У свой час Пётр І, ствараючы корпус ваенных тапографаў, прапісаў у статуце, што ваеннымі тапографамі могуць быць толькі афіцэры дваранскага саслоўя. І невыпадкова: са стварэннем картаў, інжынерна-тэхнічнымі даследаваннямі мясцовасці маглі справіцца толькі адукаваныя асобы. Сучасныя тапографы і картографы не саступаюць сваім папярэднікам. Вядома, класавая прыналежнасць спецыялістаў сёння не адыграе ролі, але тым не менш, як правіла, гэта людзі з вышэйшай адукацыяй, высокакваліфікаваныя прафесіяналы, якія валодаюць глыбокімі ведамі аб усіх фізічных працэсах, што адбываюцца на зямлі.
Менавіта такія і працуюць у 31‑м навігацыйна-тапаграфічным цэнтры Узброеных Сіл нашай краіны. Ваенныя тапографы, картографы і геадэзісты — пераемнікі 2‑га матарызаванага тапаграфічнага атрада, які быў сфарміраваны ў красавіку 1933 года ў Смаленску. Сёння гэта ўнікальная вайсковая часць, якая складаецца з некалькіх падраздзяленняў. У кожнага з іх — свая спецыфіка. Даведацца якая, пашчасціла якраз падчас тактыка-спецыяльных вучэнняў — перыяду праверкі магчымасцяў цэнтра практычна выканаць задачы па прызначэнні. У час, калі ўсе карты адкрыты — вядома, за выключэннем тых, якія змяшчаюць сакрэтную інфармацыю. А ў прамым сэнсе — тады, калі ўсё максімальна прыбліжана да баявога становішча.
Даследчыкі беларускага рэльефу
У навігацыйна-геадэзічнай часці цэнтра людзей не густа. Працу, вядома, ніхто не прагульвае: спецыялісты ў полі — даследуюць мясцовасць. Аб'ездзілі ўсю Беларусь. Няма такога кавалка зямлі, на які б не мелася свая карта. На адной і той жа мясцовасці спецыялістам даводзіцца бываць неаднойчы. А ўсё таму, што, як казаў Геракліт, усё цячэ, усё змяняецца. Некалькі гадоў таму тут была вялікая вёска, а зараз — усяго некалькі хат. Ці на гэтым месцы раней расло дрэва, а цяпер яго няма. Праклалі дарогу, вырубілі лес, выкапалі возера — усе змены фіксуюць ваенныя тапографы і геадэзісты.
—Любыя новыя звесткі вельмі важныя для нас, — расказвае начальнік навігацыйна-інфармацыйнага аддзялення Леанід КОР'ЕЎ. — Па прыездзе ў цэнтр абнаўляем тапаграфічныя карты, сістэматызуем і апрацоўваем атрыманую палявым метадам інфармацыю, як і тую, што зафіксавалі касмічныя апараты навігацыйных сістэм.
Бывае, што адначасова (праўда, на розных аб'ектах) працуе не адна каманда геадэзістаў і тапографаў. Іх называюць разлікамі — афіцэр і тры салдаты тэрміновай службы. Сярод апошніх, дарэчы, выпадковых людзей няма. Ва ўзвод тапаграфічнага забеспячэння прызываюцца юнакі з добрым веданнем матэматыкі і фізікі. Неаднойчы трапляліся прызыўнікі з вышэйшай адукацыяй, нават са спецыяльнай. Тыя, у каго яе няма, праходзяць курс маладога байца, засвойваюць тактыка-спецыяльную падрыхтоўку, вучацца валодаць прыборамі — і ў поле.
На той момант, калі намеснік начальніка тапагеадэзічнага аддзялення Сяргей Дзятлаў вырашыў звязаць свой лёс з тапаграфіяй і картаграфіяй, у Беларусі такіх спецыялістаў не рыхтавалі. Прафесію атрымліваў у Санкт-Пецярбургскім ваенна-тапаграфічным інстытуце (цяпер Ваенна-касмічная акадэмія імя Мажайскага). Па спецыяльнасці Сяргей — картограф. У навігацыйна-геадэзічнай часці павышае сваю кваліфікацыю: хоча быць асам у сваёй справе.
