«Разабрацца ў паняцці «мастацтва кіно» — тое ж самае, што знайсці сэнс жыцця. Але ж калі пошукі сэнсу жыцця ніколі не спыняліся, то і спробы зразумець, у чым заключаецца сутнасць мастацтва кіно і яго адрозненне ад кінапрадукту, маюць права на існаванне.
У гэтых пошуках да нас далучаюцца людзі са свету кінематографа. Яны раскажуць пра сваю працу, сваё бачанне кіно, пра метафізічнае і рэальнае, пра сусветнае і вузкасацыяльнае, пра важнае і банальна простае. Магчыма, гэтыя інтэрв'ю дапамогуць нам аддаліцца ад нязручных сацыяльных умоўнасцяў».
Напрыканцы мінулага года беларускае кіно адзначыла юбілей. Яго гісторыя стваралася 90 гадоў — доўга, слаўна, прыгожа — але яго сучаснае становішча выклікае шматлікія нараканні. Нацыянальны кінематограф, можа, і не ідэальны, але нечага варты. Чаго менавіта, мы змаглі высветліць у размове з загадчыцай аддзела экранных мастацтваў Цэнтра даследаванняў беларускай культуры, мовы і літаратуры Нацыянальнай акадэміі навук, кандыдатам мастацтвазнаўства, адным з членаў конкурснай камісіі па адборы фільмаў рэспубліканскага конкурсу кінапраектаў Антанінай Карпілавай.
— У вас, калі казаць пра беларускі кінематограф, не ўзнікае пачуцця настальгіі па савецкім часе?
— Пачуццё настальгіі звязана з элементам смутку, а я наадварот — захапляюся, таму што за амаль векавую гісторыю беларускага кіно залаты век прыпаў на 1960-1980-я. Так, залатыя гады былі і падчас нямога кінематографа, у 1920-я, што ў першую чаргу было звязана з творчасцю Юрыя Тарыча. Але вылучылася менавіта пакаленне 1960-1980-х, якое скончыла ВГІК і ўсё паклала на алтар беларускага кінамастацтва. Гэта Віктар Тураў, Ігар Дабралюбаў, Барыс Сцяпанаў, Валерый Рубінчык, Віталь Чацверыкоў... Гэта было залатое дваццаціпяцігоддзе. Невыпадкова, што ў гэты час быў створаны лепшы фільм пра вайну, які ўвайшоў у спіс ЮНЕСКА, — «Я родам з дзяцінства» Віктара Турава.
— Я хацела якраз спытаць пра «залаты перыяд». Яго межы магчыма акрэсліць?
— Пачаць трэба з дэбюту Віктара Турава «Праз могілкі», заснаванага на аўтабіяграфічных матэрыялах. Наогул ластаўкай-прадвеснікам узлёту беларускага кіно стаў альманах, пра які многія забыліся, — «Апавяданні пра юнацтва». Яго курыраваў Юрый Тарыч, чым перадаў эстафету ад залатога часу нямога кіно да гуказрокавага і ўпершыню аб'явіў свету імёны Віктара Турава і Барыса Сцяпанава. Завяршыць мяжу варта 1986 годам, славутым фільмам Элема Клімава «Ідзі і глядзі», які называюць і кінапрыпавесцю, і кінатрагедыяй. Так, Элем Клімаў — маскоўскі рэжысёр, але ён настолькі прасякнуўся духам беларускай гісторыі, прозай Алеся Адамовіча, што мы лічым яго і беларускім аўтарам. Ён здымаў на месцах, дзе адбываліся трагедыі беларускіх хатыняў. 1986 год паказальны і знакавым фільмам Міхаіла Пташука «Знак бяды», экранізацыяй аповесці Васіля Быкава.
Гэты перыяд выразны ў мастацкім, эстэтычным плане (не адцягваючыся на ідэалагічныя моманты), хоць мастацтва — вельмі трапяткая тканіна, якая ад гэтых палітычных, ідэалагічных рэчаў залежыць.
— У той час на першым месцы стаяў талент, аўтар ці ўсё ж ідэалогія?
