Дэлегаты МПС у Жэневе адзначылі высокі ўзровень вырашэння пытання гендарнай роўнасці ў Беларусі

Дэлегаты 131-й Асамблеі Міжпарламенцкага саюза адзначылі высокі ўзровень вырашэння пытання гендарнай роўнасці ў Беларусі, паведамілі БЕЛТА ў прэс-службе Палаты прадстаўнікоў па выніках удзелу парламенцкай дэлегацыі ў Асамблеі МПС у Жэневе (Швейцарыя).

У склад беларускай дэлегацыі ўвайшлі старшыня Пастаяннай камісіі Палаты прадстаўнікоў па правах чалавека, нацыянальных адносінах і сродках масавай інфармацыі Андрэй Навумовіч і намеснік старшыні Пастаяннай камісіі Палаты прадстаўнікоў па ахове здароўя, фізічнай культуры, сямейнай і маладзёжнай палітыцы Алена Шамаль. Узначальваў дэлегацыю старшыня Пастаяннай камісіі Савета Рэспублікі па міжнародных справах і нацыянальнай бяспецы Уладзімір Сянько.

Члены парламенцкай дэлегацыі ад Беларусі актыўна працавалі на пасяджэннях пастаянных органаў МПС, удзельнічалі ў агульнай дыскусіі асамблеі, галоўная тэма якой была прысвечана пытанням гендарнай роўнасці. Алена Шамаль прадставіла міжнароднай аўдыторыі даклад на тэму "Дасягненне гендарнай роўнасці і спыненне насілля адносна жанчын", пабудаваны на аснове нацыянальнага тэматычнага вопыту. Выступленне дэпутата станоўча ўспрынята ўдзельнікамі мерапрыемства. Акрамя таго, Алена Шамаль прыняла ўдзел у форуме маладых парламентарыяў і ў Каардынацыйным камітэце жанчын-парламентарыяў. "Дэлегатамі МПС адзначаны высокі ўзровень вырашэння пытання гендарнай роўнасці ў Беларусі", - расказалі ў прэс-службе.

Андрэй Навумовіч удзельнічаў у абмеркаванні праекта рэзалюцыі "Міжнароднае права ў кантэксце нацыянальнага суверэнітэту, неўмяшання ва ўнутраныя справы дзяржаў і правоў чалавека" Пастаяннага камітэта МПС па дэмакратыі і правах чалавека. Дэбаты па праекце і канчатковае прыняцце рэзалюцыі былі перанесены на вясенняе пасяджэнне камітэта ў 2015 годзе.

Акрамя таго члены беларускай дэлегацыі прынялі ўдзел у рабоце 195-й сесіі Кіруючага савета Міжпарламенцкага саюза, на якой быў выбраны новы старшыня МПС - прадстаўнік Бангладэш Сабер Чаўдхары, а таксама ў пасяджэннях геапалітычнай групы "Еўразія".

У ходзе 131-й Асамблеі МПС праведзены сустрэчы беларускіх парламентарыяў з кіраўнікамі і членамі парламенцкіх дэлегацый Арменіі, Бангладэш, Вялікабрытаніі, Германіі, Камбоджы, Літвы, Пакістана, Польшчы, Расіі, Сірыі, Чэхіі.

Усяго ў рабоце асамблеі ўдзельнічалі 744 парламентарыі з 141 краіны, у тым ліку 104 старшыні і намеснікі старшыні парламентаў.