Гэтая страва (а дакладна — кампанент больш складаных страў) вядомая беларускім этнографам досыць даўно і трапіла ў многія энцыклапедыі. Яна шырока вядомая ў Браслаўскім, Мядзельскім, Ваўкавыскім раёнах, часткова на Магілёўшчыне, Цэнтральным і Усходнім Палессі. Зрэшты, гэта толькі некаторыя месцы, дзе лазанкі зафіксавалі этнаграфічныя экспедыцыі, з чаго зусім не вынікае, што іх не ведалі ў іншых раёнах Беларусі. Проста не ўсюды этнографы даехалі.
Рабіць лазанкі досыць проста: крута замешанае цеста з пшанічнай, жытняй або грэцкай мукі тонка раскачваюць, рэжуць на квадраты (ромбы, трохкутнікі), вараць, адцэджваюць, заліваюць салам, алеем з цыбуляй ці смятанай, у пост — цёртым макам, тоўчаным ільняным семенем, размятымі ягадамі. У больш дасканалых варыянтах адвараныя лазанкі тушаць у пячным духу са смятанай або запякаюць з мясам, капустай і іншымі дадаткамі; часам смажаць. У іншых выпадках лазанкі ўжываюцца як састаўная частка супоў — напрыклад, грыбнога або юшкі.
І тэхналогія прыгатавання, і сама назва выклікаюць асацыяцыі з італьянскай лазанняй. Такое супадзенне, натуральна, невыпадковае. Лазанкі, вядомыя таксама ў Польшчы, Літве і ва Украіне, і ёсць не што іншае, як адаптаваная некалі кухняй Рэчы Паспалітай лазання. Гэтая страва мае вельмі доўгую і цікавую гісторыю. Лазанья (lasagne), як мяркуюць, — найбольш старажытная форма «пасты». Ёсць звесткі, што напачатку ў Старажытнай Грэцыі словам laganon называлі пляскатую хлебную ляпёшку. Рымляне, пазычыўшы такую ляпёшку ад грэкаў, пачалі разразаць яе на тонкія скрылі, якія называлі laganі. Іх любілі Цыцэрон і Гарацый. Лічыцца, што laganі ўяўлялі сабой смажаныя палоскі цеста, якія дадаваліся ў тушаную агародніну або ў супы. У ранняе сярэднявечча страва трансфармавалася і стала падобнай да мучных клёцак, якія дадаваліся ў гаршчок з тушанымі мясам або агароднінай. У часы Марка Пола (ХІІІ стагоддзе) лазання ўжо, у асноўным, была падобнай на сучасную: тонкія пляскатыя шырокія кавалкі цеста, звычайна прамавугольныя — а пры сучаснай масавай вытворчасці пераважна гафрыраваныя (накшталт шыферу). Спачатку яны адварваюцца як локшына (хуткага прыгатавання), а потым тушацца ў печы ці духоўцы з разнастайнымі дадаткамі (агароднінай, мясам, грыбамі і г.д.).
Калі і як лазанкі трапілі з Італіі да нас? Прынята лічыць, што гэтай кулінарнай інавацыяй, як і многімі іншымі (напрыклад, зялёнай салатай і ўвогуле разнастайнай зелянінай) мы абавязаны каралеве Боне Сфорцы, жонцы караля Жыгімонта Старога і маці Жыгімонта Аўгуста. З самага прыезду ў Польшчу і Літву ў 1518 годзе Бона мела шматлікае акружэнне з італьянцаў, адмыслоўцаў у розных галінах, у тым ліку кухараў, якія зрабілі значны ўплыў на пашырэнне найноўшых заходнееўрапейскіх культурных і тэхнічных дасягненняў, спажывецкіх прыхільнасцяў эпохі Рэнесансу на нашых землях. З яе іменем звязваюць з'яўленне або пашырэнне ў меню арыстакратыі экзатычнай усходняй садавіны — апельсінаў, лімонаў, гранатаў, а таксама прыпраў — шафрану, фенхелю, імбіру, цынамону, цукру; яшчэ і алівак, каштанаў, разынак, мігдалаў, марцыпанаў, рысу і г.д. Найбольш яскравым новаўвядзеннем эпохі Боны лічыцца салата і іншая гародніна, а таксама ўвядзенне ва ўжытак відэльцаў.
Нават калі лазанкі і не былі запазычаны менавіта пры Боне, у любым выпадку сувязі з італьянскай кухняй, усталяваныя пры ёй, дакладна прычыніліся да таго, што адзін з самых прыкметных элементаў гэтай кухні рана ці позна трапіў у меню нашых продкаў. Пры гэтым лазанкі набылі «тутэйшы» акцэнт: іх сталі гатаваць з тыпова мясцовымі дадаткамі.