Своеасаблівая праверка ваенных геадэзістаў і тапографаў на прафпрыдатнасць — вучэнні. Ніводнае вучэнне не адбудзецца без іх папярэдняй працы. Танк не паедзе па мясцовасці, пакуль экіпаж не будзе валодаць яе характарыстыкамі. Ніякая іншая тэхніка без звестак аб грузападымальнасці не рызыкне пераадолець пэўны мост.
— Зараз актыўна развіваюцца аўтаматызаваныя сістэмы кіравання, усё пераводзіцца на сродкі вылічальнай тэхнікі, — гаворыць начальнік навігацыйна-тапаграфічнай службы Узброеных Сіл — начальнік навігацыйна-тапаграфічнага ўпраўлення Генеральнага штаба палкоўнік Дзмітрый ЛУК'ЯНЕНКА. — Але як бы далёка ні крочыў наперад тэхнічны прагрэс, без папяровай карты ўсё роўна войскі ў бой не пойдуць. У той жа час, калі раней мы выконвалі работы звычайнымі геадэзічнымі прыборамі і інструментамі, то цяпер пераходзім на спадарожнікавыя тэхналогіі: развіваецца амерыканская сістэма GPS, укараняецца расійская GLONAS. Гэта ўсё дазваляе ў разы скараціць час на выкананне задач. Тое, што раней рабілі дзень-два, цяпер займае ўсяго некалькі гадзін. Прычым дакладнасць застаецца такой жа высокай.
Справа жаночых рук — і цярпення
Пасля таго, як тапографы і геадэзісты апрацавалі атрыманыя звесткі, яны трапляюць у часць стварэння лічбавай інфармацыі аб мясцовасці. Тут уладараць спецыялісты па геаінфармацыйных сістэмах.
— На аснове картаграфічнага матэрыялу — а гэта, часцей за ўсё, фотадакументы мясцовасці, старыя тапаграфічныя карты, даныя геадэзічных вымярэнняў — мы ствараем электронныя карты мясцовасці, — уводзіць у курс справы намеснік начальніка 1‑га аддзялення стварэння электронных картаў старшы лейтэнант Міхаіл ЗАПРУЦКІ. — Гэтыя карты прызначаны не толькі для ваенных: імі могуць карыстацца прадстаўнікі і іншых сфер дзейнасці. Вядома, у выніку пэўнай дамоўленасці. У межах сістэмы ўзаемаабмену наш цэнтр узаемадзейнічае з многімі грамадскімі арганізацыямі, у тым ліку з «Белгеадэзіяй».
Цікава, што ў часці стварэння лічбавай інфармацыі аб мясцовасці большасць спецыялістаў складае грамадзянскі персанал. Сярод іх — амаль усе жанчыны, у тым ліку і кіраўніца. Як прызнаецца начальнік часці падпалкоўнік Людміла БУДНІК, стварэнне картаў — вельмі карпатлівая праца, з якой могуць справіцца толькі жанчыны. «У гэтай справе неабходны ўседлівасць і ўважлівасць. Як правіла, нашы моцныя мужчыны гэтай манатоннай працы не вытрымліваюць».
Людміла Буднік у навігацыйна-тапаграфічным цэнтры — старажыл. Высокай пасадзе папярэднічалі доўгія 16 гадоў плённай працы. А пачынала грамадзянскім інжынерам у картаскладальніцкім аддзяленні.
Калі са стварэннем картаў усё зразумела, то што тычыцца трымання сакрэтнасці, цяжка сказаць, каму — мужчынам ці жанчынам — гэта ўласціва. Тут яе ўмеюць захоўваць усе. Як ні кажы, а праца абавязвае: што ні карта, то пад грыфам «сакрэтна». Кожны спецыяліст, перш чым працаваць з такімі дакументамі, нават здае іспыт на допуск. Аднак, як лічаць самі картографы, самы лепшы экзаменатар у забеспячэнні сакрэтнасці — асабістая самасвядомасць.
