Вы тут

Для ўсіх, хто кахае


У сераду адбудзецца сустрэча з паэткай, кампазітаркай і выканаўцай Таццянай Атрошанкай. Гэта яе першы сольны канцэрт у Мінску. На вечарыне гледачоў чакае паэзія ў выкананні акцёраў тэатра, танцавальныя нумары і, самае галоўнае, жывое выкананне песень аўтаркі ў суправаджэнні кавер-групы «Over рlay».

10-6

Пісаць Таццяна пачала яшчэ ў дзяцінстве, але літаратурны дэбют адбыўся толькі ў студэнцкія гады.

— Як беларуская паэтка я «нарадзілася» ў Гомельскім дзяржаўным універсітэце,— расказвае Таццяна. — Адзін наш выкладчык аднойчы задаў усім студэнтам незвычайнае творчае заданне — напісаць верш. Я была адказнай студэнткай, таму паставілася да патрабавання сур'ёзна. Памятаю, усю ноч не спала, але так і не змагла нічога прыдумаць. А потым, калі раптам прачнулася, за пяць хвілін напісала верш «Маладосць мая». Выкладчык, прачытаўшы яго, прапанаваў надрукавацца ў газеце ўніверсітэта. Менавіта тады я адчула, што паэзія — гэта маё. Па сённяшні дзень захоўваю свой першы надрукаваны твор... Гэты жоўты кавалачак паперы вельмі дарагі для мяне.

Пасля заканчэння ўніверсітэта дзяўчына воляй лёсу апынулася на Маладзечаншчыне і пачала друкавацца на старонках «Маладзечанскай газеты», у часопісе «Маладосць», «Белорусская нива», «Мінская праўда», літаратурных выданнях «Буда-Кашалёўшчына літаратурная», «Маладзечаншчына літаратурная», «Міншчына літаратурная», зборніку апавяданняў маладых пісьменнікаў «Кахаць і верыць», часопісе «Рюкзачок» і іншых. Неўзабаве выйшаў першы ўласны зборнік твораў «Не я...»

— Усё, што я калі-небудзь пісала, прыходзіла да мяне ўжо з мелодыяй,— прызнаецца Таццяна. — Кожны твор у мяне мае свой асабісты музычны код. Ноты іншы раз прабіваюцца нават у вершах: «Там ціхутка душа трэсне, стаўшы нотаю бемоль»... Я такая нарадзілася — з музыкай у галаве... У мяне нічога дарма не прападае — ні подых ветру, ні шэпт лістоты... Нават у цішыні безліч адценняў.

Так у ёй нарадзілася кампазітарка. Таццяна адчула неабходнасць пісаць не толькі вершы, але і музыку. Калі набралася пэўная колькасць песень, быў выпушчаны дыск «Усярэдзіне вялікага горада», адзначаны статуэткай «Залаты Купідон» у намінацыі «песенны жанр» падчас святкавання Дня беларускага пісьменства. Яе песні пачалі гучаць з вялікай сцэны ў выкананні вядучых калектываў Беларусі, сярод якіх беларускі дзяржаўны ансамбль «Свята», ансамбль народнай музыкі «Бяседа», а таксама эстрадных выканаўцаў, такіх, як Яўген Славіч, Аляксандр Салаўёў, Алена Бярэзіна, Ірына Дарафеева, актрыса Валерыя Арланава і іншых.

Але Таццяна выконвае свае песні і сама.

— Чаму я стала спяваць? — разважае Таццяна. — Таму, што мне хацелася сваёй інтэрпрэтацыі, сваёй падачы... Іншы раз імкнулася песню «расказаць» па-свойму. Я рабіла раней творчыя вечары ў г. Буда-Кашалёва, Маладзечне, дзе спявала песні не толькі для дарослых, але і для дзяцей, але ў Мінску вечар будзе праходзіць упершыню. Над праграмай, якую гледачы змогуць пабачыць 11 сакавіка, я працавала больш за сем гадоў. Канцэрт створаны для закаханых і называецца «У вачах тваіх мора». І калі людзям спадабаецца, я буду рыхтаваць падобныя канцэрты і далей.

Гэтая сустрэча будзе цікавая для гледачоў усіх узростаў. Вечарына адбудзецца ў Рэспубліканскім палацы культуры прафсаюзаў Мінска 11 сакавіка.

Наталля ТАЛІВІНСКАЯ

Дадаць каментар

Выбар рэдакцыі

Грамадства

Партызанскія рукапісы — бясцэнныя сведчанні ваеннага часу

Партызанскія рукапісы — бясцэнныя сведчанні ваеннага часу

Партызанскія часопісы — насамрэч унікальныя інфармацыйныя зборнікі, значэнне і важнасць якіх разумелі ў тым ліку іх стваральнікі і чытачы.

Грамадства

Беларускія навукоўцы прадставілі больш за 300 распрацовак і тэхналогій

Беларускія навукоўцы прадставілі больш за 300 распрацовак і тэхналогій

На юбілейнай выстаўцы Нацыянальнай акадэміі навук.

Эканоміка

Ніна Жалязнова: Мы, беларусы, па сваёй ментальнасці — людзі зямлі

Ніна Жалязнова: Мы, беларусы, па сваёй ментальнасці — людзі зямлі

«Звязда» ўжо неаднойчы пісала пра гэту незвычайную жанчыну.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра ўрокі іншай мовы і шчасце, калі ў доме гаспадар.