Беларуская мода ёсць! Яна выбарчая, яркая, унікальная і непаўторная, мае свой характар. Доказ гэтаму - штогадовы конкурс маладых дызайнераў New Names Belarus Fashion Week, які дае ўнікальную магчымасць гучна заявіць пра сябе і прыадчыняе тые самыя запаветныя дзверы ў закуліссе беларускай fashion-індустрыі. Конкурс - гэта сапраўднае адкрыццё творчасці, дызайнерскай думкі, урачыстасць густу і натхнення.
У гэтым сезоне ўсе ўдзельнікі праекту New Names павінны былі прытрымлівацца дэвізу «I love BFW, I love Belarus». А гэта значыць, што перад дызайнерамі стаяла няпростая задача: выказаць сябе ў абмежаваных рамках. Калекцыі сучаснага адзення, натхнёныя беларускай прыродай, гісторыяй, культурай, - менавіта гэта хацела ўбачыць журы конкурсу. У гэтым годзе ў яго склад увайшлі:
Яніна Ганчарова - старшыня РГА "Беларуская палата моды»;
Трацэўская Яўгенія - дырэктар ТАА «Група кампаній Стэцкевіч»;
Касцючонак Ганна - крэатыўны дырэктар NAVY;
Галіна Якаўлеўна Мяшкова - дацэнт кафедры «Мадэляванне адзення і мастацкае ткацтва" Беларускай дзяржаўнай акадэміі мастацтваў.
Варта заўважыць, што ўмовы ніколькі не напалохалі канкурсантаў, наадварот, яны зрабілі ўсё магчымае, каб ускладніць працу журы. Было заяўлена каля 30-ці ўдзельнікаў, некаторыя з якіх прадстаўлялі па 2 калекцыі. Характэрны і той факт, што дызайнеры прыехалі з розных гарадоў і нават з суседняй Украіны. Першы адборачны тур прайшоў 20 верасня на тэрыторыі лофт-праекта «Балкі». Па яго выніках у другі тур прайшло 14 удзельнікаў.
Але на подыум Belarus Fashion Week патрапяць калекцыі толькі дзесяці з іх. 1 лістапада адбудзецца другі адборачны тур - прэ-дэманстрацыя мадэляў. Пасля яе чатыры ўдзельнікі будуць адсеяныя, а астатнія атрымаюць ад журы карысныя парады для ўдасканалення сваіх тварэнняў.
Складана ўявіць, якія пакуты творчасці, трывогі і хваляванні чакаюць удзельнікаў, але гульня вартая свечак! У гэтым годзе генеральным партнёрам конкурсу New Names BFW стала гандлёвая марка Navy - новы беларускі брэнд моднай вопраткі, увасоблены ў якасных тканінах і цудоўным дызайне з акцэнтам на бездакорны крой. Пераможца атрымае унікальную магчымасць стварыць калекцыю сезону восень-зіма 2015 для брэнда, які будзе прадстаўлена ў рамках BFW. Варта заўважыць, што фіналістам стане дызайнер, які зможа зразумець філасофію брэнда і стварыць нешта ўнікальнае, знайсці новую формулу крэатыўнай класікі. У сваім інтэрв'ю каманда брэнда адзначыла, што ім няпроста было адабраць усяго 14 чалавек.
Гісторыя BFW - гэта пяць сезонаў прафесійнага fashion-праекта, які стаў пляцоўкай для многіх творчых саюзаў. Дастаткова ўспомніць гісторыю Юліі Аляксандравай, пераможцы леташняга конкурсу New Names BFW і ААТ «Цэнтр моды». У якасці ўзнагароды яна атрымала магчымасць стварыць паўнавартасную калекцыю. Пабудаваная на лаканічных формах, прамых лініях і маштабнасці простых элементах, яна атрымала пазітыўны водгук і зацікаўленасць публікі.
Аб карысці і выключнасці праекта New Names казаць не прыходзіцца! Неацэнны кожны ўдзельнік і сама магчымасць удзелу ў міжнародным прафесійным мерапрыемстве любога таленавітага і зацікаўленага чалавека, гатовага працаваць і рухацца наперад. Амбіцыйныя планы і гучныя падзеі, непаўторная атмасфера крэатыву і пляцоўка для разнавектарнага творчага супрацоўніцтва - гэта ўсё New Names Belarus Fashion Week! Гэта цудоўна, непаўторна і адбываецца прама зараз! Не выпусціце магчымасць стаць часткай гэтай грандыёзнай падзеі!
Фінальны паказ конкурсу пройдзе ў рамках Belarus Fashion Week 13 лістапада ў 17:00.
Тэкст: прэс-цэнтр BFW (Надзея Краўчук)
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.