Што галоўнае для мужчыны? Грошы, самасцвярджэнне, сям'я? У XXІ стагоддзі любы адказ на гэтае пытанне можна залічыць як правільны. І кожны павінен выбраць па сабе. Для тых, хто пакуль не вызначыўся ці спыніўся на класічным «сям'я», якраз і створана школа «Бацькоўства».
4 гады таму выкладчык Беларускага дзяржаўнага ўніверсітэта Сяргей Васільевіч Кірпіч прыйшоў у фонд «Сям'я — Яднанне — Айчына» з канкрэтнай ідэяй: «Хачу стварыць школу для бацькаў». Яму далі згоду. З таго часу і ладзяцца сустрэчы для прадстаўнікоў моцнага полу, неабыякавых да пытанняў выхавання дзяцей.
Заняткі праводзяцца са жніўня па снежань ва ўтульным памяшканні сталічнага Дома праваслаўнай кнігі. Там заўжды ветліва сустракаюць гарбатай з цукеркамі і добра ставяцца да кожнага аматара вучыцца. Дарэчы, татам дазваляецца наведваць сустрэчы са сваімі дзеткамі (для іх ёсць асобны пакой).
Калі мерапрыемства некалькі гадоў таму толькі распачыналася, арганізатары настойліва прасілі: «Жанчыны, прыходзьце да нас толькі з мужчынам!» І нават калі няма мужа ці кандыдата на гэтую ролю, шукайце сярод знаёмых таго, хто будзе вас суправаджаць. Гэта, вядома, сказана жартам, але не без долі праўды — усё ж такі сустрэчы ладзяцца перадусім для мужчын.
Усяго за год адбываецца 12 сустрэч «Школы», як 12 крокаў да будаўніцтва моцнага дома пад назвай «Сям'я». На іх можна даведацца пра ролю мужчыны ў сям'і, адметнасць бацькавай любові, важнасць прыняцця адказнасці за сваіх родных ды іншыя аспекты бацькоўства.
На сустрэчы праекта запрашаюцца святары, псіхолагі ды іншыя мужчыны з пазітыўным досведам сямейнага жыцця. Ды і сам Сяргей Васільевіч — тата траіх дзяцей — можа шмат чым падзяліцца. Ён упэўнены, што няма нічога важнейшага для мужчыны, чым роля бацькі.
Найбліжэйшая сустрэча школы «Бацькоўства» адбудзецца 24 верасня а 18-й гадзіне ў Мінску па адрасе: Берасцянская, 17.
Вераніка ПУСТАВІТ
Яшчэ раз пра...
* У Грузіі, пры ўездзе ў гарадок Гурджаані, усталявана 15-метровая скульптура — помнік бацьку, увасоблены ў вобразе героя кінафільма «Бацька салдата» (1964 г.), знятага рэжысёрам Рэзо Чхаідзэ. Адкрыты гэты мемарыяльны комплекс быў 35 гадоў таму ў Дзень Перамогі.
* Вясной гэтага года з'явіўся помнік бацьку і ва Украіне — ён усталяваны на тэрыторыі Данецкага рэгіянальнага цэнтра аховы мацярынства і дзяцінства, проста пад вокнамі раддома.
* У свой час помнік бацьку быў усталяваны ў Брэсце — у 1950-я гады ў ліку іншых скульптур постаць таты з дачкой упрыгожвала гарадскі парк імя 1 Мая. Апошнія некалькі гадоў мясцовыя актывісты прапануюць гарадскім уладам у тым ці іншым выглядзе аднавіць помнік.
Мерапрыемства праводзіцца на добраахвотнай аснове.
Не выявіць ні секунды абыякавасці.