На гэта скіраваны праект міжнароднай тэхнічнай дапамогі «Экалагічны транспарт, які яднае суседзяў» (№ LLB-2-173) па Праграме трансгранічнага супрацоўніцтва «Латвія—Літва—Беларусь» на 2007-2013 гады. Праект аб'яднаў ва ўзаемавыгадным партнёрстве адміністрацыю Друскінінкая, аддзел адукацыі, спорту і турызму Гродзенскага гарвыканкама і абласное аддзяленне грамадскага аб'яднання «Рэспубліканскі турысцка-спартыўны саюз».
Круці педалі ў «Пышках»!
Гродзенцам пашанцавала, што літаральна ў цэнтры горада ёсць цудоўная прыродная зона для адпачынку без выхлапных газаў, якой мясцовыя жыхары ўжо даўно карыстаюцца для пешых прагулак. А цяпер лесапарк «Пышкі» прыстасавалі і для веласіпедыстаў. У рамках гэтага міжнароднага праекта там абсталявалі веладарожку працягласцю 5 кіламетраў 150 метраў з цвёрдым пакрыццём і асвятленнем. Работы выканаў пераможца тэндара «Гроднамеліявадгас» разам з субпадрадчыкамі — ДБУ №18 і прадпрыемствам «Гарсвятло». Разам з асфальтавым пакрыццём, якое ўжо было, працягласць веладарожкі складае цяпер больш за 8 кіламетраў.
Пры гэтым у лесапарку раздзелены пешаходныя і веласіпедныя патокі. Добра вядомая гараджанам «сцяжына здароўя» ад вуліцы Фестывальнай да месца адпачынку «Вусікі» будзе толькі для пешаходаў, а веладарожка — выключна для веласіпедыстаў. Такім чынам, створаны ўмовы, каб удзельнікі дарожнага руху (пяшком і на веласіпедзе) не перашкаджалі адно аднаму.
Прычым новая веласіпедная траса ўжо стала папулярнай для аматараў не толькі круціць педалі, але і пакатацца на роліках, лыжаролерах, а зімой, верагодна, і на лыжах. Яна можа выкарыстоўвацца і для аздараўленчых фестываляў, трэніровак спартсменаў.
З уводам гэтай веладарожкі, разам з ужо існуючымі маршрутамі на тэрыторыі лесапарку «Пышкі» з'явіліся выдатныя ўмовы для сапраўднага веласіпеднага буму. А гэта, у сваю чаргу, стварае «нішу» і для бізнесу, бо веласіпедаў у пракаце пакуль у горадзе малавата.
Па маршрутах «Нёманскі» і «Райгарад»
Распрацоўшчыкі гэтага праекта паклапаціліся і пра турыстаў, якія падарожнічаюць з Гродна ў Друскінінкай на байдарках па Нёмане. Маршрут «Нёманскі» прамаркіраваны знакамі, абсталяваны тры месцы для адпачынку — з альтанкамі, прыбіральнямі, кантэйнерамі для смецця, а таксама з пяском каля вогнішчаў. Усё зроблена згодна з патрабаваннямі проціпажарнай бяспекі. Пабудаваны таксама лесвіцы для сходу да ракі, а ў адным з месцаў, побач з вёскай Шабаны, будзе прычал.
Што ж тычыцца новай веладарожкі ў лесапарку «Пышкі», то аднымі з першых яе 13 кастрычніка апрабавалі, сеўшы на веласіпеды, больш за 40 удзельнікаў праекта з беларускага і літоўскага боку — архітэктары, будаўнікі, прадстаўнікі мясцовых органаў улады, а таксама велаграмадскасці. Уражанні ад падарожжа экалагічным транспартам на ўлонні прыроды проста цудоўныя, паведамілі яны потым журналістам на прэс-канферэнцыі.
А на наступны дзень прайшла прэзентацыя другой часткі праекта — веласіпеднага маршруту «Райгарад», які злучае Гродна і Друскінінкай. У якасці экспертаў гэтага маршруту выступілі кіраўнікі органаў дзяржаўнай улады — старшыня Гродзенскага абласнога Савета дэпутатаў Ігар ЖУК і намеснікі старшынь шэрагу райвыканкамаў, якія разам з беларускімі і літоўскімі аматарамі двухколавых транспартных сродкаў здзейснілі велапрабег да пагранперахода «Прывалка», а затым накіраваліся ў Друскінінкай.
— Ідэя была ў тым, каб высветліць, якія ўмовы створаны на мяжы для велатурыстаў. Аказалася, што гэты маршрут цалкам рэальны, але, разам з тым, патрабуецца рэарганізацыя на пагранпераходзе. У першую чаргу дзеля бяспекі велападарожнікаў, каб іх рух нідзе не перасякаўся з патокамі аўтамабільнага транспарту. На маю думку, можна задзейнічаць, абазначыўшы адпаведнымі знакамі, запасную паласу, якая выкарыстоўвалася падчас правядзення чэмпіянату свету па хакеі ў Мінску, — зазначае менеджар праекта з беларускага боку Сяргей КАЛЯДА.
Гэтае пытанне ўдзельнікі велапрабегу, пасол Беларусі ў Літве Аляксандр КАРОЛЬ абмеркавалі на сустрэчы з мэрам Друскінінкая Рычардасам МАЛІНАЎСКАСАМ і работнікамі адміністрацыі, якія адказваюць за развіццё турызму. Магчыма, яго вырашаць дзякуючы новаму сумеснаму праекту. Прагучала таксама прапанова злучыць Гродна і Друскінінкай не толькі веламаршрутам, што праходзіць па ўскраіне маляўнічай даліны «Райгарад», для аматараў пакатацца па лясных сцяжынках, але і маршрутам для веласіпедыстаў уздоўж аўтамабільнай трасы.
Зрэшты, на гэтай сустрэчы ішла гаворка не толькі пра «веласіпедныя» кантакты, але і пра іншыя варыянты супрацоўніцтва паміж суседзямі. Напрыклад, Рычардас Малінаўскас лічыць, што тэмай сумеснага праекта можа стаць будаўніцтва ў Друскінінкаі і Гродне ўніверсальных культурна-выставачных комплексаў, дзе можна будзе праводзіць вялікія канцэрты, а таксама, перавярнуўшы крэслы, разгортваць выставачныя стэнды. Такія архітэктурныя рашэнні ўжо ёсць.
Барыс ПРАКОПЧЫК.
УНП 590373966
Меркаванне ў тэму
Валерый КЛІМОВІЧ, намеснік старшыні Гродзенскага райвыканкама, удзельнік велапрабегу:
— Гэты і іншыя трансгранічныя праекты, якія ажыццяўляюцца Гродзенскім абласным аддзяленнем грамадскага аб'яднання «Рэспубліканскі турысцка-спартыўны саюз» у супрацоўніцтве з замежнымі партнёрамі і дзяржаўнымі органамі ўлады нашай краіны, — добры прыклад і для іншых, як трэба развіваць добрасуседскія адносіны і прыцягваць інвестыцыі. Прычым з рэальнай выгадай для рэгіёна і яго жыхароў, якія будуць карыстацца той жа веласіпеднай інфраструктурай. Верагодна, што зацікавяцца нават тыя, хто дагэтуль веласіпедам і не захапляўся.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».