1974 год. Якім быў ён для класіка беларускай літаратуры Васіля Быкава? Відаць, усё ж няпростым. Чытаем у «хроніцы» Сяргея Шапрана: «50-годдзе Васіля Быкава адзначаецца ў 1974 г. Не зусім так, як таго жадаюць яго сябры, сам юбіляр катэгарычна супраць любых урачыстасцяў, але ў Гродзенскім абкаме настойваюць: трэба. Акрамя таго, 22 ліпеня пісьменнік будзе ўзнагароджаны ордэнам Працоўнага Чырвонага Сцяга — за літаратурную дзейнасць і ў сувязі з 50-годдзем з дня нараджэння...» У 1974 г. Гродзенскі абласны драматычны тэатр ставіць п'есу «Апошні шанц» (па аповесці В. Быкава «Сотнікаў»). 13 лютага 1974 г. пісьменнік звяртаецца ў лісце да Валянціна Аскоцкага: «...Я сижу эту зиму дома, написал небольшую повестушку под хлестким названием «Волчья стая». Но не об охоте — о войне. Не знаю, что из нее получилось, хотя вещь эта вполне безобидная. Отдал Буравкину в «Маладосць»...»
У 1974 годзе Васіля Быкава адзначаюць і Дзяржаўнай прэміяй СССР. За аповесць «Дажыць да світання». Аўтар «Брэсцкай крэпасці» Сяргей Смірноў напісаў у віншаванні з гэтай нагоды — 14 лістапада 1974 года: «Радуюсь безмерно — наконец-то появились первые признаки того, что Ваш талант и Ваше великолепное творчество начинают ценить по достоинству...»
Несумненна, Васіль Уладзіміравіч, як ніхто іншы разумеў, што значыць ухвальнае слова, добрая згадка. Таму, мусіць, і не пашкадаваў часу, каб у той самы 1974 год адгукнуцца пасля прачытанага, напісаць незнаёмаму літаратару... З ліста Васіля Быкава празаіку, публіцысту, драматургу, кінасцэнарысту Юліяну Сямёнаву (ці не найперш мы ведаем яго па фільме «Сямнаццаць імгненняў вясны»): «...З даўно нечуваным задавальненнем прачытаў Вашу кнігу «На казле за ваўком». Адметна добрая ва ўсіх адносінах: і з пункту гледжання зместу, інфармацыі, жыцця, Вашага непаўторнага стылю. Вашы радкі пра Хемінгуэя канчаткова ашаламілі мяне. Я не часта пішу аўтарам, нават тым, з кім знаходжуся ў блізкіх адносінах, але тут не ўтрымаўся, каб не паслаць Вам сяброўскую, чытацкую ўдзячнасць.
Будзьце здаровыя. А раптам неяк здарыцца пазнаёміцца, быў бы гэтаму вельмі рады.
Ваш Васіль Быкаў.
P.S. Разам з сынам прачыталі «Іспанскі варыянт», які друкуе з працягам мінская камсамольская газета «Знамя юности». Цудоўна».
«На казле за ваўком» — кніга, у аснову якой пакладзены дзённікавыя запісы Юліяна Сямёнава, журналіста, пісьменніка, сапраўднага мастака-вандроўніка. Відавочна, Васіля Уладзіміравіча ўразіла ўменне вядомага рускага пісьменніка з павагай ставіцца да розных падзей, краін, розных асоб. З кім толькі Сямёнаў ні сустракаўся!.. У коле яго знаёмых — высокія чыноўнікі з капіталістычных краін, бізнесмены, палітыкі, пісьменнікі, якіх часам не дужа шанавала камуністычная ідэалогія. У пісьменніка быў свой погляд на жыццё. Ён праяўляў рашучасць і смеласць у выкладанні сваіх поглядаў.
А патрапіў ліст В. Быкава на вочы ў кнізе Ю. Сямёнава «Невядомы Юліян Сямёнаў. Памру я ненадоўга... Лісты, дзённікі, падарожныя нататкі» (Масква, «Вече», 2008 год). Укладальнік кнігі — дачка пісьменніка Вольга Сямёнава. На старонцы, дзе надрукаваны ліст, — пазнака: «Быкаў, якога зараз называюць сумленнем Беларусі, быў Юліянам Сямёнавічам любімы і шануемы».
Але вось ці сустракаліся Васіль Быкаў і Юліян Сямёнаў — гэта невядома. Рускі празаік памёр 15 верасня 1993 года. Апошнія гады жыцця цяжка хварэў... Ды і шляхі ў Быкава і Сямёнава былі розныя...
Цікава, між іншым, што каранямі сваімі аўтар многіх гістарычных і палітычных дэтэктываў — з Беларусі. Бацька пісьменніка Сямён Аляксандравіч Ляндрэс, арганізатар выдавецкай справы ў Маскве, нарадзіўся ў Магілёўскай губерні. У 1952 годзе быў незаконна рэпрэсіраваны.
Сяргей Шычко
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.