Адна з першых згадак пра лазанкі ў Рэчы Паспалітай адносіцца да 1632 года. Французскі інжынер-фартыфікатар Гіём Баплан прыгатаваў тады лазанкі з грэцкай мукі з макавым малаком. Гэта тыпова вігілійная страва, якую гатуюць напярэдадні Божага Нараджэння. Менавіта да гэтага свята пераважна і гатавалі ў нас лазанкі: напрыклад, лазанкі з капустай і грыбамі або грыбны суп з лазанкамі. Часам лазанкамі, якія вараць або тушаць, называлі таксама падобныя да іх формай ламанцы — сухое каляднае печыва, якое ядуць, макаючы ў мядовую сыту або макавае малако.
Шырокае засваенне лазанак народнай кулінарыяй Беларусі адбылося ў ХІХ стагоддзі. Галоўная тагачасная кулінарная кніга — «Кухарка Літоўская» Вінцэнты Завадскай — згадвае толькі 2 віды лазанак: лазанкі, запечаныя з вясковым сырам (відавочна, тварожным клінковым) і дэсертныя лазанкі, запечаныя з маслам, цукрам, разынкамі і яйкамі. Але насамрэч вядома пара дзясяткаў чыста тутэйшых варыянтаў лазанак — пераважна посных, але таксама і з мяснымі дадаткамі.
Выключна беларускае слова, якім можна называць лазанкі, — «скрылікі», або «скрылькі». Як ні дзіўна, яно лепш захавалася ў літоўскай мове, дзе лазанкі называюць па-рознаму, але часцей за ўсё skrydlaі, skrylaі. Гэта не выключэнне, а, хутчэй, правіла: беларускія стравы часта называюць словамі, запазычанымі з літоўскай, і наадварот.
Шмат у якіх рэстаранах Беларусі сёння можна пакаштаваць без асаблівых праблем італьянскую лазанню — але паспрабуйце запытацца там пра тутэйшыя лазанкі! Зрэшты, чаму б менавіта італьянскім рэстаранам не распачаць адраджэнне незаслужана забытай нашым гастранамічным афіцыёзам стравы? У якасці майго невялічкага ўнёску ў гэтую справу, актуальныя рэцэпты:
Складнікі: 2 шклянкі мукі, 2 яйкі, 3-4 лыжкі вады, соль.
Спосаб прыгатавання. Муку прасеяць на раскатачную дошку, зрабіць паглыбленне, убіць яйкі, уліць ваду, перамяшаць да атрымання загусцелай, цвердаватай масы, старанна сфармаваць, падзяліць на часткі, тонка раскачаць і пакінуць цеста, каб падсохла. Затым пасыпаць мукой, скруціць у рольку (жгут), якую пакроіць на палоскі шырынёй 2 см, а іх падзяліць на квадрацікі і раскачаць па дошцы. Лазанкі апусціць у кіпячую падсоленую ваду, перамяшаць, прыкрыць накрыўкай, паварыць, адцадзіць, зліць гарачую ваду.
Складнікі: мука і яйкі на лазанкі як у папярэднім рэцэпце (або 500 г гатовых лазанак — напрыклад, італьянскіх), 500 г кіслай капусты, 1 цыбуля, 50 г сушаных баравікоў, 2 ст. лыжкі мукі, 2 ст. лыжкі масла + трохі масла або алею для змазвання формы, алей або аліва (з алівак), соль, перац на смак.
Спосаб прыгатавання. Грыбы старанна мыем, замочваем на ноч у халоднай вадзе, затым варым да гатоўнасці, адцэджваем і дробна крышым (адвар не выліваем). Капусту, калі занадта кіслая, палошчам, затым заліваем грыбным адварам, трохі разбаўляем вадой і варым да мяккасці. Гатуем лазанкі як у папярэднім рэцэпце (або варым фабрычныя паводле рэцэпту на ўпакоўцы, да стану al dente — трохі недаваранага). Цыбулю дробна крышым, падсмажваем на патэльні да празрыстага стану, дасыпаем муку і дасмажваем. Змешваем капусту з грыбамі і засмажкай, дадаём 1—2 лыжкі алею і яшчэ хвіліну дасмажваем на малым агні. Дадаём соль і перац на смак. Выкладваем на бляху і запякаем у духоўцы пры тэмпературы 200°C каля 20 хвілін.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.