Міхаіл Мясніковіч прапануе прадаваць участкі не толькі «чаргавікам»
Як трэба ставіцца дэпутатам да сваіх выбаршчыкаў? Якім чынам належыць вырашаць праблемы кожнага з іх? Дзе лепш планаваць індывідуальнае будаўніцтва? На днях адказы на гэтыя пытанні даў старшыня Савета Рэспублікі Нацыянальнага сходу Міхаіл Мясніковіч на пазачарговай сесіі Барысаўскага раённага Савета дэпутатаў. Падчас сустрэчы ён наведаў, у тым ліку, і прадпрыемства «Барысаўдрэў», дзе ацаніў узровень мадэрнізацыі.
— У нас у краіне без малога 20000 дэпутатаў усіх узроўняў, — заявіў Міхаіл Мясніковіч. — І менавіта яны павінны выяўляць існуючыя недахопы, а не чакаць, пакуль выбаршчык прыйдзе ў выканкам, Саветы ці на прыём да дэпутата. Трэба зрабіць так, каб сам дэпутат працаваў на апярэджанне.
Спікер верхняй палаты парламента таксама дадаў, што гэта немагчыма без належнай кампетэнцыі Саветаў дэпутатаў і мясцовых выканкамаў і прадугледжвае цеснае ўзаемадзеянне з прадпрыемствамі і працоўнымі калектывамі, асабліва ў сельскай мясцовасці. «Вось гэта і будзе зладжаная і належная праца дэпутатаў», — падкрэсліў старшыня Савета Рэспублікі.
Міхаіл Мясніковіч нагадаў, што з пачатку 2015 года Беларусь з'яўляецца часткай самага вялікага інтэграцыйнага аб'яднання — Еўразійскага эканамічнага саюза. І гэта магчымасць для новых кантактаў і развіцця эканомікі рэгіёна. Але і тут дэпутаты не павінны чакаць загадаў «зверху», а праяўляць ініцыятыву.
«Эканамічны стан раёна, вобласці і краіны ўвогуле вызначае дабрабыт людзей», — заўважыў спікер. Ён дадаў, што калі б належным чынам былі забяспечаны бюджэты ўсіх узроўняў, вырашаць праблемы грамадзян стала б значна прасцей. «Ад кожнага Савета, ад Барысаўскага ў тым ліку, патрабуецца канкрэтыка ў працы. Не размовы і разважанні, а штодзённая работа з выканкамам і кіраўнікамі прадпрыемстваў», — заявіў сенатар і адзначыў, што нельга чакаць, пакуль на вытворчасць завітае міністр і дасць загад усё выправіць. Трэба самім дэпутатам актыўна ўнікаць у сутнасць праблем.
Падчас сесіі разглядаліся ў тым ліку і пытанні зваротаў грамадзян. «Кабінетны стыль работы са зваротамі грамадзян цалкам непрымальны», — заявіў Міхаіл Мясніковіч. Ён адзначыў, што ў Барысаўскім раёне каля 40% зваротаў датычацца праблем жыллёва-камунальнай гаспадаркі і дарожнага будаўніцтва. Але праграмы для іх вырашэння ў дэпутатаў няма.
Таксама старшыня Савета Рэспублікі заявіў, што каля 15 000 участкаў будзе выдзелена ў 2015 годзе для будаўніцтва індывідуальнага жылля ў Мінскай вобласці. У той жа час іх можна прадаваць не толькі тым, хто мае патрэбу ў паляпшэнні жыллёвых умоў, але і кожнаму, хто жадае. Для гэтага спікер параіў браць «свабодныя ўчасткі ў вёсках, дзе ўжо ёсць інжынерныя сеткі». Таксама ён дадаў, што будаўніцтва ў Мінску будзе скарачацца. Таму шмат людзей зацікавяцца кавалкамі зямлі ў раёне. Гэта можа стаць дадатковай крыніцай для папаўнення мясцовага бюджэту.
Падчас візіту на «Барысаўдрэў» Міхаіл Мясніковіч адзначыў, што комплексная мадэрнізацыя вытворчасці гэтага прадпрыемства цалкам скончана. Была праведзена рэканструкцыя будынка цэха драўняна-валакністых пліт. Мадэрнізацыя закранула запалкавую і фанерную вытворчасць. Але ўзнікаюць пытанні не столькі па якасці прадукцыі, колькі па яе рэалізацыі.
«Прадпрыемства ў снежні 2014 года прадало практычна той аб'ём прадукцыі, які і вырабіла, у студзені сітуацыя горшая», — адзначыў старшыня Савета Рэспублікі. Ён падкрэсліў, што сёння нельга арыентавацца толькі на расійскі рынак. Трэба звяртацца ў тым ліку і да рынкаў «краін Азіі і Еўропы».
Акрамя «Барысаўдрэва», Міхаіл Мясніковіч наведаў «Барысаўскі крыштальны завод імя Ф.Э. Дзяржынскага» і «Барысаўскі завод медыцынскіх прэпаратаў».
Вераніка ПУСТАВІТ,
г. Барысаў
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.