23 снежня ў Маскве адбылося чарговае пасяджэнне Савета калектыўнай бяспекі краін АДКБ з удзелам першых асоб дзяржаў-удзельніц. Яшчэ напярэдадні, у рамках сустрэчы кіраўнікоў знешнепалітычных ведамстваў, міністраў абароны і сакратароў нацыянальных саветаў бяспекі быў узгоднены шэраг дакументаў аб супрацоўніцтве ў вайсковай, вайскова-прамысловай сферах, барацьбе з тэрарызмам, процідзеянні наркаманіі і выклікам інфармацыйнай бяспекі.
АДКБ не хапае суб'ектнасці
Міжнароднае становішча, у тым ліку на межах АДКБ у Азіі, Закаўказзі, Еўропе, застаецца трывожным, а свет, па меркаванні айчынных і замежных аналітыкаў, знаходзіцца на парозе паўтарэння «халоднай вайны», калі краіны АДКБ і дзяржавы — члены НАТА зноў акажуцца па розныя бакі барыкадаў.
Між тым, аналізуючы адносіны паміж дзвюма арганізацыямі, большасць спецыялістаў звычайна «звальваецца» да аналізу стасункаў паміж асноўнымі дзяржавамі блокаў — Расіяй і ЗША. Пры гэтым, калі ЗША сапраўды з'яўляюцца «першымі сярод роўных» і маюць адназначны ўплыў на пазіцыю НАТА, то стратэгія АДКБ не так моцна залежыць ад пазіцыі нацыянальных урадаў, у тым ліку расійскага.
Гэта звязана не столькі з раўнапраўнасцю краін-удзельніц, колькі з тым, што, нягледзячы на поспехі на асобных кірунках, АДКБ так і не стала паўнавартасным вайскова-палітычным блокам, а па шэрагу вострых пытанняў калектыўны механізм АДКБ увогуле не задзейнічаўся.
Такое ігнараванне суб'ектнасці АДКБ з боку саміх удзельнікаў, у першую чаргу Расіі, негатыўна ўплывае на ўспрыманне гэтай арганізацыі з боку НАТА, які аддае перавагу кантактам з нацыянальнымі ўрадамі паасобку.
Ніхто не хоча вайны?
У канцы лістапада генеральны сакратар НАТА Ёнс Столтэнберг заявіў, што Паўночнаатлантычны Альянс «абсалютна не хоча» новай «халоднай вайны» з Расіяй.
Па меркаванні спадара Столтэнберга, калі Расія будзе супрацоўнічаць з НАТА, «ад гэтага выйграюць і Расія, і НАТА». Думкі Ёнса Столтэнберга адносна мэтазгоднасці такога супрацоўніцтва з'яўляюцца абсалютна слушнымі не толькі з пазіцый развіцця двух цэнтраў сілы, але з пункту гледжання планетарнай бяспекі.
Аднак зараз, на жаль, бакі далёкія адзін ад аднаго як ніколі ў гісторыі з моманту разбурэння СССР. Нават «косаўскі крызіс» і аперацыя НАТА ў Югаславіі ў 1999 годзе не мела такога негатыўнага ўздзеяння на характар узаемаадносін Расійскай Федэрацыі і Паўночнаатлантычнага альянсу.
Украіна стала той самай лініяй падзелу на мяжы інтарэсаў, што прымушае сусветныя кіраўнічыя эліты, у тым ліку ваенныя, да прыняцця прынцыповага рашэння: дыялог або канфрантацыя.
Расійскае кіраўніцтва вуснамі сваіх дыпламатаў дэманструе пазіцыю, падобную на тую, якую займае кіраўніцтва НАТА — фармальна «ніхто не хоча вайны». Падчас нядаўняга пленарнага пасяджэння Арганізацыі Аб'яднаных Нацый пастаянны прадстаўнік Расійскай Федэрацыі Віталь Чуркін падкрэсліў неабходнасць супрацоўніцтва НАТА і дзяржаў — членаў АДКБ па пытанні бяспекі ў Афганістане.
Логіка гістарычнага моманту аб'ектыўна дыктуе Расіі і НАТА патрэбу вяртання да дыялогу ў імя пераадолення яшчэ больш сур'ёзных выклікаў сусветнай бяспекі, чым цяперашні геапалітычны канфлікт ва Украіне.
Запатрабаванасць узаемадзеяння
Нестабільнае ваенна-палітычнае становішча ў Афганістане пагражае перарасці ў грамадзянскую вайну, якая можа ўцягнуць этнічна блізкія сярэднеазіяцкія дзяржавы.
