Яны трапляюцца мне апошнім часам занадта часта. То талмудныя, драбязна-падрабязныя — як у Таццяны Львоўны Талстой, то лаканічныя, сціснутыя да літарак з кропачкамі — як у Элізы Бенедыктаўны Ажэшкі. Яны літаральна не даюць мне спакою, гэтыя дзённікі, і сваім зместам правакуюць мяне на новыя пошукі і чарговыя (ці лепш бы сказаць, пазачарговыя, бо шмат што стаіць на чарзе) чытанні. І нават калі б я не хацела прадзірацца вачыма і мозгам (а разам з гэтым — душою і сэрцам) праз гэтыя разнастайныя дзённікі, мне давялося б такое рабіць — па волі не тое каб лёсу, але і працоўных абавязкаў, бо нават у рэдакцыйным партфеліку «Маладосці» час ад часу з'яўляюцца дзённікі. (Сказаць па сакрэце, адзін вельмі кранальны твор пад назвай «Дзённікі страчанага кахання» будзе друкавацца вельмі хутка.) І вось...
І вось аднойчы, прычым зусім нядаўна, я пачула ад Яго такое дзіўнае, калі не сказаць больш, пытанне: маўляў, а ці вяду я дзённік? Магчыма, яно было выклікана агульным (вельмі агульным) уяўленнем пра тых, хто мае дачыненне да літаратуры. Калі ты, маўляў, літаратар, дык і пёрка табе ў правую руку, калі ты не ляўша, — пішы, і не абы-што, а дзённік, бо ўсялякае мемуарна-эпісталярнае сёння ў значна большым фаворы, чым тое, што як бы добра ні было прыдумана, але ж прыдумана.
Нешта мне Яго пытанне нагадала... Успомніла. Некалі Ён ужо пытаўся ў мяне пра нешта падобнае: а ці маю я тры ці больш паліцы, забітыя крэмамі, пенкамі, пудрай, ласьёнамі, ценямі, лакам, памадай, духамі... якія ёсць у яго сястры? Сказаць па праўдзе, не было ў мяне ніводнай такой, хаця б малюсенькай, палічкі і нават касметычкі, бо ў тым сваім узросце я была мінімалісткай звонку настолькі ж, наколькі максімалісткай знутры: нічога штучнага не прызнавала. Як, дарэчы, і сёння. Але гэта трошкі іншая гісторыя. А дзённік? Абазнаная ў гэтай справе Таццяна Львоўна адзначала, што калі ўжо весці дзённік, то лепш пісаць у яго ўсё — ні больш ні менш — жыццё: усе падрабязнасці, думкі, пачуцці. А іначай, перачытваючы, будзеш папракаць сябе тым, колькі цікавага «не прыйшлося да слова ўпісаць». А ці такое ўвогуле магчыма? І што такое дзённік у параўнанні з жыццём? Да таго ж некаторыя дзённікі, далібог, раздражняюць. Не вельмі цікавыя самі па сабе, яны змяшчаюць аўтарскія скаргі... на недахоп часу. Дык не пішыце дзённікаў, спадарства! Нам і без іх ёсць што надрукаваць. З дзённікаў, вядома, шмат што вынікае, і ад таго яны шмат каму дапамагаюць, прынамсі, разабрацца — не ў сабе, дык хаця б у мінулых эпохах. Але... для самога аўтара дзённікаў як прадстаўніка сваёй (не будзем браць эпоху) сям'і ці якойсьці суполкі няўмольна спрацоўвае «правіла не зробленага фота». У Вікіпедыі не шукаць — гэтае правіла я прыдумала. Сутнасць яго ў тым, што не знятая на камеру падзея застаецца ў памяці і сэрцы такой яскравай, якой яна нізавошта не захаваецца, варта ёй толькі адлюстравацца на фота ці відэа. Колькі ні пазірай на экран і паперу — ні ў час той, ні ў стан той не трапіш. «Дакументальнае сведчанне» кансервуе эмоцыі, а кансервы — кансервы і ёсць.
Аднойчы ў пятым класе я атрымала «двойку». Адзіную за ўсё школьнае жыццё. За дрэнныя паводзіны. А нядаўна выпадкова знайшла на гарышчы дзённік, у якім гэта «двойка» прапісана з тлумачэннем: «Самавольна пакінула групу падоўжанага дня». Хоць гэта была не асабіста мая, а «калектыўная» двойка, я ўсё роўна дагэтуль памятала ўсе акалічнасці таго дня — так яскрава, быццам яны сённяшнія... Цяпер жа яны сатруцца, дзякуй Богу. І, можа быць, я паверу, што ад дзённікаў таксама бывае карысць.
Святлана Дзянісава,
галоўны рэдактар часопіса «Маладосць»
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.