Аб гэтым учора паведаміў першы намеснік прэм'ер-міністра Беларусі Уладзімір Сямашка на адкрыцці выставы EnergyExpo.
У прыватнасці, намеснік кіраўніка ўрада адзначыў, што пасля правядзення маштабнай мадэрнізацыі знос актыўнай часткі асноўных фондаў беларускай энергасістэмы летась склаў 43%, а па выніках года сёлета гэты паказчык знізіцца да 38%. Нагадаю, што ў пачатку 2000-х гадоў ён адзначаўся на ўзроўні 83%.
Увядзенне новых сучасных магутнасцяў прывяло да таго, што за апошняе дзесяцігоддзе айчынная энергетычная сістэма скараціла энергаёмістасць ВУП прыкладна ў тры разы. Уладзімір Сямашка паведаміў, што сёлета ў краіне працягваецца будаўніцтва 168 аб'ектаў па праграме «малой энергетыкі», дзе кацельні дзейнічаюць на мясцовых відах паліва. На перспектыву пастаўлена задача, каб у нас 30-32% цеплавой і электрычнай энергіі выраблялася менавіта на мясцовых відах паліва.
Адкрываючы міжнародную выставу, міністр энергетыкі Беларусі Уладзімір Патупчык паведаміў, што ўдзельнікі экспазіцыі маюць магчымасць прадэманстраваць лепшыя ўзоры прадукцыі, набыць найноўшае абсталяванне, заключыць доўгатэрміновыя і ўзаемавыгадныя кантракты.
Выстава EnergyExpo з'яўляецца адным з мерапрыемстваў XІX Беларускага энергетычнага і экалагічнага форуму, які праходзіць у Мінску з 14 па 17 кастрычніка. Форум таксама ўключае ІX Міжнародную спецыялізаваную выставу «Водныя і паветраныя тэхналогіі», X Спецыялізаваную выставу святлотэхнічнага абсталявання «Экспасвятло» і XІX Беларускі энергетычны і экалагічны кангрэс.
На міжнароднай спецыялізаванай выставе «Энергетыка. Экалогія. Энергазберажэнне. Электра» EnergyExpo прадстаўлена прадукцыя больш за 320 прадпрыемстваў і арганізацый з 15 краін. Прыкладна пятая частка ўдзельнікаў — замежныя экспаненты, у тым ліку прадстаўнікі Аўстрыі, Германіі, Італіі, Кітая, Фінляндыі, Францыі, Чэхіі, Літвы, Польшчы і Турцыі. У структуры экспазіцыі прадугледжаны галіновыя раздзелы для міністэрстваў энергетыкі, прамысловасці, прыродных рэсурсаў і аховы навакольнага асяроддзя, жыллёва-камунальнай гаспадаркі, Дзяржаўнага камітэта па навуцы і тэхналогіях, Дэпартамента па энергаэфектыўнасці Дзяржстандарта.
У выставе прымаюць удзел вядучыя прадпрыемствы энергетычнай галіны Беларусі, у тым ліку ААТ «Белэнергарамналадка», РУП «Белэлектрамантажналадка» і іншыя. Са сваёй прадукцыяй, вядомай як у Беларусі, так і за мяжой, пазнаёмяць прадпрыемствы і арганізацыі, якія ўваходзяць у склад канцэрна «Белпалівагаз»: прадпрыемствы «Белгазтэхніка» і «Белгіпрагаз», таварыства «Навагрудскі завод газавай апаратуры».
На экспазіцыях выставы наведвальнікі змогуць азнаёміцца з сучаснымі распрацоўкамі ў сферы энергетыкі, экалогіі і энергазберажэння вядомых замежных кампаній Sіemens, Caterpіllar і Turbomach.
1 млрд кВт/гадзін украінскай электраэнергіі
Налета Мінэнерга Беларусі разглядае магчымасць імпарту электраэнергіі з Украіны. Агульны аб'ём энергетычнага імпарту з гэтай краіны можа дасягаць 1 млрд кВт/гадзін, паведаміў напярэдадні пленарнага пасяджэння трэцяга Беларуска-германскага энергетычнага форуму першы намеснік міністра энергетыкі Беларусі Леанід Шанец. Разам з тым, канчатковае рашэнне будзе прынята ў лістападзе-снежні, сказаў першы намеснік кіраўніка ведамства. Цяпер праводзяцца перамовы з пастаўшчыкамі. Усяго ў 2015 годзе Беларусь плануе імпартаваць 2,5 млрд кВт/гадзін электраэнергіі.
Сяргей КУРКАЧ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».