На тэрыторыі Свіслацкага раёна 7 сельсаветаў, і ў кожным з іх будзе свой Дзень. Той, калі прыйдзецца здаваць своеасаблівы экзамен па надзённых пытаннях жыццезабеспячэння мясцовага насельніцтва. Зрэшты, работа па яго падрыхтоўцы пачынаецца загадзя. А пасля завяршэння Дня сельсавета «кропка» не ставіцца — трэба вырашыць выяўленыя праблемы, якія пазначаны ў пратаколе даручэнняў, зацверджаным старшынёй раённага выканаўчага камітэта.
Старшыня Свіслацкага раённага Савета дэпутатаў Віктар СУБОТКА прапануе пераканацца ў эфектыўнасці такой формы работы на прыкладзе Дня Поразаўскага сельсавета, які адбыўся ў лістападзе мінулага года.
Спачатку стварылі тры рабочыя групы, перад якімі была пастаўлена задача прааналізаваць становішча спраў на тэрыторыі сельсавета ў тых ці іншых сферах — адукацыі, культуры, аховы здароўя, сацыяльнай абароны, гандлю, бытавога і лазневага абслугоўвання, сувязі, грамадскага транспарту; ці падтрымліваюцца ў належным санітарным стане населеныя пункты, могілкі…
У дапамогу рабочым групам падрыхтавалі памятку: на што звярнуць першачарговую ўвагу. Напрыклад, па пытаннях аховы здароўя — на забеспячэнне даступнасці першай медыка-санітарнай дапамогі жыхарам пасёлка Поразава і іншых населеных пунктаў сельсавета, якія ўваходзяць у зону абслугоўвання амбулаторый і ФАПаў, на выкананне графікаў выезду туды ўрачоў-спецыялістаў, на арганізацыю медыцынскага абслугоўвання льготных катэгорый грамадзян. Па пытаннях сацыяльнай абароны — на патрэбы інвалідаў, адзінокіх ветэранаў, шматдзетных сем'яў. У прыватнасці, ці забяспечаны яны палівам, агароднінай на зіму? Ці адпавядае жыллё проціпажарным нормам? Па пытаннях гандлю — на асартымент тавару ў крамах, выкананне заявак насельніцтва, графікаў прыбыцця аўтамагазінаў.
Пры падрыхтоўцы да Дня Поразаўскага сельсавета члены рабочай групы павінны былі таксама пабываць у сем'ях, якія знаходзяцца ў сацыяльна небяспечным становішчы — вызначыць, якія там сацыяльна-бытавыя ўмовы пражывання, матэрыяльнае становішча, ці працаўладкаваны бацькі, ці забяспечаны дзеці ўсім неабходным для навучання ў школе і выканання хатніх заданняў?
Непасрэдна ў Дзень Поразаўскага сельсавета ўсе праблемныя пытанні, якія выявіліся рабочымі групамі ў ходзе маніторынгу, а таксама прыёму мясцовых жыхароў старшынёй Свіслацкага райвыканкама Уладзімірам АНІШЧЫКАМ, былі абмеркаваны, так бы мовіць, вялікай талакой — з удзелам кіраўнікоў раённых службаў, прадпрыемстваў, сельвыканкамаў, старастаў, дэпутатаў і іншых зацікаўленых грамадзян. Вынікам гэтага пасяджэння стаў план мерапрыемстваў па выкананні даручэнняў старшыні раённага выканаўчага камітэта. Дакумент вельмі канкрэтны — з указаннем, хто адказвае за выкананне таго ці іншага даручэння і ў якія тэрміны павінен гэта зрабіць.
Сітуацыі, канешне, розныя. У некаторых выпадках (напрыклад, садзейнічанне ў афармленні дакументаў для прызначэння дапамогі на ўтрыманне дзяцей сем'ям перасяленцаў з Украіны, касметычны рамонт крамы ў вёсцы Сакольнікі і забеспячэнне належнага тэмпературнага рэжыму ў магазіне «Інтэр'ер» пасёлка Поразава, рамонт і аднаўленне работы кавярні, ліквідацыя аварыйнага дрэва) меры прымаюцца неадкладна. Для вырашэння іншых праблем часу патрабуецца больш, але ў любым выпадку выканаўца кожнага даручэння павінен падаць інфармацыю пра зробленае ў Поразаўскі сельвыканкам.
Дарэчы, практычна ўсе даручэнні, што былі дадзены пры правядзенні летась Дня Ханявіцкага сельсавета, ужо выкананы, паведаміў старшыня Свіслацкага раённага Савета дэпутатаў Віктар Суботка. А справаздача аб ходзе выканання ўсіх «поразаўскіх» даручэнняў будзе заслухана ў лютым падчас наступнага Дня сельсавета — на гэты раз Вердаміцкага.
Барыс ПРАКОПЧЫК.
Мерапрыемства праводзіцца на добраахвотнай аснове.
Не выявіць ні секунды абыякавасці.