Адзін з самых прэстыжных і старшых конкурсаў прыгажосці на планеце завяршыўся 25 студзеня ў прыгарадзе Маямі. Удзел у ім сёлета ўзялі прадстаўніцы 88 краін свету. Галоўны тытул «Міс Сусвет» у выніку дастаўся 22-гадовай Паўліне Вега з Калумбіі, а званні віцэ-міс атрымалі прадстаўніца ЗША Ніа Санчэс і ўкраінская студэнтка, будучы пракурор Дзіяна Гаркуша. У пяцёрку найпрыгажэйшых дзяўчат планеты ўвайшлі таксама канкурсанткі з Нідэрландаў і Ямайкі. Беларусь, на жаль, у сёлетнім шоу не ўдзельнічала.
Пра каралеву прыгажосці вядома, што яна ўнучка легендарнага лацінаамерыканскага тэнара Гастона Вегі і пераможцы конкурсу прыгажосці «Міс Атлантыка» 1953 года Эльвіры Касцільо, што ў яе ёсць тры браты і чатыры сястры і што сама дзяўчына захапляецца танцамі, вывучае ва ўніверсітэце кіраванне бізнесам і больш за ўсё любіць бавіць час з сям'ёй. І хоць яна працуе ў мадэльным бізнесе з 8 гадоў, сваім галоўным дасягненнем на конкурсе лічыць той факт, што ёй удалося «прадставіць сучасную жанчыну, якая клапоціцца не толькі пра тое, каб быць гламурнай і прыгожай, але і пра тое, як стаць прафесійным, разумным і руплівым чалавекам».
Як адзначылі сусветныя СМІ, сёлетні конкурс атрымаўся надзіва яркім і запамінальным, асабліва яго традыцыйная частка — дэманстрацыя нацыянальных убораў. Напрыклад, прадстаўніца Канады Шанель Бекенлехнер упрыгожыла свой касцюм... мноствам хакейных клюшак і элементамі амуніцыі, а за яе спінай гарэла электроннае табло. «Міс Германія» Джозефін Донат дапоўніла свой касцюм, прысвечаны падзенню Берлінскай сцяны, белым плюшавым мядзведзем і кранальнай звязкай белых паветраных шарыкаў. А вось прадстаўніца Украіны Дзіяна Гаркуша, наадварот, абрала надзвычай экспрэсіўны чырвона-чорны ўбор пад назвай «Нявесты вайны», які сімвалізаваў трагічныя падзеі на яе радзіме... Касцюм «Міс Вялікабрытанія» Грэйс Леві імітаваў форму каралеўскага гвардзейца, «Міс Венесуэла» Мігбеліс Кастэланас ператварылася ў сапраўдную дрыяду, бо яе сукенку аздаблялі лісце, кветкі і матылькі, Кімберлі Касціла з Дамініканскай Рэспублікі лейтматывам свайго касцюма абрала вобраз святой дзевы Ла Альтаграсіі — апякункі Дамініканы, а «Міс Карэя» Ю Йбін наогул сабрала на сваёй нацыянальнай сукенцы «ханбок» сцягі ўсіх краін свету, каб прадэманстраваць адзінства ўсіх людзей, незалежна ад іх нацыянальнасці і грамадзянства...
Пераможца атрымала з рук папярэдняй «Міс Сусвет», венесуэлкі Габрыэлы Іслер, пераходны прыз — каштоўную карону. Гэты вянец, кошт якога спецыялісты ацэньваюць у 300 тысяч долараў, выкананы з белага золата, дыяментаў, сапфіраў і тапазаў, а яго форма зроблена паводле пейзажаў Нью-Ёрка з яго хмарачосамі.
Нагадаем, конкурс «Міс Сусвет» праходзіць з 1951 года. Яго заснавальнікам выступіла кампанія — вытворца купальнікаў, а ў 1996 годзе правы на конкурс набыў амерыканскі мільярдэр Дональд Трамп.
Вікторыя ЗАХАРАВА
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
