Дзякуючы яе бацьку, які пазіраваў славутаму мастаку, і нарадзілася такая пазітыўная карціна.
На кожную гадавіну з дня вызвалення Віцебска ад нямецка-фашысцкіх захопнікаў — 26 чэрвеня — збіраліся разам віцебскія падпольшчыцы. Гэтую традыцыю заклала вядомая ў горадзе на Заходняй Дзвіне незабыўная Вера Сямёнаўна Кулагіна. Успаміналі мінулае, разважалі аб сучасным. А Праскоўя Сідараўна Калядзянкова (Шаўрова) абавязкова наладжвала канцэрт: спявала душэўна, самазабыўна, збіраючы гарачыя апладысменты. На жаль, няўмольны час забірае былых змагарак — сёлета на сустрэчу прыйшла толькі адна Галіна Аляксандраўна Дзяркач. Не дажыўшы некалькі дзён да 87 гадоў, у кастрычніку 2010-га пакінула гэты свет партызанка «Салавей», Праскоўя Калядзянкова, забраўшы з сабой усе свае спетыя і няспетыя песні...
Колькі сябе помніла Праскоўя, яна спявала — у святы і будні, дома і на працы. Нават у гады ваеннага ліхалецця. Нездарма лясныя салдаты за звонкі голас, вясёлыя і задушэўныя песні дзяўчыну называлі «Партызанка «Салавей». Здабытымі ёю звесткамі аб размяшчэнні і перамяшчэнні нямецкіх войскаў карысталіся партызаны брыгад Райцава, Пагарэлава, Біруліна. Яна была незаменным «вінцікам» у адладжаным механізме перадачы даных ад падпольшчыкаў да партызан — сувязной. Пад выглядам абмену солі, вязаных шкарпэтак, панчох на прадукты Паша прабіралася ў навакольныя вёскі, дзе ад яе пільнага позірку не маглі схавацца ніякія змяненні ў стане ворага. Партызанку не раз арыштоўвалі, але дзяўчыне ўдавалася і паліцаяў, і гітлераўцаў абвесці вакол пальца.
У чэрвені 1944 года, калі Чырвоная Армія загнала фашыстаў пад Віцебскам у «кацёл», адкуль ім было ўжо не вырвацца, сам горад ператварыўся ў пустыню: на вуліцах — ніводнага гараджаніна. 26 чэрвеня абласную сталіцу занялі нашы. І тады з разнастайных схованак пачалі вылазіць людзі. З нямецкага бункера па вуліцы Горкага чырвонаармейцы дапамаглі выбрацца Праскоўі і яе старэйшаму брату Парфірыю — таксама падпольшчыку. Насельніцтва вызваленага Віцебска перапісалі. Аказалася... 118 чалавек. У гэтым спіску Шаўрова Праскоўя значыцца пад нумарам 9. А да вайны ж тут пражывала 180 тысяч гараджан!
Пасля вызвалення былая партызанка і падпольшчыца актыўна ўдзельнічала ў аднаўленні разбуранага фашыстамі горада і зруйнаванага Віцебскага чыгуначнага вузла: расчышчала завалы, укладвала рэйкі, шпалы, узводзіла вакзал, жылыя дамы. Доўгі час з мамай жыла ў вагоне, які стаяў у чыгуначным парку. І пасля напружанай цяжкай працы бегла... на рэпетыцыі.
У першы ж пасляваенны год на Віцебскім вузле нарадзіўся вядомы вакальны дуэт Пашы Шаўровай і Любы Камаровай (Кондрат). Не адно пакаленне чыгуначнікаў Віцебшчыны апладзіравала яму. На кожным свяце абавязковы нумар — народныя песні ў іх выкананні. І так больш за трыццаць гадоў, пакуль здароўе дазваляла Любові Аляксееўне выходзіць на сцэну. Дуэт быў неаднаразовым дыпламантам усесаюзных, рэспубліканскіх і абласных аглядаў мастацкай самадзейнасці. Беларускія кінематаграфісты знялі пра спявачак дакументальны фільм, песні ў іх выкананні гучалі па радыё і на тэлебачанні. Пра артыстак не раз расказвала газета «Віцебскі рабочы».
Пасля распаду дуэта стала Праскоўя Сідараўна салісткай хору чыгуначнікаў, аб'ездзіла ўсе падраздзяленні Віцебскага аддзялення, навакольныя калгасы і саўгасы, радавала слухачоў і за межамі рэспублікі.
