Адкрыццё 77 філарманічнага сезона можна будзе ўбачыць на плошчы Свабоды
Беларуская дзяржаўная філармонія раскрыла карты і распавяла аб планах на сезон, адкрыццё якога адбудзецца 3 верасня з канцэртам Дзяржаўнага акадэмічнага сімфанічнага аркестра пад кіраўніцтвам Аляксандра Анісімава.
Так атрымалася, што праграма першага канцэрта тэматычна так ці інакш тычыцца Украіны. У канцэрце можна будзе пачуць сімфанічную рапсодыю «Тарас Бульба» Леаша Яначэка, трэцяе дзеянне оперы Пятра Чайкоўскага «Мазэпа», будуць гучаць вершы з паэмы «Палтава» Аляксандра Пушкіна. «Нехта ўгледзеў актуальнасць нашай праграмы ў сувязі з тым, што тэма вельмі ўкраінская. Мы не ўтойваем гэтага. Два вялікія прадстаўнікі культуры, Чайкоўскі і Пушкін, звярнуліся да гэтага. Чаму б і нам не звярнуцца? Зроблена гэта прыгожа, ярка, эмацыянальна. Мы спадзяёмся, што выканана будзе на такім жа ўзроўні», — пракаментаваў кіраўнік сімфанічнага аркестра Аляксандр Анісімаў.
Дарэчы, чытаць вершы Пушкіна будзе расійскі акцёр тэатра і кіно Андрэй Мярзлікін. Канцэрт можна будзе пачуць і ўбачыць абсалютна кожнаму ахвотнаму, бо на гэты раз колькасць публікі не зможа абмежаваць толькі зала філармоніі: канцэрт будзе трансліравацца на вялікі экран каля будынка гарадской ратушы, куды кожны можа прыйсці і далучыцца да музычнага мастацтва.
Галоўным адрозненнем цяперашняга сезона ад папярэдніх стане больш інтэнсіўная канцэртная дзейнасць музыкантаў за мяжой. Галоўнымі напрамкамі названы Францыя, Англія і Кітай. Сезон здаецца вельмі насычаным, план, як кажуць прадстаўнікі філармоніі, распісаны па днях. На шчасце, колькасць канцэртаў у сценах установы застанецца ранейшай. Акрамя таго, творчы склад можа прапанаваць публіцы некалькі цікавых праектаў, большая частка з якіх — ужо традыцыйныя.
У канцы верасня пачнецца ІХ Міжнародны фестываль Юрыя Башмета, на якім выступіць, як «Звязда» раней ужо пісала, каралеўскі сімфанічны аркестр Амстэрдама Канцэртгебау. Акрамя таго, у праграме запланаваны выступленні расійскага скрыпача Вадзіма Рэпіна, брытанскага піяніста Бары Дугласа і самога Юрыя Башмета.
У цыкле канцэртаў «Джазавыя вечары ў філармоніі» перад публікай выступяць выканаўцы з Польшчы, у тым ліку выбітная спявачка Ганна Марыя Ёпэк, а таксама кампазітар і піяніст Артур Дуткевіч, музыканты з Літвы і Расіі.
Не абмінулі ўвагай мастацтва выканання на адным з самых складаных інструментаў — аргане. Цыкл канцэртаў «Шэдэўры сусветнага арганнага мастацтва» прымеркаваны да стагоддзя пачатку Першай сусветнай вайны, тэмы, якую нельга абысці бокам. За гэты час на канцэртах прагучаць творы кампазітараў шасці краін — удзельніц вайны.
Маладыя выканаўцы раскрыюцца для публікі ў цыкле «Настаўнікі і вучні». Працягне сваё існаванне традыцыйны Міжнародны фестываль мастацтваў «Беларуская музычная восень». У снежні сцэна Белдзяржфілармоніі прадставіць Міжнародны конкурс піяністаў імя Марыны Цвятаевай.
Варта адзначыць і юбілеі, якія сталі падставай для тэматычных канцэртаў:
175 гадоў з дня нараджэння Пятра Чайкоўскага, 100-годдзе піяністаў Георгія Свірыдава і Святаслава Рыхтэра (які ў свой час нярэдка выступаў на беларускай сцэне),
75 гадоў споўніцца Дзяржаўнай акадэмічнай харавой капэле імя Рыгора Шырмы.
А яшчэ, каб будынак Белдзяржфілармоніі не здаваўся занадта акадэмічным і завостраным на класіцы, не магу не згадаць аб нетрадыцыйных выканаўцах, якія выступяць у Мінску. Напрыклад, 1 лістапада на сцэне для аматараў стылю джаз-ф'южн адыграе амерыканскі гітарыст Лары Кор'ел, а 25 лістапада саліруе Ігар Карнелюк, расійскі кампазітар і спявак, які, дарэчы, родам з Брэста.
Цікава таксама паслухаць вакалістаў з Кітая Лі Гун і Хантао Ван, якія выступяць у Малой зале ўжо 19 верасня.
І памятаем, што вартая ўвагі ўся праграма 77 сезона. Па добрую музыку — сюды.
Ірэна КАЦЯЛОВІЧ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».