Пенсіі грамадзянам Беларусі, якія пастаянна пражываюць у Расіі, і грамадзянам Расіі, якія пастаянна пражываюць у Беларусі, будуць выплачвацца ў больш раннія тэрміны — ужо ў пачатку трэцяга месяца квартала. Пра гэта заявіў намеснік міністра працы і сацыяльнай абароны Беларусі Ігар Старавойтаў на сумесным пасяджэнні калегій міністэрстваў працы і сацыяльнай абароны Беларусі і Расіі.
Сёння пенсія гэтым катэгорыям грамадзян выплачваецца праз банкі штоквартальна ў другой палове апошняга месяца квартала ў дзяржаўнай валюце краіны пражывання пенсіянера. Справа ў тым, што для выплаты пенсій адпаведныя органы абменьваюцца аплатнымі ведамасцямі да 10-га чысла трэцяга месяца квартала.
Цяпер для стварэння больш роўных умоў для атрымання пенсій грамадзянамі Беларусі, якія пастаянна пражываюць у Расіі, і грамадзянамі Расіі, якія пастаянна пражываюць у Беларусі, будзе перанесены тэрмін абмену аплатнымі ведамасцямі на выплату пенсій і аб пераводзе грошай для выплаты пенсій з трэцяга месяца квартала на другі. Такі крок дазволіць забяспечыць выплату пенсій у больш раннія тэрміны.
Акрамя таго, цяпер кампетэнтныя органы Беларусі і Расіі штогод да 15 студзеня абменьваюцца адпаведнымі спісамі атрымальнікаў пенсій па стане на 31 снежня кожнага года. Для гэтага патрабуецца штогадовае запрашэнне пенсіянераў у органы па працы, занятасці і сацыяльнай абароне Беларусі і тэрытарыяльныя падраздзяленні Пенсійнага фонду ў Расіі з дакументамі, якія сведчаць іх асобу. Пасля адпаведных кансультацый двух бакоў была выпрацавана прапанова аб скасаванні патрабаванняў аб штогадовым абмене спісамі атрымальнікаў пенсій. Гэта дазволіць спрасціць працу спецыялістаў, а таксама зняць пэўныя нараканні пенсіянераў, незадаволеных неабходнасцю штогод праходзіць гэтую працэдуру.
Святлана Бусько.
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.