— Дня не магу без песні, — гаварыла мне былая партызанка. — Ёю я выказваю свае пачуцці, ачышчаю, узвышаю душу. Спадзяюся, не толькі сваю, але і тых, хто мяне слухае.
А мужам яе стаў гераічны чалавек — удзельнік фінскай кампаніі і Вялікай Айчыннай вайны, франтавік, узнагароджаны шматлікімі ордэнамі і медалямі, Аляксандр Гаўрылавіч Калядзянкоў. «Гаўрылавіч» — так яна называла свайго мужа, а ён яе — «Панечка» (памяншальна-ласкавае ад Праскоўі, Пашы). Вырасцілі сына і дачушку, якія падарылі ім шэсць унукаў. Абое ўсё свядомае жыццё аддалі чыгунцы: Аляксандр Гаўрылавіч быў інжынерам энергазабеспячэння, а Праскоўя Сідараўна 46 гадоў адпрацавала бухгалтарам. Іх унукі і ўзялі ад бабулі талент прыгожа спяваць. Але трымаць у сабе песню, якая рвецца вонкі, ім не дазволяць гены не толькі бабулі, але і прабабкі Ефрасінні Сямёнаўны і прадзеда Сідара Іванавіча Шаўровых, якія таксама мелі дар Божы. Калі яны спявалі разам, паслухаць збягалася ўся вёска Сахарава, што размяшчалася некалі непадалёку ад Віцебска, на беразе Заходняй Дзвіны.
Пачуў неяк знакаміты рускі мастак Ілья Яфімавіч Рэпін, як распявае сялянскі хлопец Сідар Шаўроў вершы Пушкіна і Лермантава. Менавіта распявае, а не чытае. Косіць і спявае, працуе ў полі і спявае, рыбачыць і спявае, проста ідзе па дарозе — і спявае... Гучна, з пачуццём! Залюбаваўся, пазнаёміўся і запрасіў да сябе ў маёнтак Здраўнёва, які ён купіў у 1892 годзе на грошы, выручаныя ад продажу карціны «Запарожцы пішуць пісьмо турэцкаму султану». (А набыў карціну за 35 тысяч рублёў асабіста расійскі імператар Аляксандр ІІІ.)
Тры дні пазіраваў Сідар Шаўроў мастаку. У выніку нарадзілася карціна «Беларус», якая і сёння экспануецца ў Дзяржаўным Рускім музеі ў Санкт-Пецярбургу. Прыгожы хлопец стаіць на мастках, адкінуўшыся на парэнчы, і ўпэўнена, з пачуццём уласнай годнасці глядзіць на свет... У створаным Рэпіным вобразе пакарае ўсё: пастава беларуса, дапытлівы яго позірк з гарэзлівым агеньчыкам, прывабная ўсмешкай. Ён змяніў у свой час уяўленне сучаснікаў аб беларусах як аб забітых, пакорлівых істотах, з каўтуном у валасах... Невыпадкова гэтая работа лічыцца лепшым сялянскім партрэтам у рускім жывапісе.
Дарэчы, Ілья Яфімавіч «падгледзеў» у Шаўрова склеп, які потым змайстраваў у сябе. Бывала, Праскоўя Сідараўна вадзіла экскурсіі па музеі-сядзібе Ільі Рэпіна, расказваючы не толькі пра гісторыю стварэння карціны «Беларус», спісанай з уласнага бацькі, але і пра здраўнёўскі бярозавік. Побач расце шмат беластволых дрэў. Яны шчодра дзеляцца сваім сокам, з якога мастака навучылі гатаваць квас. У шаўроўскім склепе ён заўсёды заставаўся халодным, нават у спякоту.
Праскоўя Сідараўна, як казала ёй мама, мела бацькавы бровы, нос і падбародак. А вось яе сын Аляксандр — копія дзеда. Можна параўнаць фотаздымак і карціну і ўпэўніцца ў падабенстве. Моцныя ўсё ж гены ў «Беларуса»!
Унучка Праскоўі Сідараўны Наташа, калі вучылася ў 10-м класе і ўдзельнічала ў конкурсе работ «Лёс сям'і ў лёсе краіны», напісала гісторыю свайго роду. Ёй сваімі ўспамінамі дапамагла бабуля. Цяпер бабулін аповед будзе перадавацца з пакалення ў пакаленне...
Таццяна КУЗЬМІЧ.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».