Жывапісец Барыс Аракчэеў, які не так даўно пакінуў гэты свет, нагадаў пра сябе добрай і прыгожай падзеяй. У Мінску па вуліцы Леніна, 2 усталявана мемарыяльная дошка ў гонар праслаўленага мастака.
Падзея, якую ініцыіравалі Мінскі гарвыканкам і Беларускі саюз мастакоў, з'яўляецца своеасаблівым працягам той рознабаковай працы, якую па ўшанаванні памяці бацькі праводзіць мастак, кніжны графік Аксана Аракчэева (на фота). Нельга не ўспомніць, што якраз у гэтым доме на вуліцы Леніна, 2 на працягу некалькіх дзесяцігоддзяў знаходзілася майстэрня Барыса Уладзіміравіча. З вокнаў яе відаць плошча Свабоды, Свята-Духаў кафедральны сабор, гарадская ратуша.
— Цяпер я працую ў колішняй майстэрні бацькі і ўсім сэрцам, усёй душой адчуваю яго творчае гарэнне, — дзеліцца сваімі думкамі мастачка Аксана Аракчэева. — Я вельмі рада, што на адкрыццё дошкі, аўтарам якой з'яўляецца скульптар Яўген Колчаў, прыйшло шмат людзей. Мне здаецца, што прыйшлі якраз людзі, якія, калі і не бачылі ніколі бацьку, то ўсё адно адчуваюць яго энергетыку. Праз пейзажы яго, праз карціны, якімі ён перадаваў захапленне ўсёй Беларуссю, захапленне родным яраслаўскім краем, дзе нарадзіўся, неабыякавыя да прыгажосці людзі зазіраюць у глыбіні бацькавага натхнення, насычаюцца крынічнай сілай яго колераў і фарбаў.
На ўрачыстым адкрыцці мемарыяльнай дошкі выступіў і старшыня Беларускага саюза мастакоў Рыгор Сітніца, які быў добра знаёмы з Барысам Аракчэевым. «Невыпадкова, што Барыса Уладзіміравіча, заслужанага дзеяча мастацтваў Рэспублікі Беларусь, адзначылі ордэнам Францыска Скарыны. Уклад гэтага чалавека, нараджэннем рускага, у беларускую нацыянальную культуру надзвычай вялікі. І ў плане адлюстравання прыгажосці нашай зямлі, і ў сувязі з тым, што ён выхаваў плеяду таленавітых творцаў. А найперш свае мастацкія запаветы перадаў дачцэ — Аксане Барысаўне Аракчэевай. Веру, што і да арыгіналаў, і да рэпрадукцый работ таленавітага, яркага мастака неаднойчы будуць прыкаваны позіркі многіх і многіх нашых суайчыннікаў. Ведаю, што пашанотна ставяцца да здзейсненага Барысам Аракчэевым і ў Расіі, на радзіме творцы...» Пацвярджэннем апошніх слоў стала і вітанне сям'і мастака, арганізатараў праекта па ўсталяванні мемарыяльнай дошкі ад пасольства Расійскай Федэрацыі ў Рэспубліцы Беларусь.
Мікола Берлеж.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.