Фундамент для пошукаў

Апублікавана ў газеце "Літаратура і мастацтва" №37

___________________________________________________________________________

Пухавіцкі край багаты на славутых ураджэнцаў, якія засведчылі сябе ў выяўленчым мастацтве. Генрых Бржазоўскі рабіў партрэты народных мсціўцаў у пухавіцкіх лясах у Вялікую Айчынную вайну. Барыс Рэпін, мастак кіно, нарадзіўся ў Мар’інай Горцы. З горадам і раёнам звязаны жыццё і творчасць жывапісцаў Аляксандра Пашкевіча, Аляксандра Дасужава, Вольгі Калацэй, Хведара Ладуцькі… Новае імя сярод пухавіцкіх мастакоў Дар’я Раманенка.

Выстаўка працуе ў Пухавіцкім раённым краязнаўчым музеі. Увазе гледачоў прадстаўлены цікавыя работы дзяўчыны, у якіх прасочваюцца лепшыя традыцыі беларускага жывапісу. Дарэчы, да паступлення ў Акадэмію мастацтваў Дар’я закончыла Мінскую гімназію-каледж імя І. У. Ахрэмчыка.

― Варта зазначыць, што традыцыі маладая мастачка спалучае з пошукам, наватарствам, ― адзначыў на адкрыцці выстаўкі кандыдат мастацтвазнаўства Яўген Шунейка, які добра ведае творцу па вучобе ў акадэміі. ― Настойлівасць, з якой студэнтка працуе над выкананнем абавязковых заданняў, становіцца асновай, фундаментам для яе пошукаў.

“Бліжэй да чалавека” ― гэта сапраўдная магчымасць зазірнуць у вочы многіх персанажаў. Гледачы становяцца ўдзельнікамі своеасаблівага свята адкрыццяў. Мастачка не навязвае сваіх поглядаў. Яна толькі дапамагае пераканацца ў першынстве тых ці іншых колераў. Часам складваецца ўражанне, што Дар’я абавязвае нас пазнаёміцца са сваімі героямі, пераконвае, што праз партрэты дапамогуць адкрыць штосьці дагэтуль невядомае.

― Гэта ўжо не першая сустрэча гледачоў з работамі Дар’і ў карціннай галерэі нашага музея, ― распавёў дырэктар Пухавіцкага раённага краязнаўчага музея Аляксандр Прановіч. ― Мы ладзілі яе выстаўку яшчэ да паступлення дзяўчыны ў Акадэмію мастацтваў. У прафесійны жывапіс уваходзіць апантаны, дзеяздольны, перспектыўны творца.

Мікола БЕРЛЕЖ