Размеркаванне — неблагі час, каб вызначыцца, ці гатовы ты далей працаваць на гэтым месцы, або вабяць цябе іншыя перспектывы. Даволі часта маладыя спецыялісты шукаюць шчасця ў вялікіх гарадах — там і заробак большы, і ўмовы, маўляў, лепшыя. А Наталля ГОЛУБ, адпрацаваўшы па размеркаванні ў вёсцы Равяцічы Бярозаўскага раёна, не толькі засталася на ранейшым месцы, але і прасунулася па службовай лесвіцы. І мяняць вёску на горад пакуль не збіраецца...
Што прывяло ўраджэнку Бабруйска, выдатніцу вучобы (Наталля скончыла з адзнакай у 2010 годзе Беларускую дзяржаўную сельскагаспадарчую акадэмію) у ААТ «Вінец» Бярозаўскага раёна, — напэўна, першае пытанне, якое ўзнікае ў галаве. «Размеркаванне я шукала сама, — прызнаецца дзяўчына. — І на той момант ніякіх запытаў з Бабруйска ці Бабруйскага раёна не было. Прыйшла на думку Бярозаўшчына — гэта знаёмыя мне з дзяцінства мясціны: тут, у вёсцы Галіцы, нарадзілася мая маці, кожнае лета мы з сям'ёй выязджалі сюды. А месца працы — ААТ «Вінец» — знаходзіцца ў аграгарадку Равяцічы, што ў трох кіламетрах ад Галіцаў».
Наталля скончыла факультэт бухгалтарскага ўліку па спецыялізацыі «бухгалтарскі ўлік, аналіз і аўдыт у АПК». У ААТ «Вінец» малады спецыяліст працавала бухгалтарам, праз некаторы час стала намеснікам галоўнага бухгалтара. Пасля года адпрацоўкі Наталля паступіла ў Акадэмію кіравання пры Прэзідэнце Рэспублікі Беларусь на факультэт дзяржаўнага кіравання і права і з мінулага года займае пасаду сакратара-юрысконсульта. Такім чынам, дзяўчына працягнула сваё размеркаванне.
— Раней, калі працавала бухгалтарам, будні былі падобныя адзін да аднаго: з раніцы сядзеш на працоўнае месца — і не ўстаеш да 6 гадзін вечара, — шчыра прызнаецца Наталля Голуб. — Цяпер стала больш мабільнай: у мяне з'явілася шмат знаёмых, наладжваюцца сувязі — я выязджаю ў камандзіроўкі.
Вольнага часу стала больш, а ў абедзенны перапынак — цэлыя дзве гадзіны — дзяўчына паспявае і адпачыць, і з'ездзіць па справах у горад.
— Калі паступала на «бухгалтарскі ўлік», то разумела, што гэта маё ад прыроды, — узгадвае малады спецыяліст. — Матэматыка мне даецца лёгка. Па першым часе здаралася і такое, што сядзела па начах, але рабіла сваю справу, бо ведала — падвяду людзей, калі не зраблю. Калектыў мне таксама падабаецца...
Юрыспрудэнцыю Наталля выбрала па ўласным жаданні: у жыцці здаралася шмат сітуацый, калі патрабаваліся веды менавіта ў гэтай галіне. Дзяўчына падумала, што зможа самастойна разбірацца з такімі пытаннямі, а яшчэ была мара атрымаць другую вышэйшую адукацыю.
Пакуль перабірацца ў Бярозу дзяўчына не плануе, хоць і прызнаецца — калісьці такое жаданне было. Пра свой выбар яна не шкадуе. У Галіцах ёсць уласны дом, які застаўся ад сваякоў, ды невялічкая гаспадарка — агарод, куры, сабака і каты.
«Я такі чалавек, што нават калі і буду жыць у горадзе, то абавязкова з участкам, — разважае Наталля. — Не прыпісваю сябе ні да гарадскіх, ні да сельскіх жыхароў — ува мне папалам і таго, і другога. Думала нават пра тое, што можна было б і карову завесці, але з-за выездаў на сесію немагчыма надоўга пакінуць на кагосьці сваю гаспадарку».
Агарод — справа добрая і карысная, але і Наталлі, напэўна ж, хочацца больш цікавага адпачынку... Аднак ёй хапае з галавой мерапрыемстваў, якія праводзяцца ў аграгарадку, напрыклад, сезонныя святы. Зрэшты, і да Бярозы недалёка, а там ёсць і Лядовы палац, і басейн. Дзяўчына яшчэ са школьных часоў прафесійна займаецца пешаходным турызмам. За тры гады знайшла ў Бярозе аднадумцаў, з якімі разам ездзіць на спаборніцтвы.
— У выхадныя абавязкова выбіраюся на рынак: для сабакі і катоў трэба набыць корм і сабе нешта прыкупіць, — распавядае Наталля. — А калі адзенне шукаю, то магу і ў Мінск паехаць.
Інфраструктура і ўмовы ў вёсцы дзяўчыну цалкам задавальняюць. «У мяне няма асаблівых патрабаванняў, ды і дамок у мяне просценькі, без выгод, — адзначае суразмоўца. — Нядаўна прыехала адна дзяўчына — малады спецыяліст — але ёй не спадабалася, што ў доме на лета адключаюць гарачую ваду. Для мяне такая сітуацыя цалкам нармальная. Выгод няма, затое дом свой. На працу дабіраюся на веласіпедзе. Да Бярозы 10 кіламетраў». Дарэчы, узімку курсіруе аўтобус, аднак улетку да горада Наталля прывыкла дабірацца на спадарожным транспарце: дзяўчыну ўжо ўсе ведаюць, таму і падвозяць.
У вольны ад працы і гаспадаркі час Наталля часта адпачывае разам з сябрамі ці сваякамі на прыродзе. «Нядаўна сустракаліся тут з роднымі — яны ў сталіцы жывуць і мне зайздросцяць. Кажуць — пажывеш тры дні ў Мінску, дык хочацца збегчы з горада ў вёску». Наталля ж проста зрабіла выбар на карысць вёскі. Ці застанецца яна ў Равяцічах назаўжды, пакуль загадваць не будзем, тут ужо як складзецца.
Кацярына РАДЗЮК.
Мінск — Бяроза — Мінск
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».