Узяўшы іх на ўзбраенне, cталічныя камунальнікі рыхтуюцца сустракаць зіму
Лісце на дрэвах яшчэ зялёнае, а ў Мінску ўжо выкананы практычна ўсе мерапрыемствы па падрыхтоўцы да асенне-зімовага перыяду. Да працы гатовы 171 уборачная машына, 12 камбінаваных дарожных машын, 23 пагрузчыкі. Уборачная тэхніка ўкамплектавана вадзіцельскім складам. Гэта з традыцыйных захадаў. Аднак сёлета гарадскія службы камунальнай гаспадаркі вырашылі ўзяць на ўзбраенне некаторыя ноу-хау для барацьбы з галалёдам і сумётамі.
Так, у горадзе праектуюць стацыянарныя плавільні для снегу. Неабходнасць у іх узнікла таму, што пляцоўкі для снегу падбіраць з кожным годам становіцца ўсё цяжэй. Спецыяльныя шахты, куды будзе скідвацца снег, створаць на базе каналізацыйных калектараў КУВП «Мінскводаканал». Там снег будзе раставаць пры дапамозе каналізацыйных вод, а адталая вада — ачышчацца. Ствараць шахты для плаўлення снегу плануецца на базе калектараў, размешчаных удалечыні ад жылля і адміністрацыйных будынкаў. Такім чынам плануецца растопліваць 80% снегу. У Мінску ўжо вызначаны тры кропкі, дзе будуць арганізаваны снегаплавільныя комплексы. Пазней з'явяцца яшчэ каля 10 пляцовак для шахт, каб праз 3—4 гады на тэрыторыі горада засталіся толькі адзінкавыя снежныя палігоны.
А для барацьбы з галалёдам у сталіцы да 15 лістапада плануецца нарыхтаваць 8 тысяч тон пясчана-салянай сумесі і 370 тон процігалалёдных хімічных рэагентаў. Будзе таксама зроблена сумесь на аснове меласы (адходаў цукровай прамысловасці), якой будуць апрацоўваць усе дваровыя тэрыторыі горада. Гэты прэпарат звязвае кісларод у вадкасці, што дазваляе на 80% паменшыць карозію металу, а значыць, робіць зімовыя дарогі больш бяспечнымі для аўтамабіляў.
Апроч таго, на пасяджэнні Мінгарвыканкама, прысвечаным пытанням гатоўнасці гарадской гаспадаркі да работы ў асенне-зімовы перыяд, намеснік міністра жыллёва-камунальнай гаспадаркі Анатоль ШАГУН заявіў, што цеплавыя сеткі Мінска гатовы да ацяпляльнага сезона і праблем з ацяпленнем не ўзнікне. Разам з тым, намеснік міністра адзначыў, што ў горадзе існуе праблема старэння цеплавых сетак. «У непасрэдным падначаленні Мінгарвыканкама знаходзяцца дзве сістэмы, якія забяспечваюць ацяпленне горада, стан сеткавай гаспадаркі якіх істотна адрозніваецца. Калі ў КУП «Мінсккамунцепласетка» звыш нарматыўнага тэрміну працуе толькі 24% сетак і выпрабаванні яны праходзяць досыць паспяхова (колькасць пашкоджанняў не перавышае 0,3 на 1 км), то ў сістэме РУП «Мінскэнерга» колькасць сетак са звышнарматыўным тэрмінам службы блізкая да 65%, а каэфіцыент пашкоджанняў складае каля 0,5 на 1 км», — заўважыў Анатоль Шагун. У сваю чаргу, памочнік Прэзідэнта — галоўны інспектар па горадзе Мінску Аляксандр ЯКАБСОН звярнуў увагу на тое, што за апошнія гады РУП «Мінскэнерга» істотна скараціла аб'ём замены цепласетак, а гэта прывяло да павелічэння колькасці пашкоджанняў. Прадпрыемства не выконвае пастанову ўрада, якая абавязвае замяняць не менш за 4% цепласетак на год. Па выніках пасяджэння РУП «Мінскэнерга» рашэннем Мінгарвыканкама абавязалі штогод рэканструяваць не менш за 100 км сетак.
Дзіяна СЕРАДЗЮК
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.