Іншай сур'ёзнай пагрозай з'яўляецца беспрэцэдэнтны рост афганскай наркавытворчасці і павелічэнне трафіку наркотыкаў у Расію і дзяржавы ЕС. Ужо зараз штогод праз краіны АДКБ перапраўляецца каля 120 тон наркотыкаў з Афганістана. Спецыялісты прагназуюць далейшы рост вытворчасці і паставак наркотыкаў з Афганістана і дзяржаў Цэнтральнай Азіі ў Расію, а гэта ўжо стварае непасрэдную пагрозу нацыянальнай бяспецы дзяржаў-суседзяў, у тым ліку Рэспублікі Беларусь, якая не мае памежнага і мытнага кантролю з Расійскай Федэрацыяй.
Асноўным жа фактарам сусветнай нестабільнасці, безумоўна, з'яўляецца тэрарыстычная групоўка «Ісламская дзяржава», якая кантралюе частку тэрыторыі і нафтаздабычы Сірыі і Ірака, а амбіцыі тэрарыстаў распаўсюджваюцца значна шырэй — ад Блізкага Усходу да поўдня Еўропы і Азіі.
«Ісламская дзяржава», якая першапачаткова карысталася амерыканскай падтрымкай, цяпер успрымаецца ў якасці галоўнай пагрозы сучаснай вашынгтонскай адміністрацыяй, што ўжо прывяло да перазагрузкі адносін паміж ЗША і Іранам.
Сярод асабістага складу байцоў ІДзІЛ значная колькасць выхадцаў з мусульманскіх рэгіёнаў Расіі, а планы адносна стварэння «вялікага Хорасана» на тэрыторыі сярэднеазіяцкіх дзяржаў дыктуюць парадак дня для ўзаемадзеяння НАТА і АДКБ па пераадоленні чарговай ісламскай тэрарыстычнай пагрозы.
Сцэнарый такога ўзаемадзеяння неажыццявімы, пакуль існуе ўкраінскі крызіс, які нельга вынесці за дужкі, аднак цалкам магчыма вырашыць, калі падыходзіць да праблемы з пазіцый захавання міру, развіцця планеты і проста здаровага сэнсу. Гэта магчыма, калі Альянс прыме за аснову сваёй стратэгіі па Украіне пункт 24 дамоўленасцяў, распрацаваных амерыканскімі і расійскімі аналітыкамі падчас сустрэчы на фінскім востраве Бойста летам 2014 года, а менавіта — «пацвярджэнне і гарантыі ўзаемнай павагі да пазаблокавага статусу Украіны».
Адмова ад узброенай падтрымкі «партыі вайны» ў Кіеве, якую агучыў 12 снежня генеральны сакратар НАТА Ёнс Столтэнберг у Бруселі, павінна мець сіметрычны адказ Расіі ў выглядзе спынення ваеннага забеспячэння сепаратыстаў на тэрыторыі Данецкай і Луганскай абласцей Украіны. Пасля такіх крокаў насустрач верагодны пераход да выканання «мінскіх дамоўленасцяў» пад міжнародным кантролем, што, у сваю чаргу, стварае перадумовы для перазагрузкі па лініі Расія — НАТА і для супрацоўніцтва АДКБ і Паўночнаатлантычнага альянсу.
Кампраміс у імя бяспекі
Апора Расіі на меркаванне саюзнікаў не толькі ўзмоцніць суб'ектнасць АДКБ як роўнага з НАТА вайскова-палітычнага альянсу, але і засцеражэ ад неабдуманых крокаў, што пагражаюць міжнароднай ізаляцыяй краіны. У гэтай сувязі надзвычай пазітыўна ўспрымаецца заява Прэзідэнта Расійскай Федэрацыі Уладзіміра Пуціна на калегіі Міністэрства абароны 19 снежня аб тым, што Расія плануе ўмацоўваць свае адносіны з дзяржавамі АДКБ.
Рэспубліка Беларусь выступае за павышэнне ролі АДКБ, паслядоўна выконвае свае абавязкі ў рамках арганізацыі, адказна падыходзячы да ўзятых міжнародных абавязкаў. Роля Беларусі ва ўрэгуляванні ўкраінскага крызісу можа быць выкарыстана як у распрацоўцы агульнай стратэгіі АДКБ ва Усходняй Еўропе, так і станаўлення новага фармату стасункаў паміж АДКБ і НАТА.
Аляксандр ШПАКОЎСКІ
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.