Транзіт да суседзяў пракантралюе наша краіна
Расія забараніла ўвоз на сваю тэрыторыю шэрагу тавараў з Еўрасаюза, і наша дзяржава, як партнёр па Мытным саюзе, прыняла на сябе пэўныя абавязацельствы. У асноўным яны заключаюцца ў тым, што Беларусь абязуецца кантраляваць транзіт праз нашу тэрыторыю. Ігар НАЗАРУК, дырэктар Дэпартамента знешнеэканамічнай дзейнасці Міністэрства замежных спраў, патлумачыў журналістам некаторыя спрэчныя пытанні па гэтай тэме.
— Меры, якія Расійская Федэрацыя прыняла ў якасці абмежавальных, — гэта адказ на тыя забароны і абмежаванні, якія прыменены да яе з боку шэрагу заходніх і іншых краін. Заўважу, што ў рамках Мытнага саюза ў Рэспублікі Беларусь ёсць пэўныя абавязацельствы. І калі адзін з нашых партнёраў па «тройцы» ўводзіць абмежавальныя меры, якія закранаюць знешні гандаль, то, згодна з пагадненнем дзяржаў — членаў Мытнага саюза, заключаным у 2009 годзе, мы адпаведным чынам рэагуем.
Прадстаўнік МЗС падкрэсліў, што ў сувязі з гэтым Беларусь павінна прыняць меры, якія не дазволяць паступіць пэўным таварам на рынак Расійскай Федэрацыі.
— Калі кажуць, што, маўляў, праз нашу краіну здзяйсняюцца нелегальныя пастаўкі і Беларусь спрыяе гэтаму, то хацелася б рашуча адзначыць наступнае: у нас ёсць міжнародныя абавязацельствы і мы ні ў якім разе не будзем гэтым займацца. Што да нелегальных паставак, то само слова «нелегальныя» кажа пра тое, што яны — элемент камерцыйнага махлярства. Пранікненне так званых «санкцыйных тавараў» на тэрыторыю Расійскай Федэрацыі не дапускаецца.
Адказваючы на пытанні журналістаў, ці стануць больш ліберальнымі ўмовы доступу на беларускі рынак сыравіны з краін Еўрасаюза (у сувязі з тым, што вырабленыя на нашай тэрыторыі прадукты з яе можна пастаўляць у Расію), дыпламат звярнуўся да праблемы харчовай бяспекі.
— Я прасіў бы не ўвязваць санкцыі з харчовай бяспекай, якая мае на ўвазе ветэрынарны і фітасанітарны кантроль. Ні для каго ні сакрэт, што ў свеце «бушуе» шэраг вельмі сур'ёзных захворванняў жывёл, мяса якіх чалавек ужывае. У сувязі з гэтым нашы ветэрынары дастаткова эфектыўна манітораць знешнюю сітуацыю. Гэта робіцца па той прычыне, што мы, з'яўляючыся краінай з адкрытай эканомікай, дзе высокая доля менавіта імпартнай сыравіны, вельмі ўважліва ставіліся да таго, з якіх рэгіёнаў будзе пастаўляцца гэта сыравіна, жывёлы. Апошнія завозяцца і як узоры новых парод, і для падтрымання статка — тут могуць быць розныя варыянты. Не трэба разглядаць толькі так, што да нас арганізавана пастаўка жывёл толькі для вытворчасці мяса, хоць гэта таксама не выключаецца.
У Беларусі ёсць шмат магчымасцяў для таго, каб сюды прыйшлі інвестары і пачалі на нашай тэрыторыі вырабляць нейкія тавары. Ці былі ўжо нейкія звароты ад сусветных вытворцаў харчавання з таго часу, як Расія ўвяла санкцыі?
— Яшчэ ў 2011–2012 гг. мы пачалі прапрацоўваць пагадненне аб свабодным гандлі з Новай Зеландыяй. Гэта краіна з развітым аграрным сектарам, і калі мы прааналізавалі, то, натуральна, ад такога пагаднення большую карысць атрымлівала б Новая Зеландыя. Там круглы год добрыя ўмовы, нізкай тэмпературы не бывае, а ў нас, на жаль, зімой бывае і да мінус 35. Дык вось ужо тады мы прапрацоўвалі не проста доступ сюды малочнай і жывёлагадоўчай прадукцыі, а стварэнне сумесных кааперацыйных праектаў. Таму я папрасіў бы не звязваць санкцыйныя з'явы з нашым кааперацыйным супрацоўніцтвам з іншымі краінамі. Мы заўсёды прапаноўвалі тым або іншым інвестарам рэалізоўваць разам пэўныя праекты.
Надзея ЮШКЕВІЧ
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.