Прафесія — з перспектыўных
Рэдакцыйная часць. Тут ажыццяўляюцца рэдакцыйна-падрыхтоўчыя работы. Абагульняецца і аналізуецца інфармацыя аб фізіка-геаграфічных асаблівасцях раёнаў, ствараюцца спісы каардынат спецыяльнай геадэзічнай сеткі, вядзецца ўлік і захоўванне сродкаў геадэзічнай інфармацыі…
— У першую чаргу, наша падраздзяленне займаецца карэктурай лістоў ужо гатовых картаў, — расказвае начальнік рэдакцыйнай часці падпалкоўнік Сяргей КНЯЗЕЎ. — Працэс не з хуткіх: знайшлі памылкі — аддалі ў часць стварэння лічбавай інфармацыі аб мясцовасці, знайшлі паўторна — зноў на выпраўленне. Пасля канчатковай праверкі ў аддзеле тэхнічнага кантролю і сертыфікацыі дакументы вяртаюцца да нас, дзе захоўваюцца ў банку лічбавых картаграфічных даных.
Ва ўсе тонкасці прафесіі ўнікаюць Павел Купцэвіч і Кірыл Забагонскі. Юнакі — учарашнія выпускнікі ваеннага факультэта БДУ. Вучыліся па спецыяльнасці «геаінфармацыйныя сістэмы». Як кажуць былыя аднагрупнікі, з працаўладкаваннем ім вельмі пашанцавала: навігацыйна-тапаграфічны цэнтр, на іх погляд, — самае перспектыўнае месца ў прафесіі. Сюды працаўладкавацца жадаюць многія. Як прызналіся афіцэры, ажыццявіць мару дапамог высокі рэйтынг ва ўніверсітэце.
— Тэхніка і спецыяльнае праграмнае забеспячэнне становяцца ўсё навейшымі, што адбіваецца на падрыхтоўцы спецыялістаў ваеннага ведамства, — перакананы начальнік 31‑га навігацыйна-тапаграфічнага цэнтра палкоўнік Юрый САВІНЫХ. — Вядома, асноўную спецыяльнасць яны атрымліваюць на ваенных факультэтах грамадзянскіх ВНУ і ў вышэйшых ваенных навучальных установах, у тым ліку Расійскай Федэрацыі. У цэнтры ж яны засвойваюць непасрэдна той узор тэхнікі і абсталявання, на якім будуць працаваць. Нашы афіцэры рэгулярна наведваюць усе курсы, якія праводзяцца Міністэрствам абароны, павышаюць сваю кваліфікацыю на іншых тэматычных мерапрыемствах.
Свая друкарня і нават «цэнзура»
Канчатковае звяно ў працэсе стварэння тапаграфічных картаў і іншых дакументаў — выдавецкая часць. Тут працуюць сапраўдныя прафесіяналы выдавецкай справы. А дапамагае ім рабіць гэта прыгожа і якасна новае паліграфічнае абсталяванне.
— Пасля таго, як прадукцыя надрукавана, яе прымае аддзел тэхнічнага кантролю і сертыфікацыі, — гаворыць начальнік выдавецкай часці падпалкоўнік Андрэй НЕКРАШЭВІЧ. — Калі ў нашых калег няма ніякіх заўваг, то друкаваная прадукцыя спакоўваецца і перадаецца на склад тапаграфічных картаў, які знаходзіцца ў пасёлку Краснае. Менавіта адсюль органы ваеннага кіравання і вайсковыя часці атрымліваюць карты пэўнай мясцовасці.
А калі ўсё ж такі заўвагі ёсць, карта патрабуе дапрацоўкі. Нават зусім невялічкая недакладнасць не застанецца незаўважанай спецыялістамі аддзела тэхнічнага кантролю і сертыфікацыі цэнтра. Тут галоўны «цэнзар» — Леанід Лук'яненка. Леанід Адамавіч — тапограф з 55‑гадовым стажам. Тапографа-геадэзічныя і картаграфічныя работы выконваў на тэрыторыі ад Калінінградскай вобласці да Ціхага акіяна, некалькі гадоў працаваў у Лацінскай Амерыцы.
— Без наяўнасці тапаграфічных картаў, геадэзічных даных немагчыма выкананне абсалютна любых задач: і ў народнай гаспадарцы, і ў навуцы, і ў адукацыйнай сферы, а асабліва ва Узброеных Сілах, — мяркуе майстар сваёй справы.
І з гэтым цяжка не пагадзіцца: наколькі дакладнай будзе тапаграфічная разведка, настолькі паспяховым атрымаецца бой. А лепш, калі яго не будзе!
Вераніка КАНЮТА
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!