Наша краіна прадставіць на Генеральнай Асамблеі ААН два праекты рэзалюцый
На наступным тыдні Уладзімір Макей, міністр замежных спраў Беларусі, з афіцыйнымі візітамі наведае Нігерыю і Паўднёва-Афрыканскую Рэспубліку. Пра гэта, а таксама пра іншыя падзеі ў дзейнасці дыпламатычнага ведамства краіны, на брыфінгу паведаміў Дзмітрый МІРОНЧЫК, начальнік упраўлення інфармацыі — прэс-сакратар Міністэрства замежных спраў.
— У рамках візіту запланаваны шэраг перамоў на вышэйшым і высокіх узроўнях, а таксама сустрэчы з прадстаўнікамі дзелавых колаў, — праінфармаваў прадстаўнік МЗС. — Будуць абмеркаваны пытанні палітычнага дыялогу, перспектывы развіцця беларуска-нігерыйскага і беларуска-паўднёваафрыканскага двухбаковага супрацоўніцтва ва ўсіх сферах — у прыватнасці, у гандлёва-эканамічнай галіне.
Кантроль над узбраеннямі павінен быць
Як паведамляе прэс-сакратар МЗС, 9-10 верасня ў Маскве пройдуць кансультацыі па падрыхтоўцы да 69-й сесіі Генеральнай Асамблеі Арганізацыі Аб'яднаных Нацый у фарматах Арганізацыі Дагавора аб калектыўнай бяспецы і Садружнасці Незалежных Дзяржаў.
— Падчас кансультацый будуць узгоднены сумесныя падыходы дзяржаў — удзельніц АДКБ і СНД па асноўных пытаннях парадку дня Генеральнай асамблеі ААН. Беларускі бок чакае, што па выніках кансультацый будзе дасягнута дамоўленасць аб прынцыповай падтрымцы дзяржавамі — членамі АДКБ і СНД двух праектаў беларускіх рэзалюцый, якія тычацца тэматыкі кантролю над узбраеннямі, а таксама супрацоўніцтва паміж ААН і СНД.
Дні беларускай эканомікі пройдуць у Германіі
Гэтымі днямі пры падтрымцы Усходняга камітэта нямецкай эканомікі праходзіць візіт у нашу краіну дэлегацыі прадстаўнікоў шэрагу буйных германскіх фірмаў. Узначальвае яе выканаўчы дырэктар гэтай арганізацыі Райнер Лінднер. У складзе дэлегацыі — прадстаўнікі буйных германскіх фірмаў, у тым ліку гандлёвых канцэрнаў, вытворцаў сельгастэхнікі і танэлепраходнага абсталявання.
А ў самым пачатку наступнага тыдня ў Франкфурце-на-Майне, фінансавай сталіцы Германіі, пройдзе Дзень беларускай эканомікі «Германія—Беларусь — партнёры ў эканамічнай і інвестыцыйных сферах». Чакаецца ўдзел больш чым сямідзесяці прадстаўнікоў дзяржаўных банкаўскіх і кансалтынгавых структур, прапрымальніцкіх аб'яднанняў, бізнес-колаў, а таксама СМІ Беларусі і Германіі.
— Значная ўвага будзе нададзена ўдзелу нашай краіны ў інтэграцыйных працэсах у рамках Мытнага саюза, Адзінай эканамічнай прасторы, Еўразійскага эканамічнага саюза і новым магчымасцям для нямецкага бізнесу ў Беларусі, якія адкрываюцца ў гэтай сувязі, — удакладніў Дзмітрый Мірончык.
Усходняе партнёрства: ад Стакгольма да Баку
Намеснік міністра замежных спраў Беларусі Алена Купчына знаходзіцца з рабочым візітам у Стакгольме. Сёння яна прымае ўдзел у нефармальнай сустрэчы намеснікаў міністраў замежных спраў краін — удзельніц Усходняга партнёрства, а таксама Германіі, Польшчы і Швецыі. Па інфармацыі знешнепалітычнага ведамства, мэтай згаданай сустрэчы з'яўляецца абмен думкамі наконт далейшай рэалізацыі гэтай ініцыятывы, у тым ліку ў кантэксце развіцця сітуацыі ў рэгіёне.
Падобная тэматыка будзе абмяркоўвацца і 8-9 верасня ў Баку, дзе адбудзецца чацвёрты раўнд нефармальных міністэрскіх дыялогаў краін — удзельніц Усходняга партнёрства. Мерапрыемства складаецца з дзвюх частак: агульная дыскусія прадстаўнікоў МЗС і тэматычная сустрэча з удзелам міністраў энергетыкі краін — удзельніц ініцыятывы. Беларусь прадставяць намеснік міністра замежных спраў Алена Купчына і намеснік міністра энергетыкі Вадзім Закрэўскі.
Надзея ЮШКЕВІЧ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».