Раніцай каля ганкаў школ і дзіцячых садкоў гармідар: такое адчуванне, што за час летніх канікулаў на правілы дарожнага руху і наогул элементарныя правілы добрага тону забыліся не толькі дзеці, але і многія дарослыя. Вось пад'ехала пад самыя вароты маладая жанчына, не пакінуўшы паміж веснічкамі і тратуарам і 50 сантыметраў. Маме з каляскай, якая падыходзіць да варотаў з другога боку, цяпер ніяк не прайсці. На заўвагу ў адрас аўтаўладальніцы: «Няўжо нельга было прыпаркаваць машыну хоць на метр далей?» — тая раздражнёна кідае: «Я дзіця прывезла!». Ага… А ўсе астатнія бацькі з дзецьмі тут проста так гуляюць. Час ад часу садкоўскі вартаўнік дзядзька Міша выходзіць да асабліва нахабных вадзіцеляў, каб трохі прыструніць іх, і пры гэтым абяцае выклікаць ДАІ, але дапамагае гэта ненадоўга — праз пару дзён сітуацыя паўтараецца.
…А якая «песня» на гэты конт у грамадскім транспарце! Вось у тралейбус убягае юнак і, спяшаючыся заняць месца, плюхаецца на крэслы «для састарэлых, пасажыраў з дзецьмі і цяжарных жанчын» — акурат пад ветлівы напамін з дынамікаў, што менавіта гэтым катэгорыям варта саступаць месца. Абвешаныя, як вінаградзінкамі, малымі, матулі заходзяць значна пазней і размяркоўваюцца хто як паспявае. Юнак нібыта не заўважае, што некаторыя з іх стаяць побач. Разруліць сітуацыю дапамагаюць… самі дзеці.
«Мам, — звонкім галаском пытаецца дзяўчо на выгляд гадоў трох-чатырох — гэты дзядзька цяжарны?» Твар маладога чалавека набывае колер маладых буракоў, а яго самога нябачнай спружынай падкідвае да выхаду.
Але такі мірны вынік, хутчэй, выключэнне, чым правіла. У паўсядзённасці ж многія дарослыя ў прысутнасці дзяцей абражаюць іншых, павышаюць голас на выхавацеляў і настаўнікаў, скандаляць у чэргах у паліклініцы, нарэшце, сварацца на саміх малых… І пры гэтым большасць гэтых жа бацькоў расказвае дзецям па кніжках, што такое добра і што такое дрэнна, вучыць вітацца і прасіць прабачэння, патрабуе ад іх быць ветлівымі і ласкавымі. Малыя бачаць усё гэта і адчуваюць, як модна цяпер гаварыць, кагнітыўны дысананс. Калі хлусіць нельга, але бацька хлусіць выхавальніцы, што не зможа дапамагчы ў рамонце шаф, бо заняты на працы, — значыць, часам падманваць можна? Калі мама вучыць саступаць месца старэйшым, але кожны раз пры ўваходзе ў транспарт кажа: «Ідзі, сядай», а сама стаіць — значыць, дарослыя проста прыкідваюцца стомленымі? Словы і справы супярэчаць адно аднаму, маленькі чалавек губляецца. А потым — робіць так, як бацькі.
Грубасць, няўважлівасць, брыдкаслоўе і нават адкрытае хамства — вы сапраўды верыце, што нашы дзеткі-кветкі прыносяць гэта аднекуль з вуліцы, што іншыя, «дрэнныя» дзеці паказалі ім заразлівы дрэнны прыклад? Але ж псіхолагі і педагогі сцвярджаюць, што на 90% характар чалавека закладваецца ў сям'і. І перш чым рабіць заўвагу нашчадкам за дрэнныя паводзіны і непаважлівыя размовы, перш чым чытаць маралі кшталту «Вось я ў тваім узросце…», трэба шчыра адказаць самому сабе на пытанне: «А вы — не такі?»
Вікторыя ЦЕЛЯШУК.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.