— Гэта час праявы індывідуальнасці, безумоўна. Кіно Віктара Турава — аўтарскае кіно, хоць сцэнарыі да яго фільмаў пісалі знакамітыя Генадзь Шпалікаў ці Алесь Адамовіч. Але яны былі аднадумцы, радок ад дэ Сэнт-Экзюперы «Усе мы родам з дзяцінства...» моцна ўвайшоў у іх лёс. Я ўжо не кажу пра Валерыя Рубінчыка, які заўсёды браў удзел у напісанні сцэнарыяў (гэта і «Вянок санетаў», і «Апошняе лета дзяцінства», і, вядома ж, «Дзікае паляванне караля Стаха»). Гэта і Валерый Рыбараў з фільмамі «Чужая Бацькаўшчына» і «Сведка».
Амаль усе фільмы гэтых аўтараў адносяцца да далікатнай, трапяткой і заўсёды актуальнай тэматыкі: дзеці і вайна. У Віктара Турава былі аўтабіяграфічныя матывы: яго бацька загінуў у партызанскім атрадзе, а сястра была адпраўлена ў Германію. У Валерыя Рубінчыка і Валерыя Рыбарава тэма вайны дадзена як бы адлюстравана, адрэфлексавана, яны самі яе не перажылі. Але яны паглыбіліся ў тэму, што можа сведчыць толькі пра высокі ўзровень таленту. Гэты перыяд асвятляе, безумоўна, Ігар Дабралюбаў, яго фільм «Іван Макаравіч», можа быць, недастаткова ацэнены сучаснай кінематаграфічнай практыкай. У карціне знаходзілі адгалоскі фільма Андрэя Таркоўскага «Іванава дзяцінства», але, нягледзячы ні на што, тут ёсць беларуская рэальнасць. Віталь Чацверыкоў пайшоў па іншым шляху, вельмі складаным: яму належыць фільм рэдкага жанру — кінаэпас — «Полымя», прысвечаны славутай аперацыі «Баграціён». Да гэтага часу фільм «Полымя» застаецца ўнікальным. Віталь Чацверыкоў настолькі цесна датыкнуўся да архіўных матэрыялаў і настолькі маштабна ўвасобіў тэму, што па гэтым шляху сцэнарысты і рэжысёры не адважыліся пайсці далей. «Беларусьфільм» невыпадкова называлі «Партызанфільмам». Ваенная тэма пранізвала залаты век беларускага кіно.
— Можа, цікавасць да ваеннай тэматыкі і ёсць унікальная асаблівасць нашага кіно?
— Калі казаць у гістарычным аспекце, то феномен беларускага кіно, сапраўды, у тым, што яно было паслядоўнікам ваеннай тэматыкі. Гэтая тэма не надуманая, яна крывавіць і да гэтых часоў. Акрамя таго, нашае кіно літаратурацэнтрысцкае, нашым базісам заўсёды была класічная літаратура. Тут творы Васіля Быкава, Івана Мележа, Уладзіміра Караткевіча... Трэцім момантам з'яўляецца гуманістычная накіраванасць, якая захоўваецца і ў сучасным кінематографе, нягледзячы на яго крызісны стан. Гэты гуманізм выяўляецца і ў тым, што кінематограф зноў звярнуўся да дзіцячай тэматыкі. Алена Турава, Сяргей Сычоў і Аляксандр Анісімаў у апошнія два гады стварылі цікавыя фільмы.
Усе мы, вядома, памятаем кіно Льва Голуба, адрасаванае менавіта дзецям, пачынаючы з фільмаў «Міколка-паравоз», «Дзяўчынка шукае бацьку». Мы памятаем мюзіклы Леаніда Нячаева, прызнанага генія беларускай кінематаграфіі, — «Прыгоды Бураціна», «Пра Чырвоны Каптурок. Працяг старой казкі» і іншыя — да нашага дзіцячага кіно на фоне такой магутнай традыцыі можна прад'яўляць пэўныя патрабаванні. Сучасны кінематограф здымаецца ў рамках сямейнага кіно, а фільмаў для дзяцей не хапае. Вядома, гэта выдатная жанравая форма, яна разлічана на прагляд карціны ўсёй сям'ёй, але ўласна на дзяцей беларускі ігравы кінематограф мала скіраваны. Мы рады адраджэнню гэтай нішы, але трэба іграць на больш трапяткіх струнах, звяртацца да больш патрабавальнай дзіцячай аўдыторыі.
— А што можна сказаць пра анімацыю ў тэхніцы выцінанкі-выразанкі? Гэта можна назваць нашай асаблівасцю?
