Італьянскі мастак стварае паводле кітайскіх традыцый ды прадстаўляецца ў Беларусі
Яго імя Джузэпэ Аціні. І нельга сказаць, што гэтае імя — адкрыццё для нас. Яго творы ў Беларусі можна было бачыць з 2009 года, калі Аціні быў удзельнікам міжнароднай біенале жывапісу ў Нацыянальнай бібліятэцы Беларусі. І пайшло... Не, паехаў Джузэпе Аціні па розных іншых беларускіх мастацкіх імпрэзах, быў удзельнікам розных праектаў у Мінску і Полацку, і нават меў персанальную выставу ў галерэі «Акадэмія» Беларускай дзяржаўнай акадэміі мастацтваў. Прайшло колькі часу, і зноў ён тут: у Цэнтры сучасных мастацтваў працуе выстава італьянскага мастака Джузэпэ Аціні «Няўстойлівы».
Але пра яго якраз думаецца як пра чалавека з даволі ўстойлівымі прыхільнасцямі і мастацкімі густамі. У аснову творчасці (так адзначаюць яго даследчыкі) пакладзены прынцыпы кітайскага жывапісу. Прыроднасць — вось тое, што ўласціва яго светаўспрыманню. Яго аб'екты — жывыя, яны маюць дух, яны мяняюцца, нават тады, калі здаюцца вельмі цвёрдымі па фактуры і застылымі па форме. Вось камень — рэч матэрыяльная. Але ж хто ўпэўнены ў тым, што ён не мае нейкага патаемнага жыцця? Можа быць, няўстойлівасць вельмі трывалых (на наш погляд) рэчаў нябачная, мы думаем, што ўсё пра іх ведаем, але на самой справе гэта не так.
А ці ўсё мы ведаем пра белае і чорнае? Ці думаем, гледзячы на белае, колькі ў яго адценняў насамрэч, і ўглядаючыся ў чорнае, лічым, што як ні круці — а ўсё ў цемры? Але ж і цемры, калі разабрацца, бывае больш ці менш. Чорна-белыя колеры Аціні ў праекце «Няўстойлівы» настройваюць на філасофскі лад. Не можа быць інакш: на гэты раз ён асэнсоўвае, вывучае, адлюстроўвае, спрабуе закаваць у форму час. Імклівы і вечны. Мой. Ваш Агульначалавечы. Зямны. Усясветны. Бязмежны і ў канкрэтным адрэзку ці форме, дзе можна быць тут і цяпер. Няўстойлівы — таму што кожнае імгненне непаўторнае. Няўстойлівы — таму што зменлівы. Няўстойлівы — таму што нават калі існуеш у сузіранні, нябачна і ледзь улоўна мяняешся. Нават не таму, што гэтага хочаш ці маеш такую мэту — змены ёсць, таму што ёсць час. Закаваны ў розныя формы, ухоплены ў розных вобразах, заспеты ў гульні святла і ценю, пульсуючы ў розных фактурах, ён уяўляе вялікую таямніцу Быцця, якую без розных формул і аб'ектыўных велічынь па-свойму імкнецца спасцігаць мастацтва. І ў часу ёсць свая прыгажосць, вартая захаплення. Няўстойлівасць, якая вымагае здзіўлення і творчасці. Творчасць і час, падаецца, нечым падобныя па прыродзе: ім уласцівая неяўстойлівасць дзеля развіцця.
І калі паспрабаваць разгадаць загадку «няўстойлівага» Аціні, то на беларускай глебе яна фармулюецца прыкладна так: прырода творчасці ў прыродным краі, дзе адчуваецца вечнасць часу, нагадвае пра нябачнае імкненне да ўнутраных духоўных змен. Кожнаму — у сузіранні.
Ларыса ЦІМОШЫК
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.