што пасля таго, як нашы санаторыі павысілі цэны ў гэтым сезоне на 20%, адпачынак у іх ужо не здаецца такім танным, як гэта было раней.
«Суадносіны «кошт-якасць» у нас прымальныя, — лічыць Генадзь Балбатоўскі, — попыт захоўваецца. А менавіта ён вызначае прапанову. Калі мы кажам пра 90‑працэнтную сярэднегадавую запаўняльнасць і 100‑працэнтную ў сезон, то цэнавая палітыка, відаць, правільная». Тэндэнцыі для зніжэння цэн пры існуючым попыце спецыяліст не бачыць.
Колькі ж каштуе адпачыць і аздаравіцца ў беларускім санаторыі?
Кошт стандартнага двухмеснага нумара ў свабоднай рэалізацыі на суткі для аднаго чалавека складае ў сярэднім каля 350 тысяч рублёў. Калі ж браць нумар палепшанай камфортнасці, то цана можа скласці і 500–600 тысяч рублёў, і вышэй. Кожны сам вызначае, колькі яму плаціць і ў якія ўмовы ехаць.
Але гэта калі купляць пуцёўку ў вольным продажы. Грамадзяне Беларусі, якія выплачваюць абавязковыя страхавыя ўзносы на дзяржаўнае сацыяльнае страхаванне ў Фонд сацыяльнай абароны насельніцтва (а гэта ўсе, хто працуе і атрымлівае «белую» зарплату), маюць права набыць пуцёўку за кошт сродкаў дзяржаўнага сацыяльнага страхавання.
Для гэтага трэба звярнуцца ў камісію па аздараўленні і санаторна-курортным лячэнні насельніцтва па месцы працы (службы, вучобы) з прыкладаннем да заявы медыцынскай даведкі аб стане здароўя, якая вызначае патрэбнасць у санаторна-курортным лячэнні альбо адсутнасць супрацьпаказанняў да яго. Пры гэтым пуцёўка ў санаторый даецца па профілі захворвання, указанаму ў графе «Рэкамендацыі».
Тыя, хто самастойна выплачвае абавязковыя страхавыя ўзносы на дзяржаўнае сацыяльнае страхаванне ў Фонд сацыяльнай абароны насельніцтва, могуць звярнуцца ў прадстаўніцтва Рэспубліканскага цэнтра па аздараўленні і санаторна-курортным лячэнні насельніцтва па месцы жыхарства.
Кошт пуцёвак, закупленых Рэспубліканскім цэнтрам па аздараўленні і санаторна-курортным лячэнні насельніцтва ў 2014 годзе, складае 265 тысяч рублёў у суткі.
Памер платы за пуцёўку для грамадзян пры гэтым вызначаецца ў залежнасці ад памеру іх сярэднямесячнага грашовага даходу (зарплаты, пенсіі, стыпендыі) за 12 каляндарных месяцаў, папярэдніх месяцу выдачы пуцёўкі. У цэлым, ён вагаецца ад 15% ад поўнага кошту пуцёўкі — калі памер грашовага даходу атрымальніка пуцёўкі складае менш за палову налічанай сярэднямесячнай заработнай платы работнікаў Беларусі, і да 100% — калі памер грашовага даходу атрымальніка пуцёўкі перавышае ў 5 разоў налічаную сярэднямесячную заработную плату работнікаў Беларусі.
Акрамя таго, прафсаюзныя і некаторыя іншыя санаторыі могуць даць грамадзянам Беларусі зніжку ў памеры 25%. Таксама для беларусаў існуе сістэма зніжак у залежнасці ад сезона. Такім чынам, дорага адпачываць у нашых санаторыях ці не, — кожны вызначае для сябе сам.
Святлана Бусько.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.