У канцы верасня — пачатку кастрычніка ў Ганконгу прайшлі магутныя вулічныя дэманстрацыі, якія заходнія СМІ тут жа ахрысцілі «рэвалюцыяй руж». У чым прычына цяперашніх пратэстаў у Ганконгу?
Тут мноства фактараў. Перш за ўсё, праблема ў розным успрыманні свету мацерыковым кітайцам і жыхаром Ганконга. У першага вельмі моцныя патрыятычныя пачуцці — ён хоча, каб яго краіна стала вялікай і магутнай, і ўзровень жыцця ў ёй узняўся да ўзроўню таго ж Ганконга праз паступальнае развіццё кітайскай эканомікі. І ў яго няма падстаў для незадаволенасці кіруючай Камуністычнай партыяй, пры якой з 1970-х гадоў узровень жыцця ў краіне вырас разоў у 60-70.
Аднак культурнае, сацыяльнае і палітычнае асяроддзе Ганконга фарміравалася брытанскім урадам. Так, насельнікі горада з'яўляюцца кітайцамі, але кітайцамі дастаткова спецыфічнымі. Яны жылі і выхоўваліся ў зусім іншай культурнай і сацыяльнай парадыгме, якая створана чыноўнікамі брытанскага ўрада і адпавядае нацыянальным інтарэсам Вялікабрытаніі. Людзі вучыліся або ў Вялікабрытаніі, або ў брытанскіх школах на тэрыторыі Ганконга, сталі носьбітамі пэўнага набору заходніх ліберальна-дэмакратычных каштоўнасцяў.
Таксама на менталітэт жыхароў горада вельмі сур'ёзны ўплыў аказалі падзеі 1997 года, калі брытанскі ўрад вярнуў горад Кітаю, не спытаўшы пры гэтым у мясцовага насельніцтва, ці хоча яно вяртацца. Многія гэта ўспрынялі негатыўна, паколькі на момант перадачы горада ўзровень жыцця ў ім быў значна вышэйшы, чым нават у самых паспяховых гарадах мацерыковага Кітая Пекіне і Шанхаі (не кажучы ўжо пра сярэднекітайскі ўзровень у цэлым).
На тэрыторыі горада сканцэнтраваны штаб-кватэры шэрагу найбуйнейшых сусветных транснацыянальных карпарацый. Таму некаторыя жыхары горада палічылі абразай для сябе гэтую перадачу. І ўвесь гэты час яны захоўвалі сімпатыі да таго ладу, які быў пры брытанцах. Усе гэтыя гады напружанасць узмацнялася, і цяпер фактычна выплюхнулася вонкі.
Калі Ганконг вярталі Кітаю, умовы вяртання і «патуранні» для жыхароў Ганконга былі прапісаны вельмі прыблізна. Галоўным лічылі прынцып «адна краіна — дзве сістэмы», а пра канкрэтыку тады неяк не падумалі. Брытанцы, вядома, спрабавалі правесці максімальную колькасць асаблівых правоў для жыхароў Ганконга, але кітайскі ўрад па шэрагу пытанняў адмаўляўся ісці на сур'ёзныя ўступкі.
З іншага боку, Пекін таксама можна і трэба зразумець. Кітайская Народная Рэспубліка не хоча мець на тэрыторыі Ганконга сур'ёзныя праблемы, створаныя выбарам насельніцтвам празаходняга палітычнага дзеяча. Таму Кітай абараняе свае інтарэсы на сваёй спрадвечнай зямлі, пазычанай Вялікабрытаніяй у свой час пры вельмі непрывабных абставінах, і заклікае мясцовае насельніцтва паважаць кітайскія законы.
Увогуле ж жыхарам Ганконга трэба прывыкаць да таго, што яны кітайцы, вучыцца падзяляць каштоўнасці, распаўсюджаныя на тэрыторыі мацерыковага Кітая. Большасць людзей сярэдняга ўзросту, дарэчы, гэта разумее і спрабуе адаптавацца. А вось нонканфармісцкая радыкальная моладзь, якая, як звычайна, хоча ўсё і адразу, адмаўляецца — і выходзіць на вуліцы.
Многія эксперты сцвярджаюць, што пратэсты былі інспіраваны ЗША. Але тут больш важна тое, што гэтую руку бачаць самі кітайцы. Насельніцтва мацерыковага Кітая наогул схільнае ўскладаць на ЗША віну не толькі за хваляванні ў Ганконгу, але і за шэраг іншых негатыўных падзей, што адбываюцца на тэрыторыі Кітая апошнім часам (тэракты ў буйных гарадах, беспарадкі ў Сіньцзян-Уйгурскай аўтаномнай акрузе). Журналісты, палітолагі і звычайныя людзі практычна адзіныя ў думцы, што гэтыя падзеі сталі пакараннем Пекіну за яго спрэчкі з Вашынгтонам у пытаннях сусветнай палітыкі. У прыватнасці, Ганконг стаў помстай за тое, што ў апошнія месяцы Кітай занадта цесна збліжаецца з Расійскай Федэрацыяй.
Што да рэальнасці, то, вядома, з пункта гледжання класічнай геапалітыкі Злучаным Штатам і Вялікабрытаніі выгадна інспіраваць беспарадкі на тэрыторыі Кітая. КНР развіваецца так добра і так паспяхова, што гэта выклікае панічны страх у заходніх урадаў.
Так, амерыканцы ўсур'ёз асцерагаюцца за сваю палітычную будучыню, і не толькі ў рэгіёне Усходняй Азіі, але і ў свеце ў цэлым. І ўлічваючы, што ў пытаннях знешняй палітыкі ні Вашынгтон, ні Лондан ніколі асабліва не саромеліся сумніўных метадаў, я не буду моцна здзіўлены, калі яны насамрэч прыклалі руку да распальвання ўнутранага канфлікту ў Ганконгу праз мясцовыя фонды або сродкі масавай інфармацыі. Такім чынам яны спрабуюць трывожыць канкурэнта і ствараць унутраныя перашкоды на шляху яго развіцця і экспансіі.
Але калі паглядзець на сітуацыю са стратэгічнага пункту гледжання, то амерыканцам і брытанцам не трэба было б удзельнічаць у ганконгскіх падзеях або іншых беспарадках на тэрыторыі Кітая, не кажучы ўжо пра тое, каб інспіраваць іх. Усё гэта выклікае вельмі сур'ёзнае раздражненне ў кітайскай эліты і насельніцтва, перашкаджае збліжэнню паміж Кітаем і Захадам і робіць узвышэнне Паднябеснай вельмі небяспечным для ЗША і Еўропы працэсам.
Нарэшце, падзеі ў Ганконгу могуць замарудзіць працэс палітычнай рэформы ў Кітаі, што таксама не ў інтарэсах Захаду. Пекіну важна не проста ўкараняць на тэрыторыі Кітая нейкія абстрактныя дэмакратычныя працэдуры, а рабіць гэта акуратна і паступова, каб працэс узвышэння Кітая не быў спынены. І калі на прыкладзе Ганконга Кітай убачыць, што працэс дэмакратызацыі можа страціць кіравальнасць і павышае рызыку дэстабілізацыі краіны, то ён перагледзіць свой падыход.
Сяргей КІЗІМА,
доктар палітычных навук
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.