А расійскі рубель чакае ацяпляльнага сезона
Тэндэнцыі апошняга часу на сусветным і айчынным валютных рынках карэспандэнту «Звязды» растлумачыў эксперт кампаніі «ТэлеТрэйд-Беларусь» Міхаіл Грачоў.
У свеце
Апошнія тыдні былі адзначаны істотным умацаваннем курсу долара ЗША. «Прычым гэты рост адбываўся не толькі ў дачыненні да еўра, але і да асноўных сусветных валют, — сцвярджае эксперт. — Адлюстраваннем гэтага з'яўляецца рост індэкса DXY (долар да кошыка шасці сусветных валют). Так, 17 верасня гэтага года індэкс дасягаў максімуму з сакавіка бягучага года. У тым жа трэндзе знаходзілася і пара еўра/долар, якая са значэння 1,38 у канцы красавіка панізілася да 1,28 на 18 верасня. Абумоўлена гэта было ўмацаваннем амерыканскай эканомікі і негатыўнымі паказчыкамі эканомікі Еўрасаюза». Вельмі значнай падзеяй стала пасяджэнне камітэта па адкрытых рынках ФРС ЗША. Па словах Міхаіла Грачова, прынятыя рашэнні (аб пакіданні асноўнай стаўкі на ўзроўні 0,25% і згортванні праграмы колькаснага змякчэння з кастрычніка 2014 года) пацвердзілі прагнозы на далейшае ўмацаванне долара ў найбліжэйшай будучыні. «Таму да канца года магчыма паніжэнне курсу EUR/USD да 1,21 і да канца 2015 года — да 1,10».
Не надта шыкоўна адчувае сябе ўкраінская грыўна. Валюта суседняй краіны праз наступствы палітычнага крызісу, які прывёў да ваенных дзеянняў і эканамічных праблем, стала імкліва таннець. «Зніжэнне курсу грыўны да долара было значным: з 8,221 на 1 студзеня 2014 года да максімальнага 13,757 на 17 верасня. Адназначна, усе далейшыя змены будуць звязаны толькі з урэгуляваннем палітычнай сітуацыі», — заяўляе эксперт.
Праблемы апошнім часам і ў расійскага рубля. Асноўнымі прычынамі рэзкага паніжэння курсу «драўлянага» сталі эканамічныя санкцыі, прынятыя ЗША і краінамі Еўрасаюза, і падзенне кошту нафты з канца жніўня. «У выніку санкцый спекулятыўны капітал выводзіць актывы з расійскай эканомікі. Падзенне коштаў на нафту абумоўлена павелічэннем здабычы сланцавых вуглевадародаў у ЗША, некаторай стабілізацыяй сітуацыі з пастаўкамі нафты з Лівіі і Ірака і зніжэннем тэмпаў росту ВУП у Кітаі». З іншага боку, павышэнне курсу долара прывяло да павелічэння паступленняў у бюджэт Расійскай Федэрацыі, і, паводле звестак Міністэрства фінансаў РФ, прафіцыт за студзень—жнівень склаў 906,516 млрд рублёў, або 2,2% ад ВУП. «Вось так дэвальвацыя ва ўмовах экспартаарыентаванай эканомікі дае станоўчыя вынікі, — канстатуе аналітык. — Адмена санкцый у выпадку стабілізацыі палітычнага крызісу ва Украіне і павышэнне коштаў на вуглевадароды з надыходам ацяпляльнага сезона, безумоўна, прывядзе да ўмацавання расійскай валюты».
У Беларусі
Зніжэнне курсу беларускага рубля праходзіць у рамках абвешчанай Нацыянальным банкам плаўнай дэвальвацыі. «Палітыка рэгулятара вядзе да павелічэння рублёвай даходнасці прадпрыемстваў-экспарцёраў. А гэта, у сваю чаргу, вядзе да большага напаўнення бюджэту краіны, — разважае Міхаіл Грачоў. — Па выніковых звестках першага паўгоддзя, прырост рэальнага ВУП склаў 1,6%. Адзначаны рост у хімічнай і горназдабыўнай прамысловасці, што павінна даць павелічэнне ВУП па выніках года. Усё гэта, у сукупнасці з крэдытамі ўрада Расійскай Федэрацыі, дае падставы бачыць курс беларускага рубля ў дачыненні да долара ЗША ў раёне 10800 рублёў за долар».
За апошні тыдзень еўра падаражэў на 30 рублёў (плюс 0,2%) да 13590. Долар таксама вырас — на 50 рублёў (плюс 0,5%) да 10540. Расійскі рубель страціў адразу 5 грашовых адзінак (мінус 1,8%) да 274.
Уладзіслаў КУЛЕЦКІ
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
«Мы зацікаўлены, каб да нас прыязджалі».