Таму жыллё на «льготнай» зямлі пуставаць не будзе
Цяпер спецыялістамі рыхтуецца праект дакумента, па якім часткова здымаецца забарона на продаж прыватных дамоў на працягу 8 гадоў пасля іх дзяржаўнай рэгістрацыі. Аб гэтым паведаміў старшыня Дзяржаўнага камітэта па маёмасці Беларусі
Андрэй Гаеў.
Паводле яго слоў, новаўвядзенне дазволіць выканкамам у асобных выпадках ажыццяўляць адчужэнне аб'ектаў нерухомай маёмасці, якія пабудаваны на так званых сацыяльных участках. Нагадаю, што яны раней былі прадастаўлены грамадзянам, якія мелі патрэбу ў паляпшэнні жыллёвых умоў, без аўкцыёнаў. Пакуль па гэтай маёмасці існуе забарона на адчужэнне на працягу 8 гадоў з дня дзяржаўнай рэгістрацыі жылых дамоў на такіх участках. «Але ў аб'ектыўных выпадках, да якіх адносяцца страта карміцеля ў сям'і, пераезд у іншую мясцовасць, атрыманне інваліднасці грамадзянінам, дазвол на продаж аб'екта мясцовыя ўлады ўжо змогуць даць», — растлумачыў пазіцыю камітэта Андрэй Гаеў.
Агульны парадак і жорсткі кантроль
У мінулыя гады вымярэнне зямельных участкаў для насельніцтва ажыццяўлялі адразу некалькі структур, дзе выкарыстоўваліся розныя падыходы і інструменты. Таму ўзнікалі спрэчныя моманты ў суседзяў, калі па дакументах і на практыцы атрымлівалася нестыкоўка зямельных участкаў. Падобныя сітуацыі часам «разруліць» бывае даволі складана. Таму камітэт плануе вырашыць гэта пытанне кардынальна — цяпер землеўпарадкавальныя справы будуць разглядаць толькі спецыялізаваныя арганізацыі ва ўстаноўленым парадку.
Адначасова кіраўнік камітэта адзначыў, што для забеспячэння своечасовай рэгістрацыі зямельных участкаў сельскагаспадарчых і лясных зямель прадугледжваецца вызваленне сельскагаспадарчых устаноў ад дзяржаўнай пошліны за афармленне дакументаў, якія сведчаць аб правах на зямельныя ўчасткі. Гэта робіцца для таго, каб хутчэй завяршыць гэтую працэдуру і паменшыць нагрузку пры афармленні дакументаў.
Плануе Дзяржкамітэт па маёмасці і больш пільна сачыць за мэтавым выкарыстаннем зямель. Сёння ў яго адсутнічаюць паўнамоцтвы ў галіне кантролю за выкарыстаннем і аховай зямель, бо гэтыя пытанні ўскладзены на землеўпарадкавальныя службы выканаўчых камітэтаў. «Але мы ўбаку не застаёмся і, калі бачым праблему, рыхтуем адпаведную інфармацыю. Плануецца ўнесці змены ва ўказ №667, якім прадугледжваецца абавязаць Дзяржкаммаёмасць накіроўваць у Камітэт дзяржкантролю інфармацыю пра вядомыя факты парушэнняў зямельнага і іншага заканадаўства «, — адзначыў Андрэй Гаеў.
Дзяржмаёмасць у адзіным рэестры
Кіраўнік галіны паведаміў, што сёлета будзе завершаны працэс фарміравання адзінага рэестра дзяржаўнай маёмасці. Зараз ён утрымлівае інфармацыю пра больш чым 850 тысяч аб'ектаў, дзе зафіксаваныя звесткі па памяшканнях плошчай каля 123 млн квадратных метраў. Спецыялісты камітэта разлічваюць, што гэты рэестр будзе інтэграваны з адзіным дзяржаўным рэгістрам нерухомай маёмасці, правоў на яе і здзелак з ёю. Стварэнне адзінага рэестра тут збіраюцца перавесці ў ранг самых прыярытэтных задач, «бо калі не ведаць, чым ты валодаеш, немагчыма гэтым эфектыўна кіраваць», — адзначыў старшыня Дзяржкаммаёмасці.
А сёння краіне трэба хутка вырашаць праблему ўключэння ў абарот маёмасці, якая выкарыстоўваецца неэфектыўна ці ўвогуле не выкарыстоўваецца. Па такой маёмасці асноўным спосабам вырашэння праблемы з'яўляецца яе продаж. Летась камітэтам былі выстаўленыя на таргі ўсе аб'екты, якія былі ў плане. Аднак, не ўсе яны былі прададзены, бо многія з іх з'яўляюцца неліквіднымі. Калі падобная дзяржмаёмасць не мае каштоўнасці, то прымаецца рашэнне аб яе зносе, але да гэтага трэба падыходзіць вельмі асцярожна. Напрыклад, з 528 аб'ектаў, якія не былі прададзеныя ў 2013 годзе, прыкладна 290 былі рэалізаваны летась.
Асобна Андрэй Гаеў спыніўся на дзейнасці акцыянерных таварыстваў, частка якіх працуе не заўсёды эфектыўна. Так, летась агульная сума выплачаных усімі таварыствамі дывідэндаў склала 5,4 трлн рублёў. Прычым толькі 10 акцыянерных таварыстваў заплацілі сваім акцыянерам каля 3 трлн рублёў.
Прыватызацыя на 850 млн USD
Спецыялісты Дзяржаўнага камітэта па маёмасці Беларусі сумесна з іншымі міністэрствамі сфарміравалі пералік аб'ектаў для прыватызацыі ў 2015 годзе.
У яго ўвайшлі 64 гаспадарчыя таварыствы і 4 рэспубліканскія ўнітарныя прадпрыемствы. Разам з тым, падобны план не з'яўляецца догмай у канчатковым варыянце. Пры наяўнасці рэальнага інвестара гэты пералік можа быць папоўнены іншымі арганізацыямі. Цяпер падобны спіс быў сфарміраваны на падставе прапаноў дзяржаўных органаў. Сёння фарміруюцца ўмовы прыватызацыі па кожным з гэтых аб'ектаў.
Тут варта нагадаць, што, згодна з пастановай Савета Міністраў, Дзяржкаммаёмасці, аблвыканкамам і Мінскаму гарвыканкаму сумесна з органамі дзяржкіравання было даручана сфарміраваць пералік прапаноў аб'ектаў прыватызацыі на суму не менш як 850 млн долараў для продажу інвестарам у 2015 годзе. Прыкладна на гэтую суму і быў падрыхтаваны новы пералік.
МТС падвісла
— Летась наша краіна рэальна разлічвала адшукаць буйнога інвестара для мабільнага аператара МТС. Мы планавалі атрымаць ад продажу дзяржпакета акцый кампаніі (51%) каля 1 млрд долараў. Але здзелку не ажыццявілі. Цяпер сітуацыя на сусветным рынку падобных акцый увогуле змянілася. Таму тэрміны выстаўлення на продаж дзяржаўных пакетаў акцый кампаніі МТС пакуль не вызначаны, — паведаміў першы намеснік старшыні Дзяржаўнага камітэта па маёмасці Беларусі Аляксей Васільеў. — Разам з тым, праца па продажы акцый гэтай структуры будзе працягвацца, — падкрэсліў спецыяліст.
Эксперты адзначаюць, што цяпер кошт дзяржпакета кампаніі складае ўжо каля 863 млн долараў.
Сяргей КУРКАЧ.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».