Аляксандр Лукашэнка папярэдзіў чыноўнікаў аб недапушчальнасці агалення ўнутранага рынку з‑за павышанага попыту на беларускую прадукцыю ў Расіі.
Аб гэтым кіраўнік дзяржавы заявіў падчас наведвання ААТ «Агракамбінат «Скідзельскі», перадае карэспандэнт БЕЛТА.
Як далажылі Прэзідэнту, зараз у Расіі адзначаецца павышаны попыт на прадукцыю з Беларусі. Толькі за адзін дзень у Расіі было прададзена 1,5 т беларускага масла. Паводле слоў міністра сельскай гаспадаркі і харчавання Леаніда Зайца, толькі на пастаўках малочнай і мясной прадукцыі ў Расійскую Федэрацыю са жніўня па снежань можна атрымаць выручку ў аб'ёме $2,1 млрд. Міністр таксама паведаміў, што ў Расіі ўзняліся цэны на малочную прадукцыю. «Просяць нашы сыры, 82‑працэнтнае масла», — сказаў Леанід Заяц.
«Трэба варушыцца, скарыстаць гэты момант і зарабіць грошы», — адзначыў кіраўнік дзяржавы. «Трэба мець на ўвазе, што яны закрылі свой рынак, але мы не бралі абавязацельствы па ўнутраным рынку. Мы можам завозіць сабе прадукцыю з любой кропкі планеты. Трэба загружаць, перапрацоўваць і прадаваць, — сказаў Прэзідэнт. — Толькі трэба ўзгадняць з расіянамі, каб нас не папракалі, што мы ідзём уразрэз з іх палітыкай».
«І не агаліце ўласны рынак, каб насельніцтва атрымлівала столькі прадукцыі, колькі трэба», — падкрэсліў Аляксандр Лукашэнка.
У гэтай сувязі Прэзідэнт лічыць, што ў краіне можна ўласнымі сіламі закрыць патрэбнасці ў плодаагародніннай прадукцыі. Як далажыў старшыня Гродзенскага аблвыканкама Уладзімір Краўцоў, у вобласці яблыкі вырошчваюцца больш як на 4 тыс. га. Ураджайнасць тут вышэйшая, чым у цэлым па краіне. Паводле яго слоў, адзінай праблемай з'яўляецца няхватка сховішчаў. Міністр сельскай гаспадаркі і харчавання Леанід Заяц адзначыў, што ў краіне спажываецца 90 тыс. т яблыкаў, з іх палавіна — уласнай вытворчасці. У той жа час у краіне ёсць сховішчы, разлічаныя на 80 тыс. т гэтай прадукцыі. Аляксандр Лукашэнка лічыць, што неабходна сур'ёзна заняцца вытворчасцю плодаагародніннай прадукцыі, закрыўшы ўнутраныя патрэбнасці ў ёй, як у свой час была вырашана праблема з бульбай і буракамі.
«Мы ж гэта ўсё можам зрабіць! — падкрэсліў Прэзідэнт. — Мы павінны адысці ад імпарту яблыкаў, пладоў наогул. Гэта мы можам атрымліваць самі». На яго думку, неабходна вызначыцца з тэхналогіямі, вывучыць вопыт іншых краін.
На прыкладзе СВК «Прагрэс-Верцялішкі» Прэзідэнт азнаёміўся з тым, якія інтэнсіўныя сістэмы вытворчасці пладоў і ягад прымяняюцца ў сучасным садаводстве. Сад, закладзены ў гэтай гаспадарцы, з'яўляецца адным з першых садоў прамысловага тыпу ў Беларусі. Тут культывуецца больш за 40 сартоў яблынь. Гаспадарка вырошчвае таксама буякі і садовыя суніцы. Для захоўвання яблыкаў у гаспадарцы пабудавана сховішча ўмяшчальнасцю 2,2 тыс. т у сезон. Яблыкі захоўваюцца з верасня да красавіка-мая, пры гэтым страты мінімальныя. У 2009 годзе тут была ўстаноўлена лінія, якая сартуе плады па вазе, дыяметры і інтэнсіўнасці афарбоўкі.
Аляксандр Лукашэнка лічыць «Прагрэс-Верцялішкі» лепшай гаспадаркай у краіне. На яго думку, сюды трэба накіроўваць кіраўнікоў для пераймання вопыту паспяховага гаспадарання, а таксама на практыку студэнтаў навучальных устаноў сельскагаспадарчага профілю.
Таксама кіраўнік дзяржавы прапануе губернатарам паўднёвых рэгіёнаў Беларусі звярнуць увагу на вырошчванне бахчавых культур у сувязі са змяненнем кліматычных умоў. Аляксандр Лукашэнка расказаў, што ў гэтым годзе на сваім участку вырасціў і кавуны, і дыні. Паводле яго слоў, кавуны атрымаліся нават смачнейшыя за астраханскія. «Аказваецца, у нас можна вырошчваць кавуны. І гэта ў Мінску, не на поўдні! А там і праблем няма ніякіх, — лічыць Прэзідэнт. — Я на сабе праверыў, што ў нас можна вырошчваць бахчавыя. Вучоныя — малайцы».
Наогул Аляксандр Лукашэнка ўпэўнены, што сельская гаспадарка ў стане выйсці на самаакупнасць, і дзяржава будзе фінансаваць толькі перспектыўныя праекты. «Настройвайцеся на працу ўжо тымі сіламі, якія сёння ёсць. Маса тэхнікі, людзі хочуць працаваць — працуйце! Таму што асноўныя сродкі дзяржава павінна будзе накіраваць на мерапрыемствы і праграмы, за якія яна, перш за ўсё, адказвае: дарогі, землі, меліярацыя і г. д. Гэта галоўнае для дзяржавы», — сказаў Прэзідэнт. «Далей цягнуць на плячах сельскагаспадарчую вытворчасць — нельга. Трэба, каб сяляне самі зараблялі», — адзначыў Аляксандр Лукашэнка. Ён звярнуў увагу на тое, што сёння цэны на прадукцыю сельгасвытворчасці досыць высокія і на ёй можна добра зарабіць. «Гэта не значыць, што мы кагосьці не падтрымаем. Калі трэба, калі мы бачым перспектыву, што, уклаўшы рубель, заўтра будзе аддача — мы ўкладзём», — сказаў кіраўнік дзяржавы.
Ён падкрэсліў, што дзяржава будзе кропкава фінансаваць праекты, асабліва пад патрэбную прадукцыю. «Таму што ісці агульным фронтам, як рабілі, не трэба. Ужо з'явілася шмат нахлебнікаў, якія сядзяць і думаюць: дадуць. Нічога ніхто не дасць», — падкрэсліў Прэзідэнт.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».