Чым Заслаўе прывабіць гасцей на Дзень беларускага пісьменства
Перад стартам чарговага Дня пісьменства, які сёлета пройдзе ў Заслаўі, стала цікава даведацца пра цікавосткі і асаблівасці будучага свята, якія могуць прывабіць аматараў літаратуры. Пра іх нам распавёў аўтар сцэнарыя святочных мерапрыемстваў намеснік дырэктара Выдавецкага дома «Звязда», галоўны рэдактар часопіса «Полымя» Алесь Бадак.
З першых вуснаў даведаліся, што Дзень пісьменства «пачынаецца» з імён Рагнеды і Ізяслава, герояў кранальнага падання. «Падання, бо, шчыра кажучы, ніхто не ведае, ці было на самой справе так, як напісана ў летапісах. Але гісторыя пра сына, які абараніў сваю маці, і Рагнеду, якая была саслана ў Заслаўе, вельмі прыгожая. Лічу, што нашым кінематографу і літаратуры варта было б звярнуцца да гэтай гісторыі і гэтага перыяду», — распавядае Алесь Бадак.
Традыцыйна ў праграме свята заўсёды задзейнічаны імёны тых пісьменнікаў, якія праславілі той ці іншы горад (месца, дзе свята праводзіцца). Да прыкладу, калі свята ладзілі ў Хойніках, на сцэну выходзіў артыст у вобразе Івана Мележа, у Ганцавічах згадвалі трылогію «На ростанях», бо менавіта ў ганцавіцкай вёсцы Люсіна Якуб Колас, працуючы настаўнікам, знайшоў яе прататыпаў. Заслаўе не можа пахваліцца славутымі землякамі-пісьменнікамі, таму вырашана падчас тэатралізаванай цырымоніі адкрыцця свята зрабіць экскурс у гісторыю беларускай літаратуры і звярнуць увагу на яе «залаты фонд». Але ў Заслаўя ёсць іншае — гэта адзін з самых старажытных нашых гарадоў. «Проста пахадзіць па гэтай зямлі — значыць ужо дакрануцца да вельмі далёкай гісторыі», — лічыць суразмоўца.
Нельга абмінуць увагай Міжнародны «круглы стол», які праводзіцца падчас Дня пісьменства з 2007 года. Сёлета яго назва — «Сугучча. Літаратура як люстэрка эпохі». «Сярод гасцей «круглага стала» ёсць нашы даўнія сябры, людзі, якія на сваёй радзіме шмат робяць для таго, каб літаратурныя стасункі паміж краінамі былі больш цесныя. Напрыклад, паэт Чынгіз Алі аглу прапагандуе беларускую літаратуру ў Азербайджане. Аляксандр Казінцаў, рэдактар расійскага часопіса «Наш современник», прысвячае адзін з нумароў свайго выдання беларускай літаратуры. Упершыню будзе ўдзельнічаць Юрый Казлоў, галоўны рэдактар «Роман-газеты». Мы можам перадаць вопыт адзін аднаму ў час няпростага стаўлення да літаратуры і чытання. Бо безумоўна, сённяшнія тыражы нельга параўноўваць з тымі тыражамі, якія былі ў 1980-я гады, — расказвае Алесь Бадак. — Падчас «круглага стала» мы будзем гаварыць пра ролю літаратуры на сучасным этапе, пра адказнасць пісьменніка перад чытачом, пра тое, хто сённяшні аўтар і хто літаратурны герой. Сапраўды цікава, ці засталіся сёння персанажы, роўныя героям літаратуры ХХ стагоддзя».
На «круглы стол» (ён адбудзецца ў Нацыянальнай бібліятэцы) запрашаюцца ўсе ахвотныя. Можна скарыстацца магчымасцю сустрэцца з сербскім пісьменнікам, пагаварыць з галоўным рэдактарам «Роман-газеты» ці з прадстаўніком азербайджанскай літаратуры.
Слова «Сугучча» ў назве мерапрыемства — зусім не выпадковае. Летась да Дня пісьменства Выдавецкі дом «Звязда» прадставіў адзінаццацітомнік літаратурных твораў аўтараў з краін СНД — серыю «Созвучие сердец», дзе кожны том быў прысвечаны літаратуры адной краіны. А сёлета падчас свята адбудзецца прэзентацыя альманаха «Созвучие». «Гэтым альманахам мы працягваем беларускія выдавецкія традыцыі ХХ стагоддзя, калі выходзіў альманах пад назвай «Братэрства». У сёлетнім выданні будуць змешчаны творы пісьменнікаў краін СНД, напісаныя ў апошнія гады. «Созвучие» ўмесціць і прозу, і паэзію, і публіцыстыку. Напрыклад, што ў Беларусі ведаюць пра сучасны казахскі раман? Вельмі мала, таму мы даём магчымасць з ім пазнаёміцца. Да наступнага Дня пісьменства мы пашырым геаграфію твораў для гэтага альманаха», — каментуе Алесь Бадак.
На свяце ў Заслаўі прэзентуюцца таксама беларускія выданні, якія былі надрукаваны за апошні год. Наведвальнікі змогуць не толькі паглядзець, якія кнігі выдаліся ў Беларусі, але і пазнаёміцца з аўтарамі кніг. І нават паўдзельнічаць ў надрукаванні кнігі па тэхналогіях часоў Францыска Скарыны — як ужо паведамляла «Звязда», на свяце будзе прадастаўлена «Біблія», выдадзеная менавіта па гэтых тэхналогіях, адноўленых стараннямі калекцыянера і гісторыка Уладзіміра Ліхадзедава.
У спісе цікавінак Дня пісьменства сцэнарыст таксама адзначыў конкурс на лепшага юнага чытальніка «Жывая класіка». «Паслухаць, як дзеці чытаюць класікаў беларускай літаратуры, падзівіцца на тых, хто сапраўды любіць нашу паэзію, — заўсёды цікава. У фінале конкурсу ўдзельнічала больш за дваццаць чытальнікаў».
Карацей, выхадныя ў Заслаўі будуць цікавыя і змястоўныя. Прыязджайце — не пашкадуеце!
Ірэна КАЦЯЛОВІЧ.
Мерапрыемства праводзіцца на добраахвотнай аснове.
Не выявіць ні секунды абыякавасці.