Звяла іх разам сяброўка Ганны Філатаўны па інстытуце. Лёс параскідаў выпускнікоў па розных куточках былога вялікага Савецкага Саюза. З дыпломам настаўніка гісторыі Ганна аказалася ў Беларусі, яе аднакурсніца — на радзіме Ганны, у Саратаўскай вобласці. Яна і паведаміла, што ў Аляксандра Гур'евіча нядаўна памерла жонка…
Ганна Філатаўна дазволіла Ніне даць яму свой адрас. Няхай напіша. Яна калісьці сама была ў такім жа стане адзіноты пасля сыходу з сям'і мужа, была ўдзячная любой падтрымцы.
І ён напісаў. Не, не жаліўся на нягоды, на адзіноту. Ён да драбнейшых падрабязнасцяў успомніў іх далёкае юнацтва, першую сустрэчу, першы пацалунак. Іх, як тады здавалася, вечнае каханне…
Пісьмо дрыжала ў руках, слёзы хлынулі ліўнем. Яна не стрымлівалася і дала ім волю. І не было каму яе суцешыць: адзіны родны чалавек, сын, жыў за тысячы кіламетраў. Ганна праплакала тры дні. Села за пісьмо з думкай усё рашуча адсячы. Але… напісала пра тое, што ўсё памятае. І адправіліся ў палёт паміж Віцебскам і далёкім Паўднёвасахалінскам цёплыя, сардэчныя пісьмы-ўспаміны.
Потым Ганна Філатаўна сабралася ў госці. Ехала і ляцела ў страшэнным хваляванні, як на першае спатканне. Аляксандр Гур'евіч сустрэў яе ў аэрапорце з велізарным букетам восеньскіх кветак. Баяліся размінуцца, не пазнаць адно аднаго. Бо пасля іх апошняй сустрэчы прайшло 38 гадоў, і былі яны зусім не маладыя. Але нейкі ўнутраны парыў, нешта невытлумачальнае пацягнула невысокую жанчыну і высокага хударлявага мужчыну насустрач. Яны саромеліся свайго завядання, сваіх маршчын, стараліся не прынесці адно аднаму болю ўважлівым аглядам. Ён павёз яе да сябе дадому. Трое дзяцей Аляксандра Гур'евіча жылі на мацерыку. У сваёй прасторнай кватэры ён застаўся адзін.
Гэта былі цудоўныя дні. Як галантны мужчына, Аляксандр Гур'евіч Ганне Філатаўне сумаваць не даваў: экскурсіі па востраве, на сопкі, рэстаран, тэатр, мора… Але самае галоўнае — вячэрнія прагулкі, у час якіх давялося тлумачыць, чаму ж іх жыццёвыя шляхі разышліся. Ва ўсім аказалася вінаватай вайна. Яна рассекла іх лёсы. Ганна была ў акупацыі, калі Аляксандр ваяваў на фронце. Трапіла ў фашысцкі канцлагер, некалькі гадоў пасля вызвалення лячылася. Аляксандр Гур'евіч пісаў на даваеннае месца работы Ганны, але са школы адказалі, што яна загінула. Ганна таксама спрабавала даведацца пра лёс каханага па даваенным адрасе, але пасля вайны Аляксандр туды ўжо не вярнуўся. Толькі праз 12 гадоў, калі ў кожнага з іх была сям'я, дзеці, ім стала вядома, што абое засталіся жывымі. Але разбурыць святое — сям'ю — ні ў кога з іх не ўзнікла нават думкі. Так і жылі, выхоўвалі дзяцей.
І вось гэта сустрэча, якая ўскалыхнула ўспаміны юнацтва. Яны пазнавалі адно аднаго нанова. Нейкі час жылі толькі былым. Але засланіцца ад сённяшняга не маглі. Яно ўрывалася няпрошана: то раптоўнымі гасцямі — дзецьмі Аляксандра, то фотаздымкамі яго жонкі…
Але вячэрнія прагулкі зрабілі сваю справу. Іх сэрцы зноў ірвануліся насустрач, а рукі спляліся. Яны ўжо не саромеліся глядзець у вочы, углядацца ў твары, разгладжваць адно аднаму маршчынкі, цалаваць вусны. Каханне ўспыхнула з новай сілай. Маладыя, гледзячы на гэтых шчасліўчыкаў, здзіўляліся. Напэўна, гэтак жа, як здзіўляўся паэт Васіль Фёдараў, які напісаў такія радкі: «А я когда-то думал, что седые/не любят, не тоскуют, не грустят./Я думал, что седые, как святые/на женщин и на девушек глядят…»
А яны ні на кога не звярталі ўвагі. Там жа, на Сахаліне, пайшлі ў ЗАГС і замацавалі свой саюз на ўсё астатняе жыццё. Праўда, вырашылі паехаць да Ганны Філатаўны. Жывуць у Віцебску ўжо 20 гадоў.
Я часам сустракаю іх у парку Мазурына: маленькую бабульку і падобнага на Дон-Кіхота хударлявага мужчыну. Іх рукі па-ранейшаму счэплены ў моцны замок, які не разамкнуць ніякім нягодам.
Таццяна КУЗЬМІЧ.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.