З-за спякотнага надвор'я і моцнага працяглага дэфіцыту ападкаў у Беларусі працягваюць гарэць лясы. А лакальныя непрацяглыя дажджы, якія адзначаюцца ў апошні час месцамі па краіне, істотна на сітуацыю не ўплываюць...
— Практычна па ўсёй краіне зараз устаноўлены 4 і 5 класы пажарнай небяспекі. Толькі з аўторка па сераду ў краіне ўзніклі 4 новыя пажары ў лясах і 14 — на тарфяніках, — паведамілі "Звяздзе" ў прэс-службе Міністэрства па надзвычайных сітуацыях. — Узгаранні на іх асабліва небяспечныя з-за таго, што гарэнне адбываецца пад зямлёй, і таму патушыць яго вельмі цяжка. Самая ж трывожная сітуацыя ў краіне назіраецца па Гомельшчыне, Брэстчыне і поўдні Мінскай вобласці.
Мы нагадваем, што па ўсёй тэрыторыі краіны ўведзена поўная забарона на наведванне лясоў. У кожным выпадку яе прымаюць мясцовыя органы ўлады. Адмяняцца яна таксама будзе, зыходзячы з бягучага становішча. Усе шлагбаумы, якія знаходзяцца на з'ездах з дарог у лясы, мусяць быць зачынены. Аўтааматарам дазваляецца толькі праязджаць праз лес выключна па тых дарогах, якія вядуць да населеных пунктаў і ўладкаваных месцаў адпачынку.
Само сабой, паўстае пытанне: а як высветліць, ці адносіцца пэўная тэрыторыя да лясных угоддзяў, каб пазбегнуць неспадзяванага канфлікту з законам?
Спецыялісты раяць звяртацца ў такім выпадку ў мясцовыя лясгасы. Зрабіць гэта будзе карысна ў першую чаргу для вашага кашалька. Бо калі вы парушыце забарону на знаходжанне ў лесе, то за гэта мусіце сплаціць штраф у памеры да дваццаці пяці базавых. Аднак калі з-за вас лесу або тарфяніку быў нанесены ўрон, але складу злачынства ў гэтым не знайшлі, то сума штрафу ўзрастае ўдвая.
Але калі ж можна будзе спакойна выбрацца ў лес па грыбы, ягады або проста дзеля адпачынку?
— Каб уратаваць лясы ад магчымых пажараў, патрэбны зацяжныя дажджы па ўсёй краіне. А вось тут, на жаль, папярэдні прагноз пакуль не радуе, — гаворыць галоўны сіноптык Рэспубліканскага гідраметэацэнтра Людміла Парашчук. — Мяркуецца, што чырвоны ўзровень небяспекі будзе сёння абвешчаны на тэрыторыі Гомельскай вобласці, а да канца тыдня — па поўдні Магілёўшчыны і ў раёне Гродна... Так што да канца бягучага тыдня істотнага паляпшэння пажаранебяспечнай сітуацыі агулам па краіне мы не чакаем. Але разлічваем, што прырода усё ж злітуецца напрыканцы наступнага тыдня, калі пойдуць дажджы і дзённая тэмпература прыйдзе ў норму, якая складае 21-26 градусаў...
Валяр'ян ШКЛЕННІК.
Канцэрт для дзяцей і моладзі, пластычны спектакль Ягора Дружыніна і «Рок-панарама».