— Тое, што робіць Міхаіл Тумеля (рэжысёр-аніматар, які працуе ў тэхніцы выцінанкі. — Аўт.), — проста вытанчаны, неверагодны цуд. З гэтых папяровых выразанак ён стварыў цэлы свет беларускага фальклору. Ігравое кіно Беларусі прабуксоўвае, знаходзіцца ў складанай, крызіснай сітуацыі, мы ўсё часцей ужываем паняцце «прадукт». А сфера мастацкасці, эстэтыкі, вобразнасці пайшла ў малыя формы: у дакументальнае кіно і анімацыю. Ігар Волчак, Уладзімір і Алена Пяткевічы, Ірына Кадзюкова, Таццяна Кубліцкая, нашы аніматары, гэта незвычайна сціплыя, адказныя і таленавітыя людзі. Яны надзелены дарам абстрактнага, метафарычнага мыслення, якое патрабуе вобразнага асэнсавання і пастаяннага погляду на свет як незвычайнага, нерэальнага. Наша анімацыя славіцца тым, што застаецца шмат у чым рукатворнай. Дзе яшчэ будуць займацца гэтай карпатлівай працай у тэхніцы перакладкі або папяровай марыянеткі? Лепшыя нашы майстры прайшлі школу ў Маскве, вучыліся ў Фёдара Хітрука, Юрыя Нарштэйна і іншых — адсюль гэтая скрупулёзнасць, шматпавярховасць. Сучасны аніматар Ігар Волчак заўсёды адсылае форму сваіх фільмаў да музычнай формы, яго разам з Алегам Белаусавым можна назваць стваральнікам беларускай анімацыйнай школы. Пра гэта трэба казаць уголас, таму што наша анімацыйная школа існуе, і гэта пацвярджаюць шматлікія прызы на кінафестывалях.
— У 2012 годзе ў краіне ўведзена новая сістэма дзяржфінансавання, згодна з якой праекты, каб атрымаць сродкі з бюджэту, павінны прайсці конкурс...
— Рынак Беларусі надзвычай абмежаваны: кінастудыя «Беларусьфільм», некалькі кінакампаній і аўтараў-адзіночак ствараюць наша кінематаграфічнае поле. Сярод сцэнарыяў конкурсу (Антаніна Карпілава — член конкурснай камісіі ў галіне анімацыйнага кіно і кіно для дзяцей. — Аўт.) у асноўным дамінуюць тэксты «Беларусьфільма». Мы добрасумленна чытаем праекты, абмяркоўваем па многіх параметрах, вядома ж, у першую чаргу з пункту гледжання адлюстравання нацыянальнай тэматыкі, нацыянальнага характару, таму што ва ўсім свеце падтрымліваюць, вядома ж, сваю кінематаграфію. Дзе, калі не ў анімацыі і дзіцячых фільмах, адлюстроўваць духоўныя, гуманістычныя каштоўнасці, архетыпы культуры, узнімаючыся вышэй — культурны код нацыі? З гэтага пункту гледжання мы зацвярджаем сцэнарыі. Трэба сказаць, што наш вердыкт носіць толькі рэкамендацыйны характар, хаця часам на нас «коцяць бочкі». Усе тры камісіі (яшчэ ў галіне ігравога і дакументальнага кіно) справядліва працуюць, а хто ўрэшце вырашае — невядома. Бо сцэнар — пункт адліку. Вядомы выраз: для добрага фільма патрэбен сцэнар, сцэнар і сцэнар. Хоць праблема рэжысуры стаіць вельмі востра. З дакументальным кіно, з анімацыяй — у нас нармальна. А ігравое правісае.
— На чым заснавана наша дакументальнае кіно?
— Дакументальнае кіно — наш гонар, яно таксама мае сваю залатую старонку. З часоў Віктара Дашука, Міхаіла Жданоўскага, Юрыя Гарулёва, Сяргея Пятроўскага і многіх іншых гэта кіно, якое стварае дакумент часу. Знамянальны цыкл «У вайны не жаночы твар» Віктара Дашука прыадкрыў вельмі складаны стан жанчыны ў экстрэмальных абставінах. Рэжысёр падняўся вышэй заяўленай задачы, ён перайшоў на псіхааналітычнае даследаванне паводзін славянскай жанчыны ў памежных сітуацыях — гэта працяг вялікіх традыцый славянскай літаратуры. Сучаснае дакументальнае кіно таксама даследуе беларускую ментальнасць, беларускі этнас. Тут лідзіруе два імені — Віктар Аслюк («Мы жывём на краі», «Кола», «Драўляны народ») і Галіна Адамовіч («Геній месца», «Завядзёнка», «Інакіня»). Яны працягваюць даследаванне беларускага характару ў няпростых сучасных сацыяльных умовах. Калі ў Аслюка гэта ў асноўным прастора беларускага сялянства, то Галіна Адамовіч выходзіць і на іншыя сацыяльныя ўзроўні. Трэба адзначыць, што захоўваюць сваю творчую сілу Міхаіл Жданоўскі і Юрый Гарулёў, якія працягваюць працаваць у рэчышчы дакументальнага даследавання.
— Мы ў асноўным гаворым пра «Беларусьфільм». Ці ёсць у нас іншае кіно, пра якое варта згадаць?
— Сярод адзіночак-энтузіястаў ёсць людзі, якія здымаюць за свае грошы. Той жа Кірыл Нонг, фільм якога можна знайсці ў інтэрнэце. Ёсць надзеі на Наталлю Галузу, якая не так даўно прадставіла сваю карціну «Цімур і каманда». Можна назваць серыял «Вышэй за неба» Андрэя Курэйчыка і Дзмітрыя Марыніна, фільм Андрэя Мычко «Адалень-трава». Хочацца верыць у гэтую індывідуальнасць. На жаль, многім не хапае прафесіяналізму, усе аматарскія напрамкі знаходзяцца яшчэ ў полі паўпрафесійнага кіно, хоць і пачынаюць набываць вагу. Але пакуль што «Беларусьфільм» на невялікім рыначным полі з'яўляецца галоўным гульцом.
— Так складваецца, што практычна ўвесь беларускі кінематограф грунтуецца на дзяржаўных грошах. Гэта нейкім чынам на ім адбіваецца?
— Мы для пачатку павінны сказаць дзяржаве дзякуй. Вядома, дзяржаўныя грошы — значыць сацыяльны заказ, выкананне ідэалагічных, стратэгічных планаў. Але я бачу, што незалежнае кіно ідзе ў рэчышчы агульнадзяржаўных тэндэнцый: гэта тыя ж сямейныя, гуманістычныя каштоўнасці. Трэба сказаць, і сацзаказ выконваецца не ў поўнай меры. Напрыклад, перад пачаткам Алімпіяды мы засталіся без спартыўнага фільма, хоць — я ведаю — быў варты сцэнарый пра біятлон. Дзе ён згубіўся?.. Наша кінастудыя называецца нацыянальнай, хаця нацыянальныя праекты толькі ўмоўна можна такімі назваць. Ёсць «Белыя Росы. Вяртанне», але гэта рэмейк. Я ведаю, што ёсць выдатны сцэнарый Алены Калюновай «Забраны край» пра лёс Янкі Купалы з добрым культуралагічным кантэкстам, інтрыгай — мы былі ў захапленні. У нас ляжаць сапраўдныя жамчужыны, якія толькі падабраць — праславішся. Дарэчы, ужо існуе стратэгія развіцця кінематографа на 2015—2020 гады, дзе прапісаны пункт пра дэбюты (што было і раней), але ўпершыню падрабязна ідзе гаворка аб фестывальных фільмах, як мы кажам — арт-хаусных.
— Вы казалі, што апошнім часам у дачыненні да кіно ўсё часцей выкарыстоўваецца паняцце «прадукт». А што такое мастацтва кіно?
— Паняцце «прадукт» цесна звязана з паняццем «тавар». Гэта характарыстыкі камерцыйнага кіно, дзе асноўная стаўка робіцца на эфектыўны прадукт. Так, якасны прадукт накіраваны на атрыманне сродкаў, на матэрыяльную аддачу ад гледача. Між тым мастацтва кіно накіравана на пошук новых формаў мастацкай выразнасці, вылучаецца ўнікальнай канцэпцыяй свету і чалавека, нестандартнымі творчымі ідэямі. Яно ствараецца аўтарамі з арыгінальным мысленнем і накіравана на глыбокага і адукаванага гледача. Але сёння прадукт амаль цалкам выцесніў такія з'явы, як кінатвор, аўтарскі фільм.
Ірэна КАЦЯЛОВІЧ.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».